اے این ایف پنجگور اٹی منشیات اسمگلنگ نا بھلو کوشست اسے بے سہب کرے، 154.15ملین ڈالر مالیت نا منشیات دوئی

اسلام آباد۔ 27 نومبر (اے پی پی) اینٹی نارکوٹکس فورس (اے این ایف) پنجگور اٹی منشیات اسمگلنگ نا بھلو کوشست اسے بے سہب کرے، اے این ایف انٹیلی جنس بنداو آ کارروائی ٹی منظم اسمگلنگ نیٹ ورک نا 2 دوبہ دار آتے دزگیرکرسا 154.15ملین ڈالر مالیت نا منشیات دوئی کرے۔ اے این ایف پنجگور اٹی جہانی ڈرگ ٹریفکنگ تنظیم نا پدریسہ چاروکی ءِ کریکہ، اے این ایف ٹیمک دمدستی کارروائی کرسا گیس کنٹینر ءِ ایم 8 گوادر سی پیک روڈ آ تورسا پٹا و داوخت آ 553.5کلو گرام آئس و 40 کلوگرام ہیرون کوزہ ٹی ہلک۔ کوزہ ٹی ہلوک آ منشیات نا نہاد انٹرنیشنل مارکیٹ اٹی 154.15ملین ڈالر ءِ، منظم اسمگلنگ نیٹ ورک نا 2 کارندہ ہم دزگیر، مقدمہ نوشتہ کننگا۔ بدنام زمانہ اسمگلر علی جان نا کماشی ٹی دا گروہ اوغانستان آن منشیات ءِ پنجگور آن تربت، گوادر و پسنی نا کسر اسمگل کریکہ۔ دا گروہ بھلو منشیات اسے یمن، تنزانیہ و ایلو ملک آتسکان اسپیڈ بوٹس و چنکا کشتی تا کمک اٹ اسمگل کریکہ۔ منشیات آتے ایل پی جی گیس کنٹینر ٹرک اٹی اودیم کرسا پنجگور آن گوادر و ولدا پیشن نا ملک اسمگل کننگ نا ڈٹ جوڑ کننگاسس۔ دا کارروائی اینٹی نارکوٹکس فورس انا کنڈآن منشیات نا توننگ کن خشکی آ کروک آ غٹ آن بھلا کارروائی تیان اسٹ ءِ۔ منشیات اٹ اواری ایلو دوبہ دار و کمکار آتا دزگیری کن کوشست آک برجاءُ ۔ زیروٹالرنس پالیسی آ عمل کروک اے این ایف منظم ڈرگ نیٹ ورک نا چٹفنگ کن پبی کارروائی تے برجاتخانے۔