ہارون اختر خان ءِ گشگ انت کہ اقتصادی استحکام ءِ ھاتر ءَ برآمدات چہ درآمدات ءَ تیز تر بہ بنت

اسلام آباد۔26نومبر  (اے پی پی):مزن وزیر ءِ ھاسیں کمکار ہارون اختر خان ءَ گوشت کہ روزگار ءِ موہ پیداک کنگ ءِ واستہ اقتصادی دیمروئی ءِ تہ ءَ ترندی کنگ المی اِنت۔ آئی ءَ پاک بزنس کونسل ءِ ڈائیلاگ برائے معیشت ءِ سیشن ءَ بہر زرتگ ءُ ملک ءِ اقتصادی جاور ھال آنی سر ءَ گپ ءُ تران کتگ۔ آئی ءَ اے گپ ءِ سر ءَ زور پر دات کہ درملکی سرمایہ کاری لوٹگ ءَ چہ پیسر پاکستان وتی ملک ءَ سرمایہ کاری ءَ را مھکم کنگ ءِ سر ءَ دلگوشی بہ دنت۔ ترندیں اقتصادی دیمروئی ءِ ضلورت ءِ سر ءَ زور پر دیان ءَ آئی ءَ گوشت کہ اقتصادی دیمروئی ءَ را ترند کنگ روزگار ءِ موہ پیداک کنگ ءِ واستہ المی اِنت۔ ہارون اختر خان ءَ گوشت کہ صنعتی دیمروئی ءَ ابید ھچ ملک وشھال نہ بیت، صنعت اقتصادی دیمروئی ءِ مڈی انت ۔ آئی ءَ اے گپ ءِ سر ءَ دلگوش گور کت کہ برآمدات ءِ رفتار درآمدات ءَ چہ گیش بہ بیت ورنہ تجارتی خسارہ ءِ تہ ءَ گیشی برجاہ بیت ءُ معیشت ءِ سر ءَ زور کپ ایت۔ آئی ءَ برآمدات ءِ دیمروئی ءِ واستہ مینوفیکچرنگ ءُ لوکل پیداوار ءِ تہ ءَ گیشی ءِ سر ءَ زور پر دات ءُ گوشت کہ برآمدات ءِ دیمروئی ءِ واستہ اسٹیل ءِ وڑیں بنیاتی سامان آنی ملکی پیداوار المی اِنت۔ آئی ءَ اصلاحات ءِ سر ءَ عمل کنگ ءِ تہ ءَ فیڈرل بورڈ آف ریونیو ءِ جوانیں کارکردگی ءَ را ساڑات۔ آئی ءَ گوشت کہ پاکستان وتی صلاحیت ءُ راجی طاقت ءَ گوں دیمروئی کت کنت۔ ہارون اختر خان ءَ گیش گوشت کہ آیوکیں صنعتی پالیشی ءِ رد ءَ ٹیکس پیکج آئی ایم ایف ءَ را پیش کنگ بیت۔ آئی ءَ گپ ءِ آسر ءَ گوشت کہ آیوکیں اصلاحات ءِ گامگیج دراجیں مدت ءُ برجمیں اقتصادی دیمروئی ءِ ھاترا انت۔