زالبول آتیا بیدادی انسانی حق انا سنگین خلاف ورزی ءِ، چیئرپرسن بے نظیر انکم سپورٹ پروگرام سینیٹر روبینہ خالد نا زالبول آتا برخلاف بیدادی نا جہانی دے آ کلہو

اسلام آباد۔ 25 نومبر (اے پی پی) چیئرپرسن بے نظیر انکم سپورٹ پروگرام سینیٹر روبینہ خالد پارینے کہ زالبول آتیا بیدادی انسانی حق انا سنگین خلاف ورزی ءِ، بیدادی آن پاک راج ننا اجتماعی زمواری ءِ۔ زالبول آتا برخلاف بیدادی نا جہانی دے آ تینا خصوصی کلہو اٹی سینیٹر روبینہ خالد پارے کہ زالبول آتے واکدار کننگ آن بیدس شونداری نا تغ ممکن اف۔ اوپارے کہ بی آئی ایس پی زالبول آتا رکھ و واکداری تیکن سرگرم ءِ، بیدادی نا ہرواقعہ  ءِ منپنہ ڈوہدار تے بایدے سخت سزا ملے۔ سینیٹر روبینہ خالد پارے کہ زالبول آتا تعلیم ، روزگار و رکھ حکومت نا اولیت ءِ، زالبول آتا بنداوی حق انا رکھ اکن پالیسی تے پین گچین جوڑ کننگ اُن ، بیدادی نا برخلاف توار بڑز کننگ ننا غٹ انا راجی و اخلاقی فرض ءِ۔ اوپارے کہ زہمی زالبول آتیکن کمکاری و کانودی کمک نا دنگ ءِ پین ودفنگک، زالبول آتیا بیدادی نا چٹفنگ کن نرینہ غاتا شمولیت ہم المی ءِ۔ اوپارے کہ نن ہندن ءُ پاکستان اس جوڑ کینہ ہراڑے ہر نیاڑی شرف، آجوئی و رکھ اتون زند ءِ تیر کننگ کے۔