میاں اوستمانی کرکٹ ٹیم آنی آیگ ءِ وھد ءَ مہمانیں کھڈکار آنی جان سلامتی ءِ واستہ روٹ جوڑ کنگ بنت ءُ ملک ءَ میاں اوستمانی کرکٹ ءِ برجاہ دارگ ءِ واستہ شہری کسانیں تاخیر ءِ تکلیف ءَ را جوانیں رنگ ءَ بہ زور اَنت، عطا اللہ تارڑ

اسلام آباد۔23نومبر (اے پی پی):وفاقی وزیر ءِ اھوالکاری ءُ شنگکاری عطا اللہ تارڑ ءَ گوشت کہ میاں اوستمانی کرکٹ ٹیم آنی آیگ ءِ وھد ءَ مہمانیں کھڈکار آنی جان سلامتی ءُ ملک ءَ میاں اوستمانی کرکٹ ءِ بحالی ءِ برجاہ دارگ ءِ واستہ روٹ جوڑ کنگ بنت، شہری کسانیں تاخیر ءِ تکلیف ءَ را جوانیں رنگ ءَ بہ زور اَنت۔ یک شمبے ءِ روچ ءَ ادا تران کنان ءَ میاں اوستمانی کرکٹ ٹیم آنی روگ ءُ آیگ ءِ وھد ءَ جوڑ بوتگیں روٹ ءُ شہری آناں دیم ءَ آؤکیں جیڈھ آنی ھوالگ ءَ وفاقی وزیر ءِ اھوالکاری ءَ گوشت کہ وھدے ٹیم درملک ءَ چہ کاینت گڈا سیکورٹی کلیئرنس ءِ چیر دستی ءَ روٹ جوڑ کنگ المی اِنت، گیشتریں شہری اے جاور ھال آنی سر ءَ شکایت کن اَنت، مرچی من وت روٹ ءِ سر ءَ ادا گوزگ ءَ آں ءُ ٹیم ءِ وسیلگ ءَ ھم ھوار آں ۔ آئی ءَ گوشت کہ کرکٹ مزنیں کوشست ءُ کوشست ءَ پد پاکستان ءَ واتر بوتگ، ایشی ءَ را دیم ءَ برگ ءِ واستہ یکجائی کمک المی انت۔ وفاقی وزیر ءَ گوشت کہ سری لنکا ءَ ھم اے وڑیں جیڈھ است انت، اودا ایل ٹی ٹی ای ءِ سبب ءَ سیکورٹی ءِ سکیں بندوبست ءِ رہبند بوتگ۔ وفاقی وزیر ءَ گوشت کہ مارا باز براں روٹ ءِ سر ءَ ودار کنگی اِنت، مئے تہ ءَ اے یک رجحانے جوڑ بوتگ کہ ما زوت ایراد گرگ بندات کن ایں، ایراد گرگ ءِ بدل ءَ ما ایشی ءَ را جوانیں رنگ ءَ چارگی اِنت۔ آئی ءَ گوشت کہ جاور ھال مدام گہتر بوھگ ءَ انت، آیوکیں وھد ءَ اے وڑیں پریشانی کم چہ کم کنگ بنت۔ شہری آں پہ راجی گوازی ءِ زندگ کنگ ءُ ملک ءِ مثبت پجار ءِ ھاتر ءَ کمک ءَ را برجاہ دارگی اِنت ۔