جناح میڈیکل کمپلیکس ءِ منصوبگ نہ ایوک ءَ پاکستان ءَ بلکینگ ءَ سرجمیں دمگ ءَ جان سلامتی ءِ شوبگ ءِ واستہ یک مثالی منصوبگ ءِ بیت، مزن وزیر شہباز شریف جناح میڈیکل کمپلیکس بورڈ ءِ دیوان ءَ گوں تران

اسلام آباد۔24نومبر  (اے پی پی): مزن وزیر محمد شہباز شریف ءَ گوشت کہ جناح میڈیکل کمپلیکس منصوبگ نہ ایوک ءَ پاکستان ءَ بلکینگ ءَ سرجمیں دمگ ءَ جان سلامتی ءِ شوبگ ءِ واستہ یک مثالی منصوبگ ءِ بیت۔ دو شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی جناح میڈیکل کمپلیکس ءِ بورڈ ءِ دیوان ءِ سروکی ءَ کنان ءَ کت۔ گند ءُ نند ءَ بورڈ ءِ باسک ءُ سیادی داروکیں ادارگ آنی مزنیں افسر ھم ساڑی اتنت۔ مزن وزیر ءَ گوشت کہ مئے درست آنی یکجائی کوشست ءَ گوں جناح میڈیکل کمپلیکس زوت سرجم کنگ بیت۔ اے منصوبگ نا ایوک ءَ پاکستان ءَ بلکینگ ءَ سرجمیں دمگ ءَ جان سلامتی ءِ شوبگ ءِ واستہ مثالی منصوبگ ءِ بیت ۔ مزن وزیر ءَ جناح میڈیکل کمپلیکس ءِ جوڑیشت ءِ جتاجتائیں تک آنی تہ ءَ ٹیکنیکل کمک ءِ پُجاری کنگ ءِ پد ءَ آغا خان فاؤنڈیشن ءِ منت واری ءِ درشان کت۔ مزن وزیر ءَ ہدایت کت کہ جناح میڈیکل کمپلیکس ءِ توامیں تجویز کتگیں علاج مراگش آنی سر ءَ کار ترند کنگ بہ بیت۔ گند ءُ نند ءِ تہ جے ایم سی ءِ بورڈ ءَ جناح میڈیکل کمپلیکس منصوبگ ءِ جوڑیشت ءِ توامیں تک ءُ پھنات آنی تہ ءَ مدام کمک ءُ رہشونی کنگ ءِ پد ءَ مزن وزیر ءِ شگر ءُ منت گپت۔ دیوان ءَ گوشگ بوت کہ جناح میڈیکل کمپلیکس ءَ نہ ایوک ءَ طبی آسراتی بلکینگ ءَ میاں اوستمانی معیار ءِ طبی تربیت، وانگ ءُ زانگ ءُ پٹ ءُ پول ءِ واستہ لوٹوکیں آسراتی پجاری ءِ سر ءَ کار ترندی ءَ گوں دیم ءَ روگ ءَ انت۔ جناح میڈیکل کمپلیکس ءَ را جھان ءِ معیار ءِ رد ءَ آرگ ءِ واستہ نوکیں ٹیکنالوجی ءِ وسیلگ ءَ پٹ ءُ پول ءُ مصنوعی ذہانت ءُ روبوٹکس ءِ کارمرد کنگ بیت۔