ادارکی صدر سید یوسف رضا گیلانی حضرت موسیٰ پاک شہید ءِ مزار ءِ تر ءُ تاب ، مزار ءِ شاھیگانی ءَ ءِ بابت ءَ جتا جتائیں جیڑہانی سرا چار ءُ تپاسی

ملتان۔ 23 نومبر (اے پی پی): ادارکی صدر سید یوسف رضا گیلانی ءَ یک شمبے ءِ روچ ءَ حضرت موسی پاک شہید ءِ مزار ءِ تر ءُ تاب کتگ۔ تر ءُ تاب ءِ موہ ءَ سجدہ نشین سید ابو الحسن جمال الدین گیلانی ءَ ادارکی صدر ءِ مملکت ءَ پاگ بستگ۔ اے موہ ءِ سر ءَ ادارکی صدر سید یوسف رضا گیلانی ءَ مزار ءِ تر ءُ تاب کت ءُ مزار ءِ موستی ءَ گوں ھوالگ ءَ جتاجتائیں بنگپانی سر ءَ چار ءُ تپاسی کت۔ ادارکی صدر سید یوسف رضا گیلانی ءَ مزار ءُ مسیت ءِ جتا جتائیں دمگ آنی چار ءُ تپاسی کت ءُ ڈپٹی کمشنر ملتان وسیم حامد سندھو ءَ چہ توسیپ ءِ منصوبگ ءِ تکنیکی تک ءُ پھنات آنی بابت ءَ بریفنگ زرت۔ ادارکی صدر ءِ مملکت ءَ پنت ءُ شون کت کہ مزار ءِ توسیپ ءِ منصوبگ ءِ گام ءَ را گیش ترند کنگ بہ بیت، برانڈہ ءَ بنجاہی ماڑی ءَ یکجا کنگ ءِ کار ءُ مسیت ءِ جوڑیشت ءِ زوت بندات کنگ بہ بیت۔ آئی ءَ اے گپ ءِ سر ءَ زور پر دات کہ منصوبگ ءِ کوالٹی ءُ وھد ءِ سر ءَ سرجمی ءِ واستہ زوت ماہر انجینئر ءُ ھمگرنچیں تکنیکی ماہرین آنی ازمت زورگ بہ بنت۔ اے وھد ءَ آئی ءَ سیکورٹی ءِ بندوبست ھم چار ءُ تپاس کتگ ءُ المی ھدایت ھم داتگ اَنت۔ ڈپٹی کمشنر وسیم حامد سندھو ءَ دل یکیمی دات کہ توسیپ ءِ منصوبگ ءِ سر ءَ زوت کار بندات کنگ بیت ءُ درستیں پڑ آنی سر ءَ سکیں نگرانی کنگ بیت۔ تر ءُ تاب ءِ موہ ءَ پیسریگیں ایم پی اے سید احمد مجتبہ گیلانی، ڈاکٹر جاوید صدیقی، ایڈمنسٹریٹر اوقاف سید ایاز الحسن گیلانی ءُ سید فیاز الحسن گیلانی ءُ گیلانی ءِ کھول ءِ مردم ساڑی اتنت۔