راجی اسمبلی ءِ اسپیکر سردار ایاز صادق ءَ جرمنی ءِ سفیر اینا لیپل  ءَ گوں گند ءُ نند کتگ، پاک جرمنی ءِ دو نیمگی سیادی ءُ وت مہ وتی مفاد ءِ ایندگر معاملہانی سرا گپ ءُ تران

اسلام آباد۔26نومبر  (اے پی پی): راجی اسمبلی ءِ اسپیکر سردار ایاز صادق ءَ پارلیمنٹ گس ءَ جرمنی ءِ سفیر انا لیپل ءَ گوں گند ءُ نند کتگ ءُ پاک جرمنی ءِ دو نیمگی سیادی ءُ وت مہ وتی مفاد ءِ ایندگر جیڈھ آنی سر ءَ گپ ءُ تران کتگ۔ جرمن سفارتکار ءَ گوں تران کنان ءَ اسپیکر ءَ گوشت کہ پاکستان ءُ جرمنی ءِ نیام ءَ پارلیمانی ءُ السی سیادی سک باز ارزشت ءِ واھند انت۔ دوئیں رہشون آں پارلیمانی ڈل آنی تبادلہ ءَ را دیمروئی دیگ ءِ سر ءَ تپاک کتگ۔ اسپیکر ءَ گوشت کہ پاکستان ءِ پارلیمنٹ ءَ را اے شرپ اِنت کہ آ دگنیا ءِ اولی پارلیمنٹ اِنت کہ آئی ءَ سرجمی ءَ شمسی توانائی ءِ نیمگ ءَ رھادگ بوتگ۔ زالبول ءُ زھگانی ھکانی رکھینگ ءِ ھاترا پارلیمنٹ ءَ ھاسیں کاکس جوڑ کنگ بوتگ اَنت۔ پاکستان ءِ گوستگیں ناشرکاری ءِ وئیلانی تاک اوگانستان ءِ وڑ ءَ اِنت۔ افغان مٹی پاکستان ءِ ھلاپ ءَ ناشرکاری ءِ واستہ کارمرد کنگ بیگ ءَ انت ۔ پاکستان گوستگیں چار دہائیاں چہ 4ملین ءَ چہ گیش اوگان پناہ گزین آنی میزبانی ءَ کنگ ءَ اِنت۔ کلیں مذہب انتہا پسندی ءُ ناشرکاری ءِ سرا پابندی جن انت۔ ایمنی ءَ گوں گیواری المی اِنت ۔  دو نیمگی سیادی ءَ را مھکم کنگ ءِ تہ ءَ پارلیمانی سیادی ھاسیں کرد پیلو کت کنت۔ صنفی برابری ءِ واستہ پارلیمنٹ ءَ دوئیں ایوان آنی سر ءَ ھواریں ھاسیں کمیٹی جوڑ کنگ بوتگ۔ موسمی بدلی ءَ چہ آماچیں ملک آنی تہ ءَ پاکستان ھم ھوار اِنت۔ اسپیکر سردار ایاز صادق ءَ موسمی مٹ ءُ بدلی ءِ چیلنج آنی گر ءُ دار ءِ واستہ یکجائی کوشست ءِ ضلورت ءِ سر ءَ زور پر دات۔ جرمن سفیر انا لپل ءَ پاکستان ءِ پارلیمانی دود ءُ ربیدگ ءُ اصلاحات ءِ گامگیج آناں ساڑات ءُ گوشت کہ پاکستان ءَ صنفی برابری ءُ زھگ آنی ھک آنی دیمروئی ءِ واستہ جاری اصلاحات ستا کرز اَنت۔ جرمنی پاکستان ءِ گوما پارلیمانی سیادی ءَ را گیش گہتر کنگ ءِ واھشت مند اِنت۔ جرمنی اقتصادی ءُ چاگردی شوبگ آنی تہ ءَ پاکستان ءِ گوما کمک ءَ را گیش دیمروئی دیگ لوٹ ایت۔ سردار ایاز صادق ءَ گوشت کہ ناشرکاری ءِ ھلاسی ءِ واستہ پاکستان ءِ نیمگ ءَ چست کتگیں گامگیج ستا کرز انت۔ پاکستان ءَ ناشرکاری ءِ ھلاپ ءَ جنگ ءَ بے دروریں قربانی داتگ۔