پاکستان ءُ بحرین ءِ نیام ءَ دو نیمگی تجارت ءَ را سئے سال ءِ تہ ءَ یک ارب ڈالر ءَ سر کنگ بیت، مزن وزیر شہباز شریف ءَ بحرین ءِ ولی عہد، بحرین ءِ سلاہ بندیں اُرد ءِ ڈپٹی سپریم کمانڈر ءُ مزن وزیر شہزادہ سلمان بن حمد الخلیفہ ءِ گوما گپ ءُ تران

منامہ۔26نومبر  (اے پی پی):مزن وزیر شہباز شریف ءَ بحرین ءِ سرمایہ کار آناں فوڈ سیکیورٹی، آئی ٹی، جوڑیشت، کان کنی ءُ معدنیات، جان سلامتی، قابل تجدید توانائی ءُ سیل ءُ سواد ءَ ھوار جتا جتائیں شوبگ آنی تہ ءَ سرمایہ کاری ءِ دعوت دیان ءَ گوشت کہ سئے سال ءِ تہ ءَ دو نیمگی تجارت ءِ کساس ءَ را 550 ملین ڈالر ءَ چہ یک ارب ڈالر ءَ گیش کنگ بیت۔ آئی ءَ اے ھیالانی درشانی چار شمبے ءِ روچ ءَ بحرین ءِ ولی عہد، بحرین ءِ سلاہ بندیں اُرد ءِ ڈپٹی سپریم کمانڈر ءُ مزن وزیر شہزادہ سلمان بن حمد الخلیفہ ءَ گوں تران کنان ءَ کت اَنت۔ وھدے مزن وزیر شہباز شریف گند ءُ نند ءِ واستہ منامہ ءَ قدس پیلس ءَ سر بوت گڈا آئی ءَ را شاندار گارڈ آف آنر پیش کنگ بوت۔ مزن وزیر ءَ گرمیں وش اتک ءِ پد ءَ شہزادہ سلمان بن حمد الخلیفہ ءِ شگر ءُ منت گپت ءُ دو نیمگی سیادی ءَ را مھکم کنگ ءِ واستہ بحرین ءِ سروکی ءِ کرد ءَ را ساڑات۔ مزن وزیر ءَ بحرین ءَ را 2سال ءِ مدت (2026-2027) ءِ واستہ اقوام متحدہ ءِ سلامتی کونسل ءِ غیر دائمی باسک ءِ رنگ ءَ گچین بوھگ ءِ سر ءَ مبارک بات دات ءُ اے وھد ءِ تہ ءَ وت مہ وتی کمک ءَ را گیش مھکم کنگ ءِ واستہ پاکستان ءِ جزم ءِ درشان کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ اقتصادی کمک ءِ بابت ءَ گند ءُ نند ءِ بنجاہی بوتگ۔ مزن وزیر ءَ دو نیمگی تجارت ءَ را گیش کنگ ءِ امکانات آنی سر ءَ زور پر دات کہ اے وھد ءَ 550ملین ڈالر ءَ چہ گیش اِنت۔ مزن وزیر ءَ گوشت کہ سئے سال آنی تہ ءَ پاکستان ءُ بحرین ءِ نیام ءَ دو نیمگی تجارت یک ارب ڈالر ءَ سر کنگ بیت۔ اے ٹارگٹ پاکستان ءُ جی سی سی ءِ آزاد تجارتی معاہدے ءِ وسیلگ ءَ سرجم کنگ بیت کہ آ وتی گڈی پڑ ءَ انت ءُ ویزا ءِ لوٹ آنی تہ ءَ انوگیں نرمی ءِ وڑیں گامگیج آنی وسیلگ ءَ سرجم کنگ بیت۔ آئی ءَ بحرین ءِ سرمایہ کار آناں فوڈ سیکیورٹی، آئی ٹی، تعمیر، کان کنی ءُ معدنیات، جان سلامتی، قابل تجدید توانائی ءُ سیل ءُ سواد ءِ پڑ ءَ موہ آناں پٹ ءُ پول کنگ ءِ دعوت دات۔ آئی ءَ کراچی/گوادر ءُ خلیفہ بن سلمان پورٹ ءِ نیام ءَ پورٹ ٹو پورٹ کنکٹیویٹی ءَ را گیش کنگ ءِ تجویز ھم پیش کتگ۔ مزن وزیر ءَ یک لکھ لکھ لکھ ءَ چہ گیش پاکستانی کمیونٹی ءِ واستہ بحرین ءِ کمک ءِ منگ ءُ گیش ہنرمندیں مردمی قوت ءِ پجارینگ ءِ واستہ پاکستان ءِ عزم ءِ پدا پدر کت۔ آئی ءَ ہائیر ایجوکیشن، ٹیکنیکل ٹریننگ ءُ ڈیجیٹل گورننس ءِ تہ ءَ گیشیں کمک ءِ وش اتک کت۔ مزن وزیر ءَ بحرین ءِ ھم شگر ءُ منت گپت کہ آ اسلام آباد ءَ کنگ حمد یونیورسٹی ءِ جوڑ کنگ ءُ پاکستانی شہری آناں یلہ کنگ ءُ وطن واتر کنگ ءَ آسراتی داتگ۔ گند ءُ نند ءَ دفاعی ءُ سیکورٹی کمک ءِ بابت ءَ ھم گپ ءُ تران بوتگ ۔ دوئیں نیمگ ءَ تربیت، سائبر سیکورٹی، دفاعی پیداوار ءُ زانتکاری ءِ تبادلہ ءِ ھوالگ ءَ کمک ءَ را گیش وسعت دیگ ءِ سر ءَ تپاک کنگ بوتگ۔ دوئیں رہشوناں غزہ ءِ گوستگیں دیمروئی آنی سر ءَ گپ ءُ تران کت ءُ اے گپ ءِ سر ءَ تپاک کت کہ امن ءُ ایمنی ءِ برجائی غزہ ءِ الس ءِ واستہ سک باز وش آتک انت کہ آ دہائیاں چہ زحمت ءِ آماچ انت کہ غزہ ءِ الس بازیں وھد ءَ چہ ایشی ءِ ودار ءَ انت۔ دیوان ءِ آسر ءَ اے دل یکیمی بوت کہ گپ ءُ تران ءَ چہ ٹھوس آسراتی رس ایت ءُ اسٹریٹجک، اقتصادی، سیکورٹی ءُ الس ءِ نیام ءَ سیادی ءَ را گیش برز کنگ بیت۔