بنجائی وزیر ڈاکٹر مصدق ملک نا ڈی جی پاکستان میری ٹائم سیکورٹی ایجنسی تون اوڑدہی

اسلام آباد۔ 26 نومبر (اے پی پی) بنجائی وزیر موسمیاتی بدلی و چاگڑد نا رکھ ڈاکٹر مصدق ملک  پاکستان  میری ٹائم سیکورٹی ایجنسی (پی ایم ایس اے) نا ڈائریکٹر جنرل ریئر ایڈمرل شہزاد اقبال تون اوڑدہی کرے ہراٹی سمندری کچٹی نا توننگ، بحری چاگڑد نا رکھ و کرکی علاقہ غاتا سوگوی نا بابت تین پہ تینی کمکاری ءِ پین سوگو کننگ آ گپ وتران مس۔ چارشنبے نادے آ وزارت موسمیاتی بدلی و چاگڑدی رکھ انا کنڈآن جاری بیان نا رداٹ ریئر ایڈمرل شہزاد اقبال بنجائی وزیر ءِ پی ایم ایس اے نا برجاگام گیج آتیا حوال تس ہرافتے ٹی ویسل مانیٹرنگ سسٹم کون آ اہم ڈٹ آک اوار ءُ ہر ابحری چاروکی و پائیدار ماہی گیری نا انتظام ءِ گچین کننگ اٹ کمکار ءِ۔ اوپی ایم ایس اے نا بنداوی فرض آتے ہم مون آتخا ہرافتے ٹی غیرکانودی ماہی گیری نا توننگ، سرچ اینڈ ریسکیو آپریشن، بین الوزارتی رابطہ کاری، بحری سیم تا چاروکی و پاکستان نا ثانوی بحری فور س انا وڑاٹ خذمت آک اوار ءُ۔ ڈائریکٹر جنرل بنجائی وزیر ءِ 9آن 11 دسمبر سلاہ ئی مشق باراکوڈاٹی بشخ ہلنگ نا سلہ خلک۔ ہرا تیل انا رسینگ تون مون تننگ، سمندری کچٹی نا بست وبند و سمندر اٹی سرچ اینڈ ریسکیو نا قومی لائخی تیٹی ودکی کن بے کچ اہم تصور کننگک ۔ اوڑدہی ٹی سمندر اٹی کچرہ نا ڈمپنگ نا ودوک آ ویل و اونا سمندری حیات، ماہی گیری و پاکستان نا برآمدی بشخ آ سنگین اثرآتیا سرجمی اٹ گپ و تران مس۔ داوخت آ بنجائی وزیر ڈاکٹر مصدق ملک پاکستان نا سمندر آتا رکھ، چاگڑدی سیکورٹی نا سوگوی و موسمیاتی رداٹ سوگو سمندری نظم و نسق نا مون آدننگ کن پی ایم ایس اے تون خڑکی کمکاری ءِ برجاتخنگ نا عزم انا درشانی ءِ کرے۔ ڈاکٹر مصدق ملک پاکستان نا بحری دنگ انا رکھ اٹی پی ایم ایس اے نا کڑد انا ستاءِ کرسا داہیت آ زور شاغا کہ بنجائی ادارہ غاتا نیام اٹ مربوط کوشست ہی سمندری وسیلہ غاتا مریس مدی رکھ وپائیداری ءِ پک کننگ کیک۔