وفاقی وزیر داخلہ محسن نقوی ءَ سعودی عرب ءِ وزیر داخلہ شہزادہ عبدالعزیز بن سعود بن نائف   ءِ گوما ھاسیں گند ءُ نند کتگ، سیکورٹی کمک، روہنگیا مسلمان ءُ ھیل کاری پروگرام آنی بابت ءَ گپ ءُ تران

ریاض۔25نومبر  (اے پی پی): وفاقی تہی کارانی وزیر محسن نقوی ءَ سعودی عرب ءِ تر ءُ تاب ءِ ساھت ءَ سعودی عرب ءِ تہی کارانی وزیر شہزادہ عبدالعزیز بن سعود بن نائف   ءِ گوما ھاسیں گند ءُ نند کت، ایشی ءِ تہ ءَ دو نیمگی سیکورٹی کمک ءَ را گیش مھکم کنگ، پولیس ءُ نیم فوجی سیکورٹی ءِ نیام ءَ تربیت ءِ تبادلہ ءِ پروگرام آنی سر ءَ سرجمیں گپ ءُ تران کنگ بوت۔ گند ءُ نند ءَ برمی (روہنگیا) مسلمان آنی قانونی بستار ءِ دیریں جیڈھ ءِ گیواری ءِ سر ءَ ھم گپ ءُ تران کنگ بوت۔ سعودی عرب ءِ تہی کارانی وزیر ءَ وفاقی تہی کارانی وزیر محسن نقوی ءِ منت گپت کہ آئی ءَ اے ھاسیں انسانی جیڈھ ءِ سر ءَ چمشانک داتگ ءُ ایشی ءِ گیواری ءِ واستہ آئی ءِ کوشست کتگ۔ اے موہ ءِ سر ءَ سعودی تہی کارانی وزیر ءَ فیڈرل کانسٹیبلری ءِ بنجاہی کارگس ءِ سر ءَ اُرش ءَ شھید بوتگیں کارندہ آنی ھاندان ءِ گوما ھم دلپدردی ءِ درشانی کتگ۔ آیوکیں ماہ ءَ دوئیں ملکانی نیام ءَ وزارت ءِ تہی کارانی ورکنگ گروپ ءِ دیوان ءِ برجم دارگ ءِ ھم پیسلہ کنگ بوتگ۔ محسن نقوی ءَ گوشت کہ سعودی عرب ھمک پاکستانی ءِ دومی گس انت ءُ مارا سعودی عرب ءِ گوما وتی دیریں، مھکمیں ءُ برجمیں سیادی آنی سر ءَ پھر انت ۔ گند ءُ نند ءَ وفاقی داخلہ ءِ سیکرٹری محمد خرم آغا، پاکستانی سفیر احمد فاروق، کمانڈنٹ وفاقی کانسٹیبلری نذیر گڈا، کمانڈنٹ نیشنل پولیس اکیڈمی محمد ادریس ءُ سعودی وزارت داخلہ ءِ مزنیں کارندہ آں ھم بہر زرتگ۔