پاکستان ءُ انڈونیشیا ءِ اُرد آناں انسداد ناشرکاری ءِ آپریشن ءِ تربیت ءِ واستہ یکجائی مشق سوبمندیں رنگ ءَ سرجم بوت

اسلام آباد- 19نومبر (اے پی پی): پاکستان ءُ انڈونیشیا ءِ اُرد ءَ انسداد ناشرکاری آپریشن ءِ تربیت ءِ واستہ یکجائی مشق سوبمندی ءَ گوں سرجم کتگ۔ چار شمبے ءِ روچ ءَ انٹر سروسز پبلک ریلیشنز ءِ نیمگ ءَ جاڑی بوتگیں بیان ءِ رد ءَ پاکستان ءُ انڈونیشیا ءِ یکجائی انسداد ناشرکاری ءِ فوجی مشق ’’شاہین سٹرائیک دوم‘‘ سوبمندیں رنگ ءَ آسر بوتگ۔ دوئیں ملک آنی یکجائی فوجی مشق 8 نومبر ءَ بگر داں 19 نومبر ءَ برجاہ بوتگ اے مشق ءِ مستریں مول ءُ مراد ناشرکاری ءِ ھلاپ ءَ آپریشن بوتگ۔ اے مشق ءَ پاک اُرد ءُ انڈونیشیا ءِ اُرد ءِ ھاسیں جنگی ٹیماں بھر زرتگ ءُ تربیت ءِ سرجمیں مول ءُ مراد سوبمندیں رنگ ءَ سرجم بوتگ اَنت۔ اے مشق 18نومبر ءَ سرکاری رنگ ءَ آسر بوتگ ات ایشی ءِ تہ ءَ پاکستان ءِ یک جنرل افسر ءِ مستریں مہمان ءِ بستار ءَ ھوار بوتگ ات ءُ انڈونیشیا ءِ مزنیں فوجی کارندہ آنی گڈی مراگش ءَ ھوار بوتگ ات۔ یکجائی مشق ءِ ساھت ءَ دوئیں ملک آنی اُرد آں مزنیں پیشہ وارانہ ، آپریشنل صلاحیت ءُ مھکمیں ھمگرنچی ءِ درشان کتگ۔ تربیت ءِ تہ ءَ بلٹ اپ ایریا آنی تہ ءَ آپریشن، انسداد ناشرکاری ءِ تکنیک ءُ آئی ای ڈی آنی رد کنگ ءِ ھوالگ ءَ نوکیں رھبند آنی سر ءَ دلگوشی دیگ بوتگ۔ آئی ایس پی آر ءَ گوشت کہ مشق ’’شاہین سٹرائیک دوم‘‘ ءَ پاکستان ءُ انڈونیشیا ءِ نیام ءَ دیریں فوجی سیادی آناں گیش مھکم کنگ ءِ تہ ءَ مزنیں کرد پیلو کتگ ءُ دوئیں ملک آنی نیام ءَ کمک ءَ را نوکیں سنگ میل ءِ سر ءَ سر کتگ۔