پارلیمان ساڑی آئینی ترمیم نا کمک اٹ آئینی عدالت نا جوڑ کننگ نا فیصلہ ملکی بنجائی پنجر ءِ پین سوگو کننگ کن کرے، سینیٹر اعظم نذیر تارڑ

اسلام آباد۔ 20 نومبر (اے پی پی) بنجائی وزیر کانود و انصاف سینیٹر اعظم نذیر تارڑ پارینے کہ آئین اٹی ترمیم نا اختیار مدام پارلیمان تون مسنے و ہراتم اسکان پاکستان آئینی وڑاٹ چلینگ  انگ ءِ، داواکدار پارلیمان تون ہی سلک۔ اوپارے کہ پارلیمان الس نا گچین نمائندہ غاتیا تالان ءِ و ملک ءِ چلیفنگ نا اختیار اوفتے تون بایدے مرے ہندا ہیت آئین نا بندات اٹی ہم پیدوار وڑاٹ نوشتہ ءِ۔ او پنچ شنبے نادے آ ایماندار سینیٹر عرفان صدیقی نا یات اٹی اڈ ہلوک تعزیتی ریفرنس آن بطور مہمان خاص تران کریکہ۔ اوپارے کہ پارلیمان ساڑی آ آئینی ترمیم نا کمک اٹ آئینی عدالت نا جوڑ کننگ نا فیصلہ ملکی بنجائی پنجر ءِ پین سوگو کننگ کن کرینے ہراٹی ہر چار آ اکائی تے بریبر نمائندگی تننگانے تانکہ قومی کہول انا آئینی و کانودی باندات آتیٹی توازن برقرار سلے۔ سینیٹر اعظم نذیر تارڑ پارے کہ 2006 اٹی ہم سیاسی سرکڑدہ غاک داہیت آامنا کریسر کہ ہراصوبہ غاتا نیام اٹ آئینی تنازع مرے یا پین اہم قومی نوعیت نا آئینی سوج اس عدالت اٹ برے تو ہندن ءُ عدالت اس مرے ہراٹی غٹ اکائی تا بریبرنمائندگی مرے۔ ساڑی آ ترمیم ہندا تصور ناعملی درشانی ءِ۔ اوپارے کہ اسلام آباد نا نمائندگی ءِ ہم اوار کننگانے ، ولے دا صوبہ غاتا بریبر نمائندگی آن نیمہ غان زیات مفک۔ اوپارے کہ الس نا ہڑدے ئی حق، آئینی افسوزات و آرٹیکل 199 نا رداٹ دائر پٹیشن آتا جتا آن سماعت کن آئینی عدالت نا جوڑ کننگ المی ئس وخت اس کہ فوجداری، دیوانی، بینکاری، کمرشل و سروس باندات سپریم کورٹ ہی نا دنگ اٹی مریرہ تانکہ الس ءِ انصاف نا دوئی کننگ اٹ اڑاند آتون مون تروئی تمپ۔ ایماندار سینیٹر عرفان صدیقی ءِ خراج عقیدت پیش کرسا بنجائی وزیرپارے کہ او منطق، اعتدال و فہم و فراست نا کمک اٹ ویل آتا ایسرکشنگ نا لائخی تخاکہ۔ او بھلو صحافی، صاحب بصیرت سیاستدان و شائستہ قلم نا خواجہ ئس۔ اوپارے کہ عرفان صدیقی نا قومی خذمت و فکری جہد ءِ مدام یات تخنگک۔