بنجائی وزیر مواصلات عبدالعلیم خان نا ساف، گچین و سوگو نظامِ نقل و حمل نا ٹہیفنگ نا عزم انا پوسکنی

اسلام آباد۔ 26 نومبر (اے پی پی) بنجائی وزیر مواصلات، عبدالعلیم خان ساف، گچین و سوگو نظامِ نقل و حمل نا ٹہیفنگ نا عزم انا پوسکنی ءِ کرسا پارینے کہ شاہراہ تا نیٹ ورک ءِ گچین ڈیزین، و موسمیاتی بدلی تا مقابل سوگو انفراسٹرکچر فراوان کننگ اُن، گرین موبلیٹی نا مون آ دننگ و ٹرانسپورٹ آپریشن تا چاگڑدی اثرآتیٹی کمتی اتنگ آ کاریم کننگ اُن۔ وزارت مواصلات آن چارشنبے نادے آ جاری بیان نا رداٹ جہانی یوم پائیدار ٹرانسپورٹ نا وخت آ تینا کلہو اٹی اوپارے کہ داوخت آ نن ساف، گچین و سوگو نظامِ نقل و حمل نا ٹہیفنگ نا عزم انا پوسکنی ءِ کینہ، سڑک و شاہراک بیرہ ہن وبرنا کسر آک افس بلکن پائیدار شونداری نا محرک ءُ، وزارت مواصلات، نیشنل ہائی وے اتھارٹی نا کمک اٹ قومی شاہراہ تا نیٹ ورک ءِ آب اٹ جوڑ کننگ کن کوشست کننگ ءِ۔ اوپارے کہ شاہراہ تا نیٹ ورک ءِ گچین ڈیزین و موسمیاتی بدلی تا مقابل سوگو انفراسٹرکچر فراوان کننگ اُن، ننا چکار توانائی ءِ گچین وڑاٹ کاریم اٹ اتوک آ شاہراہ تا تفنگ آٹی ءِ، گرین موبیلیٹی نا مون  آ دننگ و ٹرانسپورٹ آپریشن نا چاگڑدی اثرآتیٹی کمتی اتنگ آ کاریم کننگ اُن۔ عبدالعلیم خان پارے کہ علاقائی شریدار آتیکن رکھوک، ترند و قابل اعتماد رابطہ غاتے پک کننگ آ کاریم کننگ اُن، منہ دے مست 24 می وزارتی کاریک کانفرنس نا وخت آپاکستان ’’گرین و ڈیجیٹل کاریک‘‘ نا وژن ءِ مون آ دننگ نا عزم انا درشانی ءِ کرے، کانفرنس اٹی پائیدار راہداری، اسمارٹ ٹرانسپورٹ و ڈیجیٹل وڑاٹ فعال انفراسٹرکچر نا دمدستی گرج آ زور شاغنگا۔