بنجائی وزیر انسانی حق اعظم نذیر تارڑ تون نیدر لینڈز انا سفیر نا اوڑدہی

اسلام آباد۔ 21 نومبر (اے پی پی) بنجائی وزیر انسانی حق سینیٹر اعظم نذیر تارڑ تون مملکت نیدر لینڈز انا سفیر ہائی ایکسی لینسی رابرٹ یان سیگرٹ جمعہ نادے آ داڑے اوڑدہی کرے۔ اوڑدہی ٹی انسانی حق انا مون آ دننگ و رکھ انا بابت برجاگام گیج آتیا گپ وتران و ہڑتوم آ کنڈآتا کمکاری ءِ پین سوگو کننگ آ گپ وتران کننگا ۔ وزارت انسانی حق آن جاری پریس ریلیز نا رداٹ بنجائی وزیر سفیر ءِ بخیرکرے و پاکستان نا انسانی حق انا بشخ اٹی اولیت آتا پوروی کن نیدر لینڈز انا آخبتی کمکاری و است خواہی نا ستاءِ کرے۔ ہڑتوم آ فریق آک بریبری، شمولیت و غٹ شاری تا راجی آسودہی نا مون آ دننگ نا اسیجائی عزم انا درشانیءِ کریر۔ سفیر انسانی حق انا ایجنڈا غا عملدرآمد نا بابت پاکستان نا کوشست آتا ستاءِ کرے و آئینی ضمانت، خاص کر مذہبی آجوئی و عقیدہ غاتا آجوئی نا مون آدننگ کن حکومت عزم انا ستاءِ کرے۔ داوخت آ بنجائی وزیر پاکستان نا متنوع و شمولیتی راج انا حوالہ ءِ ترسا پارے کہ ملک اٹی غٹ مذہبی برادری تا حق آئین پاکستان نا رداٹ رکھوک ءِ۔ وزیر ساڑی آ کانود سازی آن ہم معلومدار کرے، ہراٹی نیشنل کمیشن اقلیتی حق بل انا درستی راستی اوار ءِ، ہرا اقلیت آتا حق انا رکھ، بین المذاہب ہم آہنگی نا مون آ دننگ و قومی شونداری ٹی اقلیتی برادری تا پبی شمولیت ءِ جوڑ کننگ کن اسہ اہم ءُ گام اسے۔ بنجائی وزیر نیشنل ایکشن پلان انسانی حق آ پیش رفت آن ہم معلومدار کرے، ہراپالیسی اصلاحات، انصاف اسکان رسینگ اٹ گچینی، جہانی معاہدہ غاتیا عملدرآمد و انسانی حق انا ادارہ غاتا سوگوی کون آ گام گیج آتا احاطہ ءِ کیک۔ اوقومی کمیشن انسانی حق(این سی ایچ آر)، قومی کمیشن وقار نسواں(این سی ایس ڈبلیو) و قومی کمیشن حق اطفال (این سی آرسی) کون آ وتواجہ ادارہ غاتا اہم کڑد ءِ ہم تالان کرے۔ داکان بیدس زالبول، چنا، سینئر شاری، خواجہ سرا و معذور بندغ کون آ نزور تپہ غاتا رکھ انا بابت حکومتی گام گیج آتیا ہم گپ وتران کننگا۔ ہڑتوم آ کنڈآن انسانی حق انا مون آ دننگ و رکھ اکن خڑکی رابطہ کاری و تعمیری مکالمہ ءِ برجاتخنگ نا عزم انا درشانی ءِ کننگا۔ اوڑدہی نا ایسر تین پہ تینی اولیت آتیا پین گہراکمکاری نا درشانی آمس۔