وزیراعظم شہباز شریف نا ہانگ کانگ نا ماڑی ٹی خاخر لگنگ آن جونی ومالی نسخان تیا است ہسونی نا درشان، چینی صدر و قوم اتون ہڑزخواہی

اسلام آباد۔ 27 نومبر (اے پی پی) وزیراعظم محمد شہباز شریف ہانگ کانگ نا بڑزانگا ماڑی ٹی بھسکار خاخر لگنگ آن نہادی جونی و مالی نسخان تیا ڈکھیائی و است ہسونی نا درشان و چین نا صدر شی جن پنگ، چینی قوم و زہمی تتون ہڑزخواہی کرینے ۔ پنچ شنبے نادے آ راجی رابطہ نا ویب سائٹ’’ایکس‘‘ آ کلہو اٹی وزیراعظم پارے کہ بھسکار خاخر لگنگ نا داواقعہ ٹی نہادی جونی ومالی نسخان تیا ڈکھیائی و است ہسونی مسنے، چین نا صدر شی جن پنگ ، چینی قوم و زہمی تتون ہڑزخواہی کینہ، ننا دعاو ہمدردیک پدسلوک آخاہوت آتون ءُ، ٹھپی تا زوت دراخ جوڑی و زہمی تا ہمت و بحالی کن ہم دعا کینہ۔ وزیراعظم پارے کہ پاکستان مشکل نا داساہت اٹی چین نا الس، حکومت خاص کر ہانگ کانگ خصوصی انتظامی ڈیہہ اتون پورو یکجہتی نا درشانی ءِ کیک، پاکستان و چین مدام اسہ ایلوتون سلرہ۔