وفاقی وزیر ءِ اھالکاری عطا اللہ تارڑ ءَ سری لنکا ءِ ورنا آنی کار ءُ اسپورٹس ءِ نائب وزیر  ورنا آنی کار ءُ لیب گوازی سوگاتھ تھلا کراتھنے ءَ گوں گند ءُ نند کتگ، دوئیں ملکاں اسپورٹس ءِ پڑ ءَ کمک ءَ را گیش گیش کنگ ءِ سر ءَ تپاک

اسلام آباد۔20نومبر  (اے پی پی): سری لنکا ءِ ورنا آنی کار ءُ لیب ءُ گوازی ءِ نائب وزیر سوگاتھ تھلا  ءَ وفاقی وزیر ءِ اھالکاری ءُ شنگکاری عطا اللہ تارڑ ءَ گوں گند ءُ نند کت۔ اے موہ ءِ سر ءَ سری لنکا ءِ ہائی کمشنر رئیر ایڈمرل فریڈ سینویراتھنے، ڈپٹی ہائی کمشنر کرسٹی روبن  ءُ  منسٹر قونصلر (ڈیفنس) بریگیڈیئر جی اے کے آر گنارتنے  ھم ھوار اتنت۔ گند ءُ نند ءَ کرکٹ ءِ دیمروئی، لیب ءُ گوازی ءِ تہ ءَ وت مہ وتی کمک ءُ وت مہ وتی سیادی آنی سر ءَ سرجمی ءَ گپ ءُ تران کنگ بوت۔ دوئیں ملکاں اے پڑ ءَ کمک ءَ را گیش گیش کنگ ءِ سر ءَ تپاک کتگ ءُ اسپورٹس ءَ را مردم آنی نیام ءَ رابطہ آنی دیمروئی ءِ یک موثریں وسیلگ لیک اتگ۔ وفاقی وزیر برائے اھوالکاری ءَ گوشت کہ پاکستان ءُ سری لنکا ءِ نیام ءَ سیادی بھروسہ، شرپ ءُ یکجائی ءِ ارزشت آنی بنیات ءَ انت۔ لیب ءُ گوازی ءِ پڑ ءَ کمک نہ ایوک ءَ نوکیں نسل ءَ را نزیک کنت بلکینگ ءَ دوئیں ملک آنی الس ءِ نیام ءَ سیادی ءَ را گیش مھکم کنت۔ آئی ءَ گوشت کہ پاکستان خطہ ءَ اسپورٹس ڈپلومیسی ءِ دیمروئی ءِ واستہ سنگینیں گامگیج کنگ ءَ انت ۔ وفاقی وزیر برائے اھوالکاری ءَ سری لنکا ءِ حکومت ءُ سروکی ءِ منت گپت کہ آ اسپورٹس ءِ تہ ءَ کمک ءَ را دیمروئی دیگ ءَ اَنت ءُ گوشت کہ سری لنکا ءِ پارلیمنٹ ءِ بجٹ سیشن ءِ باوجود سری لنکا ءِ نائب وزیر ءِ پاکستان ءِ تر ءُ تاب دوئیں ملک آنی نیام ءَ دیریں دوستی ءُ بھروسہ مندیں سیادی آنی یک پدریں درشان اِنت۔ امیت انت کہ اے تر ءُ تاب ءَ چہ وت مہ وتی سیادی آنی تہ ءَ ھاسیں رنگ ءَ لیب ءُ گوازی ءِ پڑ ءَ نوکیں راہ پچ بنت۔ سری لنکا ءِ ڈل ءَ وزیر داخلہ محسن نقوی ءِ نیمگ ءَ ٹرائی نیشنل سیریز ءِ واستہ کتگیں جوانیں بندوبست آناں ساڑات۔ زانگ بہ بیت مزن وزیر شہباز شریف ءَ گوستگیں روچ ءَ ٹرائی نیشن ٹیم آنی شرپ ءَ برجم داشتگیں نان ءِ ورگ ءِ ساھت ءَ سری لنکا ءِ کرکٹ ٹیم ءُ سری لنکا ءِ حکومت ءِ شگر ءُ منت گپت۔ سری لنکا ءِ ڈل ءَ پاکستان ءِ میزبانی ءِ مزنیں معیار ءُ اسپورٹس سفارتکاری ءَ را دیمروئی دیگ ءِ واستہ آئی ءِ عزم ءِ ساڑات۔ سری لنکا ءِ ڈل پاکستان ءَ ٹرائی نیشن سیریز ءِ میچاں ھم چاریت۔