پشاور اٹی فیڈرل کانسٹیبلری ہیڈ کوارٹر آ خودکش جلہو، 3 کارندہ شہید، ورندی کارروائی ٹی ہرمسٹ آ جلہوگیر آک زوال کریر

پشاور۔ 24 نومبر (اے پی پی) پشاور کینٹ اٹی واقع فیڈرل کانسٹیبلری ہیڈکوارٹر نا گیٹ آ خودکش جلہو اٹی مسہ کارندہ شہید و اِرٹ ٹھپی مسر۔ سی سی پی او پشاور ڈاکٹر میاں سعید احمد نا رداٹ پولیس، فیڈرل کانسٹیبلری و پاک فوج انا کمانڈوک بھاز بہادری نا درشانی و وخت آ رسپانس کرسا 2 جلہو گیر ءِ خلکر، واقعہ نا جاگہ ٹی کلیئرنس آپریشن برجاءِ۔ سی سی پی او پشاور ڈاکٹر میاں سعید پارے کہ سنہری مسجد روڈ آ فیڈرل کانسٹیبلری نا ہیڈکوارٹر آ جلہو نا سوب آن صدر روڈ ءِ ٹریفک کن بند کننگانے، دھماکہ سہب انا 8 بجہ ءُ 10 منٹ آ مس۔ خودکش جلہو گیر تینے تینٹ دھماکہ اٹ ترخفے، دھماکہ داخہ در زوردار ئس کہ اونا توار ءِ مرمراسکان بِننگا۔ خودکش دھماکہ غان پد سم کاری نا توار آتے ہم بِننگانے وخت اس کہ روڈ ءِ ٹریفک کن بند کننگانے۔ علاقہ ٹی سیکورٹی ہائی الرٹ کننگانے و پین نفری ہم موقع غا سرمسنے۔ داڑتون اوار اوار ریسکیو ٹیمک ہم وخت آ سرمسنو۔ پشاور کینٹ مرکزی سنہری روڈ و ایف سی روڈ ءِ ہڑتوم آ کنڈآتیان بند کننگانے ایف سی ہیڈ کوارٹر ءِ کلیئر کننگ اسکان صدر روڈ آ ٹریفک نا روانی معطل سلک، داوخت آ بی آرٹی سروس ءِ ہم عارضی وڑاٹ معطل کننگانے، وخت اس کہ شاری تیان ہم سیکورٹی ادارہ غاتون کمک کننگ نا خواست کننگانے۔ آئی جی خیبرپختونخوا پولیس ذوالفقار حمید میڈیا تون گپ وتران کرسا پارے کہ فیڈرل کانسٹیبلری ہیڈکوارٹر صدر پشاور اٹی اِرا خودکش دھماکہ مس، اسہ دھماکہ مین گیٹ و ارٹ میکو گیٹ انا تہہ ٹی موٹرسائیکل اسٹینڈ آ مس۔ آئی جی پارےکہ اِرا جلہو گیر اسہ ایلو آ سم کاری ٹی خلنگانو، پولیس دھماکہ نا جاگہ غا ساڑی ءُ و کلیئرنس آپریشن برجاءِ۔ سی سی پی او پارے کہ 3 خود کش جلہو گیر فیڈرل کانسٹیبلری آ جلہو کریر، اسہ خودکش جلہو گیر تینے مرکزی گیٹ آ ترخفے وخت اس کہ اِرا خودکش جلہو گیر فیڈرل کانسٹیبلری ہیڈکوارٹر نا تہہ ٹی پترینگار۔ سی سی پی او پشاور میاں سعید پارے کہ فیڈرل کانسٹیبلری نا کارندہ غاک ہڑتوم آجلہوگیر آتیا سم کاری کریر، ہرمسٹ آ خودکش جلہو گیر آک خلنگانو، فیڈرل کانسٹیبلری نا ورناک بہادری اٹ خودکش جلہو ءِ بے سہب کریر۔ ڈپٹی کمانڈنٹ فیڈرل کانسٹیبلری جاوید اقبال پارے کہ ہرمسٹ آ خودکش جلہوگیر آک خلنگانو۔ فیڈرل کانسٹیبلری نا ورناک بہادری اٹ دہشت گرد آتا مقابلہ ءِ کریر، خود کش جلہو اٹی فیڈرل کانسٹیبلری نا 3 کارندہ شہید مسر۔ ہسپتال حوالی نا رداٹ جلہواٹی 5 بندغ ٹھپی مسر ہرافتے ہسپتال آ گدریفنگانے۔ جلہو اٹی 2 کارندہ و 3 شاری ٹھپی مسنو، غٹ ٹھپی تے طبی امداد فراوان کننگ انگ ءِ و اوفتا حالیت جوان ءِ۔ ڈپٹی کمانڈنٹ فیڈرل کانسٹیبلری نا پاننگ ءِ کہ کانود نافذ کروک آ ادارہ و کارندہ غاک علاقہ ءِ گھیڑ اٹی ہلکنو و کلیئرنس آپریشن برجاءِ۔