مزن وزیر محمد شہباز شریف ءَ ایران ءِ سپریم راجی سلامتی کونسل ءِ سیکرٹری علی اردشیر لاریجانی ءَ گوں گند ءُ نند کتگ، کشت ءُ کشاری، مواصلات ءَ ھوار جتا جتائیں دوئیں نیمگ ءَ فائدگ مندیں شوبگ آنی تہ ءَ دو نیمگی سیادی آناں گیش کنگ ءِ سر ءَ تپاک

اسلام آباد۔25نومبر  (اے پی پی):پاکستان ءُ ایران ءِ نیام ءَ کشت ءُ کشاری، رابطہ کاری ءَ ھوار وت مہ وتی سیت پائدگ ءِ جتا جتائیں شوبگ آنی تہ ءَ وت مہ وتی سیادی آناں گیش کنگ ءِ سر ءَ تپاک کنگ بوتگ۔ مزن وزیر محمد شہباز شریف ءَ گوں ایران ءِ سپریم راجی سلامتی کونسل ءِ سیکرٹری علی اردشیر لاریجانی ءَ سئے شمبے ءِ روچ ءَ مزن وزیر گس ءَ گند ءُ نند کت۔ ڈاکٹر لاریجانی اے وھد ءَ پاکستان ءِ سرکاری تر ءُ تاب ءَ انت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ ایرانی مہمان ءَ را وش اتک کنگ ءِ ساھت ءَ دوئیں ملک آنی نیام ءَ راجدپتری ءُ نزیکیں براتی سیادی آنی ارزشت ءِ سر ءَ زور پر دات ءُ جتا جتائیں پڑ آنی تہ ءَ دو نیمگی سیادی ءَ را گیش مھکم ءُ گیش کنگ ءِ لوٹ کت۔ ڈاکٹر لاریجانی ءَ پاکستان ءُ ایران ءِ سیادی ءَ را گیش ءُ گیوار کنگ ءِ ضلورت ءِ سر ءَ ھم زور دات۔ گند ءُ نند ءِ ساھت ءَ دوئیں نیمگ ءَ ھاسیں دمگی ءُ میاں اوستمانی دیمروئی آنی سر ءَ ھم گپ ءُ تران کنگ بوت وھدیکہ دمگ ءَ امن ءُ ایمنی ءِ دیمروئی ءِ واستہ یکجائی کوشست آنی ارزشت ءِ سر ءَ زور پر دات۔ مزن وزیر ءَ دمگی جیڈھ آنی بابت ءَ ایران ءِ اصولی موقف ساڑاتگ ءُ مشکلیں وھد ءَ ایران ءِ گوما یکوئی کنگ ءِ پاکستان ءِ شگر ءُ منت گپتگ۔ آئی ءَ دوئیں ملک آنی واستہ امن ءُ وشھالیں آیوکیں وھد ءِ واستہ ایران ءِ گوما کار کنگ ءِ پاکستان ءِ جزم ءِ سر ءَ زور پر دات۔ ڈاکٹر لاریجانی ءَ گوستگیں 12 روچی جنگ ءِ وھد ءَ ایران ءِ بے مٹیں کمک ءِ سر ءَ پاکستانی راج ءُ سروکی ءِ منت گپت ءُ جیڈھ آنی پرامن گیواری ءِ واستہ گپ ءُ تران ءُ سفارتکاری ءِ وکالت ءِ تہ ءَ پاکستان ءِ جوڑیشت ءِ کرد ءِ ستا کرت۔ مزن وزیر ءَ ایران ءِ مزن رہشون سید علی خامنہ ای ءُ صدر مسعود پزیشکیان ءِ شرپ ءُ نیکیں واھشت آنی درشان کت ءُ پاکستان ءِ واستہ کمک ءُ پاکستان ایران ءِ سیادی ءَ را مھکم کنگ ءِ واستہ وتی جزم ءِ سر ءَ شگر ءُ منت گپت۔ گند ءُ نند ءَ اے گپ ءِ سر ءَ تپاک کنگ بوت کہ نائب مزن وزیر ءُ دری کارانی وزیر اسحاق ڈار ءِ سروکی ءَ ڈل زوت ایران ءِ تر ءُ تاب ءَ کنت تانکہ دوئیں ملک آنی نیام ءَ جتا جتائیں شوبگ آنی تہ ءَ ھاسیں رنگ ءَ کشت ءُ کشاری ءُ کنکٹیویٹی / کمیونیکیشن آنی تہ ءَ کمک ءَ را گیش دیمروئی دیگ بہ بیت۔