کتاب زانت ، پجار ءُ دائمی سوبمندی ءِ مستریں وسیلہ انت، خالد مقبول صدیقی

اسلام آباد۔25نومبر  (اے پی پی):وانگ ءُ زانگ ءُ پیشہ وارانہ تربیت ءِ وفاقی وزیر ڈاکٹر خالد مقبول صدیقی ءَ کتاب ءِ دائمی ارزشت ءِ سر ءَ زور پر دات ءُ گوشت کہ کتاب زانت، پجار ءُ دائمی سوبمندی ءِ مستریں وسیلگ اِنت۔ آئی ءَ سئے شمبے ءِ روچ ءَ لوک ورسا ءَ 25ءَ چہ 27نومبر ءَ برجم دارگ بوھوکیں 11می راجی کتاب میلہ ءِ بنگیج ءِ مراگش ءَ گوں گشتانک دیگ ءَ ات، ایشی ءِ تہ ءَ پارلیمانی سیکرٹری وزارت وانگ ءُ زانگ ءُ پیشہ وارانہ تربیت فرح ناز اکبر ءَ ھم بھر زرتگ ات۔ ڈاکٹر خالد مقبول صدیقی ءَ نودربر ، استاد ءُ شریکاں گوں دزبندی کتگ کہ کتاب وانگ ءَ وتی عادت جوڑ بہ کن انت۔ کتاب تئی پجار انت ءُ تئی پجار تئی آکبت ءَ گیش کنت۔ آئی ءَ گیش گشت کہ بے قلم ءُ کتاب ءَ پجار ءِ جوڑ کنگ گران انت۔ علم ءِ حصول ءِ مذہبی اهمیت ءِ سرا چمشانک دیان ءَ آئی ءَ گشتگ کہ اسلام ءِ اولی فرمان ”اقرا“ (بوان) اِنت۔ آئی ئَ گوشت کہ علم مومن ئِ گواچن ئِ میراث اِنت۔ آئی ءَ یات دات کہ پاکستان ءِ بُن ھشت مذھب ءِ نام ءَ ایر کنگ بوتگ، پمیشکا ما وتی زند ءَ مذھب ءِ تعلیمات ءِ رد ءَ بہ گوازین ایں ۔ آئی ءَ گوشت کہ علم ءِ مستریں شری ایش انت کہ مردم ءَ ھرچ وڑیں سیت رس ایت ھمنچو کم مارشت بیت۔ مراگش ءَ گوں گشتانک دیان ءَ پارلیمانی سیکرٹری فرح ناز اکبر ءَ ڈیجیٹل دور ءَ کتابانی میلہ ءِ ارزشت ءِ سر ءَ زور پر دات۔ آئی ءَ گوشت کہ اگاں ما ڈیجیٹل دور ءَ زند گوازینگ ءَ ایں ھاسیں رنگ ءَ چیٹ جی پی ٹی ءِ وڑیں ٹولز آنی دور ءَ بلے ما کتاب آنی گوما وتی سیادی ءَ مہ ٹُکّیں۔ آئی ءَ وتی کسانی ءِ حوالہ ءَ گشتگ کہ آ زمانگ ءَ کتاب وانگ یک عامیں دود ءُ ربیدگے بوتگ، وہدے کہ مرچیگیں دور ءَ زہگ گیشتر موبائل فون ءَ کارمرز کن انت۔ آئی ءَ گوشت کہ ٹیکنالوجی المی اِنت بلے کتاب آنی وانگ ھم ھمے رنگ ءَ المی اِنت۔ فرح ناز اکبر ءَ کتاب اسٹال آنی سر ءَ ھم تر ءُ تاب کت ءُ وتی جزم ءِ درشان کت کہ آیوکیں وھد ءَ ھم اے وڑیں کار دیم ءَ برگ بنت تانکہ ھاسیں رنگ ءَ نوکیں پدریچ ءِ تہ ءَ کتاب وانگ ءِ ھب ءُ واھگ دیم ءَ برگ بہ بیت۔