پاکستانی ورناک شاہین، اوفتا پرواز بھاز بڑز ءِ، ہنداملک انا اصل سرمایہ غاک ءُ، بنجائی وزیر پروفیسر احسن اقبال نا دود آن تران

اسلام آباد۔ 25 نومبر (اے پی پی) بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ پاکستان نا ورناک شاہین ءُ ہرافتا پرواز محدود اف بلکن بھاز بڑز ءِ، ہنداورناک ملک انا اصل سرمایہ غاک ءُ۔ اڑان پاکستان شرہ 2025 نا دود آن تران کرسا اوپارے کہ دا شرہ ملک اٹی پوسکن ءُ فکری سرکڑدہ ودی کننگ نا اہم پلیٹ فارم ءِ۔ پروفیسر احسن اقبال پارے کہ نن اسہ پوسکن ءُ فکری و اخلاقی بیداری اسے نا بنداو ءِ تخنگ اُن، اینو نا دود اٹی پاکستان نا غٹ ڈیہہ تا نمائندگی داہیت انا شاہدی ءِ کہ ورناک اسہ روشنا آخبت اسے نا ٹہیفنگ اٹی پبی کڑد ادا کننگ کن سنبرینگوک ءُ ۔ اوورناتے مخاطب کرسا پارے کہ نما نظر 2047 نا پاکستان آ بایدے مرے انتئے کہ پاکستان و اونا ہمسایہ ملک آک آجوئی نا 100سالہ جشن نا تیاری کرور۔ اونا پاننگ ئس کہ ہراوڑ قوم مستین اٹ معرکہ حق اٹی دشمن ءِ شکست تس ہندا وڑ معرکہ شونداری ٹی ہم سرسہبی دوئی کننگک۔ پروفیسر احسن اقبال پارے کہ سرسہب قومک امن، سوگوی، پالیسی نا چرجوئی و پدریسہ اصلاحات نا کمک اٹ شون ہلیرہ ، نن ورناتے ہمو علم ءِ تننگ اُن ہرا اوفتے ٹی تخلیقی لائخی ودی کے و اوفتے پوسکن ٹیکنالوجی نا دور انا خواست آتا رداٹ نالج لیڈر جوڑ کے، ورناتے علم و تخلیق نا پرواز آن استار تسکان سرکننگ ننا مسخت ءِ۔ وزیر ڈٹ بندی پارے کہ اڑان پاکستان اصل اٹ ہمو نیم تغ انا چرجوئی ءِ ہرا وژن 2025 نا رداٹ ہُننگاسس۔ اوپارے کہ پاکستان نا اسٹاک ایکسچینج ، آئی ٹی سیکٹر، برآمدات و پیشن نا زر راہی تس تون اوار ہربشخ اٹی ریکارڈ شونداری مسنے، پاکستان داسہ تاریخ نا ’’چارمیکو اڑان‘‘ کن تیار ءِ، دا اڑان ءِ پائیدار، فیصلہ کن و بڑز کننگ کن غٹ تپہ غاتے اواری اٹ کاریم کروئی مریک۔