زالبول آتے واکدار کننگ کن ملازمت آتیٹی 33 درسد کوٹہ، پی ایم یوتھ پروگرام نا رداٹ آسان شڑت آتیا وام انا فراوانی تون اوار ایلو گام گیج آتے کننگ انگ ءِ، چیئرمین پی ایم وائے پی رانا مشہود احمد خان

اسلام آباد۔ 26 نومبر (اے پی پی) چیئرمین وزیراعظم یوتھ پروگرام (پی ایم وائے پی) رانا مشہود احمد خان پارینے کہ زالبول آتے واکدار کننگ کن ملازمت آتیٹی 33 درسد کوٹہ، پی ایم یوتھ پروگرام نا رداٹ آسان شڑت آتیا وام تا فراوانی تون اوار پین گام گیج کننگ اُن، وزیراعظم نا وژن میرٹ و شفافیت ءِ ہرانا رداٹ ورناتے سائنس و ٹیکنالوجی و آئی ٹی تون اوار ایلو بشخ آتیٹی مون آ ہِننگ نا وارخواہی فراوان کننگ اُن۔ داخیال آتا درشانی ءِ او چارشنبے نادے آ انٹرپرینیور شپ کانفرنس آن تران کرساکرے۔ اوپارے کہ مستین اٹی ورناتے گوجالنگا، میرٹ آن ٹیلنٹ پاش مرسا مون آ بریک، ننے پنجاب اٹی ورناتے آسراتی فراوان کننگ آ گمر ءِ۔ اوپارے کہ 1997 ٹی پنجاب اٹی بوٹی مافیا نا چٹفنگ و میرٹ ءِ مون آ دننگا، پنجاب اٹی نیزگار آتا چناک بڑزکو تعلیم دوئی کریر و تعلیمی بشخ آتیٹی نمان ہند اس دوئی کریر۔ اونا پاننگ ئس کہ پی ایم یوتھ پروگرام نا رداٹ ورناتے میرٹ و شفافیت نا کمک اٹ بریبر وارخواہی فراوان کننگ انگ ءِ ، سائنس و ٹیکنالوجی ، دودوربیدہ، آئی ٹی و گوازی تتون اوار غٹ بشخ آتیٹی لائخ آ ورناک مون آ بننگ ءُ۔ اوپارے کہ وزیراعظم محمد شہباز شریف نا وژن میرٹ و بیرہ میرٹ ءِ۔ رانا مشہود احمد خان پارے کہ پنجاب اٹی زالبول آتے میراتی بشخ انا فراوانی ءِ پک کرین، زالبول آتیکن ملازمت آتیٹی 33 درسد بشخ جتا کننگا، زالبول آتا وزیراعظم یوتھ پروگرام نا وام اسکیم اٹی کوٹہ 25 درسد ءِ، زالبول آتے بے سود و آسان شڑت آتیا وام تننگ انگ ءِ۔