پاک فوج، انٹیلی جنس و کانود نافذ کروک آ ادارہ غاک قومی سلامتی نا رکھ اکن بدل مفروک عزم و کسبی مہارت نا درشانی ءِ کننگ ءُ، فیلڈ مارشل سید عاصم منیر نا قومی سلامتی ورکشاپ نا بشخ ہلوک آتون گپ وتران

راولپنڈی۔ 26 نومبر (اے پی پی) آرمی چیف فیلڈ مارشل سید عاصم منیر پارینے کہ پاک فوج، انٹیلی جنس و کانود نافذ کروک آ ادارہ غاک قومی سلامتی نا رکھ اکن بدل مفروک عزم و کسبی مہارت نا درشانیءِ کننگ ءُ۔ آئی ایس پی آر نا رداٹ او چارشنبے نادے آ قومی سلامتی ورکشاپ (این ایس ڈبلیو 27) نا بشخ ہلوک آتیان گپ وتران کریکہ ہرا چارشنبے نادے آ پاک فوج انا جنرل ہیڈکوارٹرز (جی ایچ کیو) نا دورہ ءِ کرے۔ داوخت آ اودے پاکستان نا علاقائی و داخلی سیکورٹی حالیت و جم قومی سلامتی نا چاگڑد آ سرجمی اٹ حوال تننگا۔ دورہ ٹی ڈل آرمی چیف فیلڈ مارشل سید عاصم منیر تون ہم سرجمی اٹ اوڑدہی کرے۔ آرمی چیف ڈیہہ انا بدل مروک حالیت آتے مون آ تخسا پارے کہ ودوک آ جغرافیائی سیاسی مسابقت، سیم آن ایپاردہشت گردی و ہائبرڈ خطرہ غاک علاقائی چاگڑد ءِ پیچیدہ کرینے۔ اوپارے کہ پیشن نا سرپرستی ٹی برجا دہشت گردی و اطلاعاتی جنگ کون آ چیلنج آتیان پد ہم پاک فوج ، انٹیلی جنس ادارہ و کانود نافذ کروک آ ادارہ غاک قومی سلامتی نا رکھ اکن بدل مفروک عزم و کسبی مہارت نا درشانی ءِ کننگ ءُ۔ فیلڈ مارشل سید عاصم منیر پارے کہ پاکستان اسہ اہم و باوقار ءُ ملک اسے و تینا روا ہند ءِ دوئی کننگ کن سنبرینگوک ءِ۔ اوپارے کہ معرکہ حق اٹی پاکستان نا فوج انا کسبی لائخی، عزم و کمٹمنٹ مچ آ دنیا ٹی پاکستان نا ساکھ ءِ پین سوگو کرینے۔ اونا پاننگ ئس کہ ننا غٹ آن بھلا واک قومی یکجہتی ءِ و نن غٹ اواری اٹ دشمن نا ناپاک عزم ءِ بے سہب کینہ۔ داوخت آ بشخ ہلوک آتے ملک اٹی غیرکانودی سرجزآتا برخلاف برجاگام گیج، خاص کر اسمگلنگ ، منشیات نا ترسیل و منظم ڈوہ انا نیٹ ورک آتا برخلاف کارروائی تیا ہم حوال تننگا۔ دیوان اٹی سیمی کنٹرول ءِ پین گچین کننگ و غیرکانودی درملکی تا پدی ہِننگ نا بابت تازہ حالیت آتیان ہم معلومدار کننگا ، ہرانا مسخت داخلی نظم و ضبط و قومی فائدہ غاتا رکھ ءِ۔ آرمی چیف دوٹوک لوز آتیٹی پارے کہ ہرپاکستانی شاری نا سلامتی، رکھ و ملکی سیم تا دفاع پاک فوج انا اولیت ءِ و اوڑآ ہچ ءُ سمجھوتہ اس کننگپک۔ اوداعزم انا درشانی ءِ کرے کہ پاک فوج، بنجائی و صوبائی حکومت آتا پورو کمکاری ءِ برجاتخک۔ اوپارے کہ پائیدار امن، سوگوی و شونہالی کن قومی کہول آ ہم گرنچی و ادارہ جاتی کمکاری المی ءِ۔ یات سلے کہ ’’نیشنل سیکورٹی ورکشاپ۔ 27‘‘ نیشنل ڈیفنس یونیورسٹی (NDU)نا اسہ نمان پروگرام اسے، ہراٹی پارلیمنٹ نا باسک،سینئر سول و عسکری آفیسر، تعلیمی چاہندار و سول سوسائٹی نا نمائندہ غاک شریک مریرہ۔