بنجائی وزیر داخلہ محسن نقوی نا سعودی وزیر گوازی شہزادہ عبدالعزیز بن ترکی الفیصل تون اوڑدہی، تین پہ تینی کمکاری ءِ ودفنگ آ امنا

ریاض۔ 26 نومبر (اے پی پی) بنجائی وزیر داخلہ و انسداد منشیات و چیئرمین پاکستان کرکٹ بورڈ (پی سی بی ) محسن نقوی ریاض اٹی سعودی عرب نا وزیر گوازی شہزادہ عبدالعزیز بن ترکی الفیصل تون اہم اوڑدہی کرے، ہراٹی سعودی عرب اٹی کرکٹ نا مون آ دننگ، ورناتا گوازی نا کمک اٹ مثبت سرجزآتیٹی شمولیت و ہڑتوم آملک آتا نیام اٹ اسپورٹس کمکاری ءِ پین سوگو کننگ آ سرجمی اٹ گپ وتران کننگا۔ محسن نقوی پارے کہ شہزادہ عبدالعزیز بن ترکی الفیصل وژن 2030 نا رداٹ گوازی تا بشخ ءِ غیرمعمولی وڑاٹ مون آ دننگ ءِ ، و سعودی سرکڑدہ غاتا سرپرستی ٹی مملکت بھلا جہانی ٹورنامنٹ آتا مہمانداری دوئی کرسا اسہ پوسکن ءُ تاریخ اس نوشتہ کرینے۔ اوخاص کر AFCایشین کپ 2027، ایشین ونٹرگیمز 2029 ، ایشین گیمز 2034 و فیفا ورلڈ کپ 2034 نا مہمانداری نا دوئی کننگ آ سعودی وزیر گوازی ءِ مبارکبادی تس۔ اوڑدہی ٹی داہیت آہم سجفنگا کہ سعودی عرب اٹی کرکٹ نا انفراسٹرکچر نا شونداری، اسیجائی ٹریننگ پروگرام، تین پہ تینی دورہ و جونیئر ویوتھ لیول ٹورنامنٹ آتا کمک اٹ ہڑتوم آملک آتا ورناتیکن پوسکن ءُ وارخواہی ودی کننگ مریک ۔ محسن نقوی پارے کہ پاکستان و سعودی عرب گوازی، خاص کر کرکٹ ءِ سنگتی و علاقائی ہم گرنچی نا سوگو پول جوڑ کیرہ۔ اوڑدہی ٹی داہیت آہم امنا مس کہ ہڑتوم آملک آتا تعلقدار ادارہ غاک رابطہ غاتے پین ترند کیرہ و عملی ڈٹ بندی نا کمک اٹ زوت اسیجائی گام گیج آتے گڈیکو دروشم اس تننگک تانکہ ورناتے زیات آن زیات مثبت وارخواہی فراوان کننگ مرے ۔