ورنا آنی تہ ءَ پجار ءُ دود ءُ ربیدگ ءِ سرپدی ءِ بحال کنگ ءِ واستہ راجی جزم ءِ ضلورت اِنت، ایمنی ءُ یک شلی ءِ ھست نہ بوھگ ءَ جوانیں انسانی توانائی دیمروئی نہ کنت، وفاقی وزیر احسن اقبال

اسلام آباد۔21نومبر  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ زھگ آناں جوانیں وانگ ءُ زانگ ءِ پجارینگ ءِ ضلورت ءِ سر ءَ زور پر داتگ ءُ گوشت کہ کردار سازی ءُ تربیت ءِ سر ءَ ھاسیں دلگوشی دیگ بہ بیت تانکہ مئے آیوکیں آرکیٹیکٹ نوکیں دور ءَ گوں جوانیں رنگ ءَ دیم پہ دیم بوت کن اَنت ءُ راجی دیمروئی ءِ تہ ءَ وتی سرجمیں کرد ءَ پیلو کن اَنت۔ وفاقی وزیر ءَ سالانہ استاد ءِ دیمروئی کانفرنس (ٹی ڈی سی 2025) ءَ گوں تران کنان ءَ گوشت کہ وانگ ءُ زانگ ایوک ءَ مواد ءِ ٹرانسفر کنگ نہ اِنت بلکیں زھگ آنی شخصیت، ارزشت ءُ ذمہ واری ءِ احساس ءِ جوڑ کنگ ءِ عمل اِنت۔ احسن اقبال ءَ وتی کسانی ءِ یات ءَ گْوشتگ کہ پیسریگیں نسل ’’علیم او تربیہ‘‘ ءِ وانگ ءَ مزن بوتگ اَنت، یک انچیں تاکبندے کہ ایشی ءِ تہ ءَ وانگ ءُ زانگ گوں اخلاقی رھشونی ءَ ھمگرنچ بوتگ۔ آئی ءَ گیش گوشت کہ پاکستان ءِ وانگ ءُ زانگ ءِ نظام ءَ توازن بحال کنگ بہ بیت۔ آئی ءَ اے جیڑہ ءِ درشان کنان ءَ کہ بازیں زھگ وتی لبزانکی، راجدپتری ءُ دود ءُ ربیدگ ءِ سرپدی ءَ چہ گیش سرپد نہ اَنت، آئی ءَ گوشت کہ وانگ ءُ زانگ یک ”سرجمیں کوشست“ یے ءُ بامردیں اصلاحات ءِ واستہ ورنا آنی تہ ءَ پجار ءُ دود ءُ ربیدگ ءِ سرپدی ءِ پدا زندگ کنگ ءِ واستہ راجی جزم ءِ ضلورت اِنت۔ احسن اقبال ءَ گوشت کہ پاکستان ءَ سوبمندیں راج آنی مقابلہ ءَ ذہانت، ٹیلنٹ، ایمانداری ءُ وسیلگ آنی واھند بوھگ ءَ ابید ھم جوانیں چاگرد ءِ نہ بوھگ ءِ سبب ءَ باز رند ءَ پد منتگ بوتگ۔ آئی ءَ گوشت کہ یک انچیں دان ءِ وڑ ءَ کہ استحکام، نمی ءُ جوانیں موسم ءِ ھست نہ بوھگ ءِ سبب ءَ دیمروئی نہ کنت، ایمنی ءُ یک شلی ءِ ھست بوھگ ءِ سبب ءَ جوانیں انسانی توانائی ھم دیمروئی نہ کنت۔ آئی ءَ اے گپ ءِ سر ءَ زور پر دات کہ درستیں سوبمندیں ملک آنی نیمگ ءَ ایمنی، سیاسی استحکام، کم چہ کم یک دہائی ءِ واستہ پالیسی آنی یک شلی ءُ دراجیں مدتی اقتصادی رھبند ءِ چار بنیاتی رھبند آناں دل یکیمی کنگ بوتگ۔ آئی ءَ چین، ملائیشیا، سنگاپور، جاپان، جنوبی کوریا ءُ بنگلہ دیش ءِ مثال داتگ کہ اودا 10 ءَ چہ 30 سال ءِ سروکی ءِ مدت ءَ پالیسی ءِ آسر آنی سر ءَ عمل کنگ ءِ اجازت داتگ۔ آئی ءَ پاکستان ءِ وتی راجدپتر ءِ سر ءَ چمشانک دیان ءَ گوشت کہ 1960 ءِ دہک، 1990 ءِ دہک ءِ بندات ءُ 2013-2018ءَ ملک ءِ دیمروئی ءِ وھد ءَ باز رند ءَ بے رھبندی ءُ سیاسی بدلی آنی آماچ بوتگ۔ آئی ءَ 1997 ءَ وژن 2010 ءُ 2013 ءَ پاکستان مسلم لیگ نواز حکومت ءِ نیمگ ءَ وژن 2025 ءِ بندات ءِ یات کت کہ اے دوئیں وتی سرجمیں اثر ءَ را سر کنگ ءَ پیسر ریل ءَ چہ کشگ بوتگ انت۔ آئی ءَ ٹپاس کت کہ اے گپ نہ اِنت کہ مارا منصوبہ بندی یا ظرفیت ءِ کمی اِنت، اے بے رھبندی ءُ پالیسی ءِ رندگیری اِنت کہ مارا چہ آسراتی ءَ زبھر کتگ۔ آئی ءَ گوشت کہ گوستگیں سال آنی اقتصادی زوال ءَ پد پاکستان ءَ نوں جتا جتائیں اشارہ آنی تہ ءَ گہتری گندگ ءَ کیت، اے گپ ءِ سر ءَ دلگوش گور کنگ ءَ انت کہ مہنگائی کہ سئے سال پیسر 38درسد بوتگ ات 4.5درسد ءَ اتکگ، اسٹاک مارکیٹ 80ہزار پوائنٹ ءَ چہ 170ہزار ءَ سر بوتگ ءُ زرّ دیم دیگ ریکارڈ کچ ءَ سر بوتگ۔ آئی ءَ گیش کرتگ کہ اے رجحاناں پاکستان ءِ سر ءَ میاں اوستمانی اعتماد پدا زندگ کتگ۔ راج ءَ را گوست ءِ ردی آناں پدا مہ کنگ ءِ سر ءَ زور پر دیان ءَ گوشت کہ اے چارمی موہ اِنت کہ اللہ تعالیٰ ءَ مارا داتگ، ما اے ٹیک آف ءَ را پیسریگیں سئے ءِ وڑ ءَ کریش مہ کن ایں ۔ احسن اقبال ءَ گوشت کہ راستی ءِ سوبمندیں جنز ءِ ساھت ءَ پاکستان ءِ مھکمیں ءُ یکجاھیں پسو ءَ ملک ءِ شرپ ءَ را مزنیں کساسے ءَ برز کتگ۔ آئی ءَ گیش گوشت کہ اے وئیل ءَ پاکستان ءِ شرپ ءُ شان ءِ جھان ءِ پڑ ءَ بُرز کتگ، جھان نوں آئی ءَ را یک مھکم ءُ شرپداریں راج ءِ رنگ ءَ گندگ ءَ اِنت۔ اے ہما عکس اِنت کہ مارا آئی ءِ رکھینگ لوٹیت۔ وزیر ءَ گوشت کہ دوستیں ملک پاکستان ءِ گوما دوبر ھوار بوھگ ءَ اَنت، اے گپ ءِ سر ءَ دلگوش گور کنگ ءَ کہ سعودی عرب مزنیں دفاعی ڈیل ءِ پد ءَ روگ ءَ اِنت، چین سی پیک ءِ دومی بھر ءَ را دیم ءَ برگ ءَ اِنت ءُ امریکہ ءِ گوما سیادی نوکیں باب ءِ تہ ءَ داخل بوھگ ءَ اِنت۔ آئی ءَ گوشت کہ استاد پاکستان ءِ سد سالی سال 2047 ءِ سر ءَ چماں بہ دار اَنت وھدے ملک ایندگر دمگی راج آنی گوما راجدپتر ءِ دیم ءَ اوشتات کنت۔ راجی ذہنیت ءِ تہا بدلی ءِ ضلورت ءَ را پدر کنان ءَ آئی ءَ گوشت کہ پاکستان ءَ را سیاسی نہ بلکیں ’’اقتصادی لانگ مارچ‘‘ ءِ ضلورت اِنت۔ چین ءِ گوما ہمگرنچ کنگ ءَ آئی ءَ اے گپ ءِ سر ءَ زور پر دات کہ راجی دیمروئی ءِ ھاتر ءَ استحکام ءُ چاگردی یکوئی ءِ سر ءَ بندوک اِنت ، اے قدر ءُ قیمت کہ ہر شہری ءُ نودربر ءَ را سرپد بوھگی اِنت۔ آئی ءَ گوشت کہ راجاں دیمروئی ءِ جنگ آنی تہ ءَ کوتاہیں جوش ءُ جزبگ ءِ پُرشگ ءَ نہ بلکیں ٹیسٹ میچ ءِ صبر ءُ برداشت ءَ گوں سوبمند بوتگ اَنت۔ آئی ءَ گیش کرتگ کہ مارا یک انچیں نسل ءِ پیداک کنگ لوٹ ایت کہ آ سرپد بہ بیت کہ یک راجے ءَ را دیمروئی ءُ سوبمند بوھگ ءِ ھاترا چے کنگی اِنت۔ احسن اقبال ءَ پدا وانگ ءُ زانگ ءِ زانتکارانی نیمگ ءَ چم شانک دیان ءَ گوشت کہ وانینگ یک کارے نہ اِنت بلکیں مشن اِنت ءُ آھاں چہ لوٹ کت کہ آ راج ءِ آیوکیں وھد ءِ جوڑ کنگ ءَ فیصلہ کنوکیں کرد پیلو بہ کن اَنت ءُ نودربر آنی تہ ءَ پاکستان ءِ دیمروئی ءِ تہ ءَ بامردیں کرد پیلو کنگ ءِ جزم ءَ را ودی بہ کن اَنت۔