اقتصادی استحکام، مقابلہ ءُ مالیاتی  ڈسپلین  ءِ ھاتر ءَ ناقابل واپسی اصلاحات ءِ سرا پیشرفت جاری انت، وزیر خزانہ محمد اورنگزیب ءَ پاکستان بزنس کونسل ءِ میزبانی ءَ مراگش ءَ گوں تران

اسلام آباد۔26نومبر  (اے پی پی):وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ حکومت یک پراھ ءُ شاھگانیں گہتری  ءِ ایجنڈا ءِ سر ءَ ترندی ءَ گوں دیم ءَ روگ ءَ اِنت ایشی ءِ مول ءُ مراد اقتصادی استحکام ءَ را مھکم کنگ، مقابلہ ءِ تہ ءَ گہتری ءُ مالیاتی توازن ءِ بحال کنگ اِنت۔ چار شمبے ءِ روچ ءَ پاکستان بزنس کونسل ءِ میزبانی ءَ پاکستان ءِ معیشت ءِ بابت ءَ ڈائیلاگ ءَ گوں گشتانک دیان ءَ وزیر ءِ ھزانگ ءَ ٹیکس اصلاحات، ڈیجیٹل ٹرانسفارمیشن، سرکاری ادارگ آنی نوک جوڑیشت ءُ قرض ءِ بندوبست ءَ ھوار برجاھیں گامگیج آنی سر ءَ چار ءُ تپاسی کت ایشی ءِ مول ءُ مراد پاکستان ءَ را گیش پائیدار اقتصادی بنیات ءِ پھجارینگ اِنت۔ وزیر ءِ ھزانگ ءَ گوشت کہ پاکستان ءَ سرجمیں معیشت ءِ برجائی ءِ دیم ءَ مزنیں پیشرفت کتگ ایشی ءِ تہ ءَ معیشت ءِ وشھالی ءِ بنداتی نشانی ھم دیم ءَ آیگ بندات بوتگ اَنت۔ آئی ءَ سیمنٹ، کھاد، گاڑی، موبائل فون ءِ جوڑ کنگ ءُ مزنیں صنعت آنی تہ ءَ جوانیں رجحان آنی حوالہ داتگ۔ آئی ءَ او آئی سی آئی ءِ نوکیں سروے ءِ ھم ھال دات کہ ایشی ءِ تہ ءَ سرمایہ کار آنی بھروسہ ءِ تہ ءَ مزنیں گہتری ءِ ھال داتگ ءُ پاکستان ءَ را درملکی سرمایہ کاری ءِ واستہ یک جوانیں ملک ءِ رنگ ءَ درجہ بندی کنوکیں مردمانی تہ ءَ مزنیں گیشی ءِ ھال داتگ۔ وزیر خزانہ ءَ توانائی، کان کنی، ٹیکنالوجی، رسد ءُ آٹو شوبگ آنی تہ ءَ گلوبل کمپنی آنی گیش بوھوکیں دلچسپی ءِ حوالہ دات ءُ گوشت کہ اے پاکستان ءِ اقتصادی رھبند ءِ سر ءَ گیش بوھوکیں دل یکیمی ءِ درشان اِنت۔ سینیٹر محمد اورنگزیب ءَ گوشت کہ حکومت اصلاحات آنی ڈیزائن ءَ چہ عملی نفاذ ءِ مرحلہ ءَ دیم ءَ شتگ۔ آئی ءَ ٹیکس ءِ نظام ءِ برجاھیں جامع بدلی ءِ سر ءَ زور پر دات کہ ایشی ءَ را مردم، کارروائی ءُ ٹیکنالوجی ءِ سر ءَ بنیات ءِ سر ءَ یک جامع ڈیجیٹلائزیشن ایجنڈا ءِ وسیلگ ءَ دیم ءَ برگ بوھگ ءَ اِنت۔ آئی ءَ گوشت کہ ٹیکس پالیشی ءِ اتھارٹی ایف بی آر ءَ چہ وزارت خزانہ ءَ دیم دیگ بوتگ اودا ٹیکس پالیسی ءِ کارگس سرجمی ءَ کار کنگ ءَ انت ءُ ایڈوائزری کونسل جوڑ کنگ بوھگ ءَ انت ایشی ءِ تہ ءَ اکیڈمک ءُ رند ءَ پرائیویٹ سیکٹر ءِ نمائندگ ھوار بنت۔ وزیر خزانہ ءَ گوشت کہ نوں سال ءِ تہ ءَ ایوک ءَ یک رندے برجم دارگ بوتگیں بجٹ ءِ مشورہ ءِ بدل ءَ سرجمیں سال ءَ چیمبر ءُ شعبہ جاتی ادارگ آنی گوما برجاھیں رابطہ برجم دارگ بیت، ایشی ءَ چہ پالیسی سازی ءَ را گیش پٹ ءُ پول ءُ ثبوت آنی بنیات ءَ جوڑ کنگ بیت۔ وزیر ءِ ھزانگ ءَ گوشت کہ حکومتی ادارگ ءُ وفاقی حکومت ءِ نوکیں جوڑیشت ءِ عمل ءَ مزنیں پیشرفت بوتگ۔ نیم وفاقی وزارت ءُ ماتحت ادارہانی سرا رائٹ سائزنگ ءِ چیر دستی ءَ پٹ ءُ پول کنگ بوتگ۔ آئی ءَ گوشت کہ 54 ہزار ھالیگیں پوسٹ آنی ھلاسی ءَ چہ سالی 56 ارب کلدار بچت بیت، وھدیکہ بازیں وزارت ءُ محکمہ آناں یکجا کنگ یا بند کنگ ءِ عمل ھم جاری انت۔ آئی ءَ من اِت کہ اے عمل ءِ تہ ءَ انسانی وسیلگ، کانود ءُ مالی ذمہ واری آنی سبب ءَ پیچیدگی است اَنت بلے حکومت سیاسی ءُ ادارگی چیلنج آنی باوجود اے اصلاحات آناں دیم ءَ برگ ءِ واستہ جزم اِنت۔ آئی ءَ مزن وزیر ءِ ذاتی نگرانی ءِ چیر دستی ءَ ڈیجیٹل پاکستان ءَ را کلیدی ترجیح ءِ رنگ ءَ گوشت کہ ایشی ءِ تہ ءَ ڈیجیٹل ادائیگی، ڈیجیٹل پبلک انفراسٹرکچر ءُ حکومتی ادائیگی ءِ ڈیجیٹلائزیشن ھوار انت۔ وزیر خزانہ ءَ اے گپ ءِ سر ءَ زور پر دات کہ پاکستان ءَ را نقد ءِ سر ءَ بنیات ءِ معیشت ءَ چہ کاگدی بنیات ءِ سر ءَ بنیات ءِ تہ ءَ بدل کنگ المی اِنت ءُ ایشی ءِ واستہ مرچنٹ ڈیجیٹلائزیشن، مالیاتی شمولیت، ءُ سرکاری کارروائی آنی تہ ءَ ٹیکنالوجی ءِ کارمردی ءِ واستہ ھاسیں ٹارگٹ ایر کنگ بوتگ۔ سینیٹر محمد اورنگزیب ءَ قرضہ ءِ انتظام ءِ تہا گہتری ءَ را یک دگہ مزنیں سوبمندی لیک اتگ۔ آئی ءَ گوشت کہ ڈیبٹ مینجمنٹ آفس ءَ را میاں اوستمانی تک ءِ رد ءَ نوک کنگ بوھگ ءَ اِنت ءُ اصلاحات ءِ آسر ءَ پاکستان ءِ ڈیبٹ ءِ اوسط میچورٹی چارسال ءَ سر بوتگ ایشی ءَ چہ ری فنانسنگ ءِ رسک کم بوتگ ءُ ڈیبٹ ءِ سرجمیں ھرچ ءُ درچ ھم کم بوتگ۔ آئی ءَ گوشت کہ نوکیں شراکت داری پنشن اسکیم جولائی 2024 ءَ چہ عمل کنگ بوتگ، ایشی ءِ تہ ءَ 9ہزار ءَ چہ گیش سرکاری ملازم ھوار کنگ بوتگ اَنت، وھدیکہ پنشن ءِ سر ءَ مالی دباؤ ءَ را کم کنگ ءِ واستہ پیرامیٹرک اصلاحات ھم کنگ بوتگ اَنت۔ آیوکیں اولویت آنی بابت ءَ گوشت کہ وزیر ءِ ھزانگ ءَ گوشت کہ 11می این ایف سی ایوارڈ ءِ اولی دیوان 4دسمبر ءَ برجم دارگ بیت ءُ اے اُمیت ءِ درشان کت کہ راجی مالیاتی کمپیکٹ ءِ روح ءِ رد ءَ صوبگ آنی گوما جوڑیشت ءِ ھواری برجاہ بیت۔ آئی ءَ گوشت کہ پاکستان ھم وتی اولی پانڈا بانڈ ءِ جاری کنگ ءِ نیمگ ءَ روگ ءَ انت امیت انت کہ چینی نوکیں سال ءَ چہ پیسر اے ممکن بیت۔ وزیر خزانہ ءَ اے گپ ءِ ھم پدرائی کت کہ ڈیجیٹل ءُ کریپٹو معیشت ءِ واستہ پاکستان ءِ ریگولیٹری فریم ورک سرجمی ءِ نزیک ءَ اِنت ءُ کریپٹو ءَ گوں سیادی داروکیں کار آناں باقاعدہ ءُ موثر نگرانی ءِ چیر دستی ءَ آرگ ءِ واستہ پاکستان ورچوئل اثاثہ ریگولیٹری اتھارٹی ءِ عملی جوڑ کنگ ءِ کار جاری اِنت۔ وزیر ءِ ھزانگ ءَ پاکستان بزنس کونسل ءِ توسیپ کت کہ آئی ءَ یک سرجمیں پروگرام پیش کتگ کہ ایشی ءِ تہ ءَ ترندیں اقتصادی اولیت آنی ھوار پاکستان ءِ دراجیں مدتی ڈھانچہ ءُ وجودی چیلنج چوشکہ آبادی ءِ زور ءُ موسمیاتی بدلی ءِ سر ءَ ھوار اِنت۔ آئی ءَ گوشت کہ پالیسی ءِ سفارش آنی تیاری ءِ واستہ حقیقت پسند ءُ پٹ ءُ پول ءِ سر ءَ بنیات ءِ سر ءَ تجزیہ سک باز المی اِنت۔ جست ءُ پرس ءِ دیوان ءِ ساھت ءَ وزیر ءِ ھزانگ ءَ پاکستان ءِ دیمروئی ءِ رھبند ءِ سر ءَ تران کنان ءَ گوشت کہ گوستگیں سیلاب آنی باوجود اے سال ءَ پاکستان ءِ دیمروئی ءِ شرح 3.5درسد ءِ نزیک ءَ بوھگ ءِ گمان اِنت۔ آئی ءَ آیوکیں دو ءُ سئے سال آنی واستہ 4درسد ءِ نزیک ءَ ءُ میاں اوستمانی مدت ءَ 6 ءَ چہ 7درسد ءِ دیمروئی ءِ پیش گوئی کتگ بشرطیکہ زراعت، صنعت ءُ سروسز ءِ شوبگ مھکم بہ بنت۔ آئی ءَ زرّ ءِ دیم دیگ ءُ درائیں آمدنی ءِ سر ءَ ھم زور پر دات ءُ گوشت کہ رسمی چینل آنی وسیلگ ءَ ماہانہ زرّ ءِ دیم دیگ ءِ تہ ءَ استحکام بوتگ، روشن ڈیجیٹل اکاؤنٹ ءِ کارکردگی مھکم اِنت، ءُ ادارگی سرمایہ کاری ءَ را گہتری اتکگ۔ ٹیکس ءِ بوجھ، توانائی ءِ ھرچ ءُ درچ ءُرامہنگی فنانسنگ ءِ ھوالگ ءَ جیڈھ آنی سر ءَ تران کنان ءَ سینیٹر محمد اورنگزیب ءَ گوشت کہ حکومت صنعت ءِ جیڈھ آناں سرجمی ءَ سرپد اِنت۔ آئی ءَ گوشت کہ مالیاتی جاور ھال آنی تہ ءَ گہتری ءَ چہ فنانسنگ ءِ ھرچ ءُ درچ کم بنت بلے ھمے وھد ءَ کارپوریٹ آناں پنت ءُ شون کت کہ آ بینک ءِ وام ءَ چہ دیم ءَ بہ رو اَنت ءُ سرمایہ کاری مارکیٹ آنی نیمگ ءَ چہ دراجیں مدتی ءُ مقابلہ ءِ سرمایہ کاری ءِ موہ آنی شوھاز ءَ بہ کن اَنت۔ آئی ءَ ٹیکس ءُ توانائی ءِ شوبگ آنی تہ ءَ ڈھانچہ ءِ جیڈھ آناں گیواری ءِ واستہ حکومت ءِ عزم ءِ سر ءَ زور پر دات ءُ گوشت کہ انوگیں ٹیرف ایڈجسٹمنٹ ءِ اثر آنی سر ءَ نزیکی ءَ گوں چار ءُ تپاسی ءِ واستہ یک جائزہ ءِ میکانزم ءِ جاہ ءَ اِنت۔ سرمایہ کاری ءِ موسم ءُ ایمنی ءِ ھوالگ ءَ درملکی سرمایہ کار آنی جست ءُ پرس ءِ سر ءَ وزیر ءِ ھزانگ ءَ گوشت کہ راجی ایمنی ءِ سر ءَ ھچ وڑیں سوگند بوت نہ کنت ءُ ایمنی، میکرو اکنامک استحکام ءُ منافع ءِ واپسی ءِ وڑیں بنیاتی جیڈھ بنیاتی لوٹ اَنت کہ ایشی ءِ ھست نہ بوھگ ءَ پاکستان نہ جھان ءِ سرمایہ کاری ءَ را وتی نیمگ ءَ رازیگ کنت ءُ نہ کہ ایشی ءَ را برجاہ دار ایت۔ آئی ءَ دل یکیمی دات کہ حکومت پالیسی ءِ گامگیج آنی سر ءَ غیر جانبدار ءُ شفافیں رنگ ءَ چار ءُ تپاسی ءَ برجاہ دار ایت ءُ کاروباری براتی ءِ رائے ءِ واستہ مدام پچ بیت۔ سینیٹر محمد اورنگزیب ءَ گپ ءِ آسر ءَ پاکستان ءَ را پائیدار اقتصادی بحالی ءُ دراجیں مدتی دیمروئی ءِ راہ ءَ دارگ ءِ واستہ حکومت ءِ شواہد ءِ سر ءَ بنیات ءِ سر ءَ پالیسی جوڑ کنگ ، نجی شعبہ ءِ گوما شریکداری ءُ ناقابل واپسی اصلاحات ءِ برجاہ دارگ ءِ عزم ءِ دوبر پدر کنگ ءَ گوں گڈسرا کت۔