سینیٹر عرفان صدیقی سیاست اٹ تین پہ تینی شرف، سگ و سیاسی نظریہ غاتا شرف آ یخین تخاکہ، بنجائی وزیر ڈاکٹر طارق فضل چوہدری نا تعزیتی ریفرنس آن تران

اسلام آباد۔ 20 نومبر (اے پی پی) بنجائی وزیرپارلیمانی امور ڈاکٹر طارق فضل چوہدری سینیٹر عرفان الحق صدیقی ایماندار نا علمی، ادبی، صحافتی و سیاسی خذمت آتیا زبردست لوز آتیٹی خراج عقیدت پیش کرساپارینے کہ سینیٹر عرفان صدیقی سیاست اٹی تین پہ تینی شرف ، سگ و اسہ ایلو نا سیاسی نظریہ غاتا شرف آ یخین تخاکہ۔ نن غٹ اونا دانقوش آتا پیروی ءِ بایدے کین۔ او پنچ شنبے نادے آ داڑے اسلام آباد چیمبرآف کامرس نا مسکوہی صدر احسن ظفر بختاوری نا کنڈآن سینیٹر عرفان الحق صدیقی ایماندار کن اڈ ہلوک تعزیتی ریفرنس آن تران کریکہ۔ اوپارے کہ عرفان صدیقی اسہ عظیم ءُ شخصیت و کناہم استاد ئس، ای اوڑتون کالج اٹی خوانانٹ  او زبان و ادب آ پورو دسترس تخاکہ۔ کنا مدام اوڑتون استاد و شاگڑد نا تعلق مسنے۔ سیاسی پڑاٹ ہم ای مدام اوڑتون اسہ شاگڑد اسے ناوڑاٹ راہشونی ہلکٹ۔ اوپارے کہ اینو کنا انداز بیان انت کہ ارے او کنا استاد محترم عرفان صدیقی نا مرہون منت ءِ۔ سیاست اٹ ہم او مدام شفقت، پیار، مہرومریبت و شرف نا درس تس۔ اوپارے کہ اینو ہر اسٹ اودے جوان ءُ پن اسے اٹ یات کننگ ءِ اللہ تعالیٰ اودے جنت اٹ جاگہ ایتے۔ اوپارے کہ سینیٹر عرفان الحق صدیقی ہندن ءُ شخصیت اس ئس ہرادے مدام یات تخنگک۔ اونا کالم و نوشت نا وڑہم بھاز جوان ئس۔ اوپارے کہ سیاست اٹ داوخت آ تین پہ تینی شرف اٹ کمتی، بے سگی و بشخ وپانٹ ودنگ ءِ۔ اسہ ایلو ءِ سگنگ و ایلو نا نظریہ غاتا شرف ءِ کننگ سیاست نا زیبائی ءِ۔ دا غٹ جوانیک سینیٹر عرفان صدیقی نا شخصیت اٹ ساڑی ئسر۔ اوپارے کہ داوڑنا بندغ آک مدام راج ءِ ہر بشخ اٹی تینا نقشہ ءِ ہلرہ۔ اوظفربختاوری نا دود انا اڈتننگ آ خاص وڑاٹ منت واری ءِ ہرفے و دعاکرے کہ اللہ تعالیٰ سینیٹر عرفان الحق صدیقی نا درجہ غاتے بڑزکے۔