زالبولانی وانگ ءُ زانگ، ڈیجیٹل ازمکاری ءُ معاشی وت واجہی اصل وت مستر  کنگ انت، آئی ٹی ءِ وفاقی وزیر ءِ پیغام زالبولانی سرا زوراکی ءِ ھلاسی ءِ میاں اوستمانی روچ ءِ  درگت  ءَ کلوہ

اسلام آباد۔25نومبر  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ زالبول آنی وانگ ءُ زانگ، ڈیجیٹل ازمکاری ءُ اقتصادی وت واجہی ءِ حقیقی وت مستر  کنگ انت، زالبول آنی واستہ ٹیکنالوجی ءِ دروازگ آنی پچ کنگ پاکستان ءِ ڈیجیٹل آیوکیں وھد ءِ واستہ بنیاتی ارزشت ءِ واھند انت۔ سئے شمبے ءِ روچ ءَ آئی ٹی ءُ ٹیلی کام ءِ وزارت ءِ نیمگ ءَ جاڑی بوتگیں بیان ءِ رد ءَ زالبول آنی سر ءَ زوراکی ءِ ھلاسی ءِ میاں اوستمانی روچ ءِ موہ ءَ وفاقی وزیر ءَ گوشت کہ زالبول آنی سر ءَ زوراکی نا منگ بوتگیں چاگردی ءُ انسانی ناانصافی اِنت، من پاکستان ءِ ھمک زالبول ءُ ھمک جنک ءِ گوما یکوئی ءُ کمک ءِ درشان کن آں ۔ آئی ءَ گوشت کہ زالبول آنی وانگ ءُ زانگ، ڈیجیٹل ازمکاری ءُ اقتصادی وت واجہی ءِ راستیں وت مستر  کنگ اِنت، اے سال ءِ بنگپ ”تمامیں زالبول ءُ جنک آنی سر ءَ ڈیجیٹل زوراکی ءِ ھلاسی ءِ واستہ یکجا بہ بئے“ وھد ءِ مستریں لوٹ اِنت۔ شزہ فاطمہ خواجہ ءَ گوشت کہ ڈیجیٹل اسپیس ءَ آزار ءُ اذیت، بلیک میلنگ ءُ نفرت ءِ رویہ آنی تہ ءَ گیشی ءِ واستہ ترندیں گامگیج ءِ ضلورت اِنت، ورنائیں جنک ءُ زالبول آنی واستہ ایمنیں ڈیجیٹل چاگرد مئے اولی ترجی اِنت۔ وفاقی وزیر ءَ گوشت کہ زالبول آنی واستہ ٹیکنالوجی ءِ پچ کنگ پاکستان ءِ ڈیجیٹل آیوکیں باندات ءِ واستہ بنیاتی ارزشت ءِ واھند اِنت، من ڈیجیٹل زوراکی ءِ آماچیں زالبول ءُ ایشی ءِ ھلاپ ءَ توار چست کتگیں درستیں زالبول آناں شگر ءُ منت پیش کن آں، ما زالبول آنی ھک آنی رکھینگ ءُ صنفی زوراکی ءِ سرجمی ءَ ھلاسی ءِ واستہ یکجائی، جزم ءُ مدام سرگرم باں۔