اسلام آباد۔ 27 نومبر (اے پی پی) وزیراعظم نا خصوصی کمکار صنعت وپیداوار ہارون اخترخان نا کماشی ٹی پنچ شنبے نادے آ اسہ اہم بڑزکو کہولی دیوان اس اڈ ہلک ہراٹی ازبکستان نا سفیر علیشیر تختیو، پاکستانی کمرشل اتاشی ظہیر عباس، راولپنڈی چیمبرآف کامرس نا صدر عثمان شوکت و اونا ڈل بشخ ہلکر۔ دیوان اٹی راولپنڈی چیمبر آف کامرس نا 150 باسکی واپاری ڈل انا ساڑی آ ازبکستان دورہ …
وزیراعظم نا خصوصی کمکار صنعت وپیداوار ہارون اخترخان نا کماشی ٹی دیوان، پاکستان و ازبکستان نا نیام اٹ اقتصادی کمکاری ءِ مون آ دننگ کن گام گیج آتیا غور
گیشتریں ھال
اسلام آباد۔ 27 نومبر (اے پی پی) وزیراعظم نا خصوصی کمکار صنعت وپیداوار ہارون اخترخان نا کماشی ٹی پنچ شنبے نادے آ اسہ اہم بڑزکو کہولی دیوان اس اڈ ہلک ہراٹی ازبکستان نا سفیر علیشیر تختیو، پاکستانی کمرشل اتاشی ظہیر عباس، راولپنڈی چیمبرآف کامرس نا صدر عثمان شوکت و اونا ڈل بشخ ہلکر۔ دیوان اٹی راولپنڈی چیمبر آف کامرس نا 150 باسکی واپاری ڈل انا ساڑی آ ازبکستان دورہ غا سرجمی اٹ حوال تننگا ہراٹی جان جوڑی، فارما، سیل و سوات و تعمیرات تون وابستہ چاہندار آک اوار ئسر۔ ڈل ازبکستان اٹی تینا آزموندہ، چندی بشخ آتیٹی گمانی کمکاری و زرکاری نا وارخواہی تا بابت جوان ءُ رپورٹ اس پیش کرے۔ راولپنڈی چیمبر نا صدر پارے کہ ڈل ازبک فارماپارک، ایکسی لینس سینٹر، آئی سی ٹی سینٹر، ٹیکنیکل یونیورسٹی و بزنس سینٹر نا دورہ ءِ کرےہراڑے اوفتے ازبکستان نا صنعتی شونداری و زرکاردوست پالیسی تا بابت بریف کننگا۔ اوپارے کہ فارما پارک اٹی ڈغار، پراپرٹی و دِیر انا کاریم اٹ اتنگ آ خراج آن استثنیٰ و تعمیراتی گڑاتیا صفر کسٹم ڈیوٹی کون آ گام گیج زرکاری نا مون آ دننگ اٹ اہم کڑد ادا کننگ ءُ، پاکستان اٹی ہم ہنداوڑنا پوسکن فارماپارک آتا جوڑ کننگ نا گرج ءِ۔ راولپنڈی چیمبرپاکستان و ازبکستان نا نیام اٹ اولیتی واپاری معاہدہ غاتیٹی ودکی و سیل وسوات، دفاع، ٹیکنالوجی تون اوار کیہی بشخ آتیٹی کمکاری ءِ ودفنگ نا سفارش کرے۔ چیمبرہارون اخترخان نا است خواہی، کمکاری و ازبکستان نا دورہ نا ستاءِ کرے ۔ ہارون اخترخان ڈل انا کوشست آتا ستاءِ کرساپارے کہ پاک۔ ازبک تعلقداری چندی بشخ آتیٹی ترندی اٹ مون آ ہِننگ ءِ، وزیراعظم محمد شہباز شریف نا وژن نا رداٹ نیامی ایشیائی ملک آتون تعلقداری ءِ پوسکن ءُ جہت اس تننگ انگ ءِ۔ اوپارے کہ پوسکن آ قومی صنعتی پالیسی و ریگولیٹری اصلاحات نا بنداوی مسخت زرکارآتا پت ءِ بحال کننگ و علاقائی اقتصادی رابطہ غاتے سوگو کننگ ءِ۔ اوپارے کہ سیل و سوات نا بشخ بے پناہ گمان تخک و پاکستان ازبکستان تون داپڑاٹی کمکاری ءِ پین ودفک۔ اوراولپنڈی چیمبرنا کنڈآن چندی بشخ آتا ڈل آتا شانداری سرکڑدہ ئی ءِ سفت نا قابل گوندا۔ ہارون اخترخان غٹ اسٹیک ہولڈر آتے پارت کرے کہ ازبکستان تون طے مروک ایم اویوز و معاہدہ غاتیا دمدستی فالواپ کننگے و اسیجائی ڈٹ آتے عملی دروشم اس تننگ کن پبی گام گیج کننگے تانکہ ہڑتوم آملک آتا نیام اٹ اقتصادی تعلقداری پین سوگو مرے۔ ازبک سفیر علیشیر تختیو واپاری ڈل انا دورہ و است خواہی نا ستاءِ کرسا ہڑتوم آملک آتا نیام اٹ کمکاری نا مون آ دننگ نا عزم انا درشانی ءِ کرے۔
