وفاقی حکومت یک کسانیں مدتی منصوبہ ءِ رد ءَ سرجمیں ملک ءَ ضلع ءُُ تحصیل ءِ تک ءَ آفت آنی ھوالگ ءَ درستیں زوتیں ھال ءِ نظام آناں یکجا کنت، وفاقی وزیر ڈاکٹر مصدق ملک ءَ این ڈی ایم اے ءِ چیئرمین لیفٹیننٹ جنرل انعام حیدر ملک ءَ گوں پریس کانفرنس

اسلام آباد۔ 19 نومبر (اے پی پی): موسمیاتی بدلی ءُ چاگردی یکوئی ءِ وفاقی وزیر ڈاکٹر مصدق ملک ءَ گوشت کہ وفاقی حکومت صوبائی واکدار آنی کمک ءَ سرجمیں ملک ءَ آفت آنی ھوالگ ءَ زوتیں ھال ءِ نظام آناں ضلع ءُ تحصیل ءِ تک ءَ 250 روچ ءِ کمیں وھد ءِ رد ءَ ٹرانسفر ءِ رد ءَ یکجا کنت۔ سیلاب ءَ چہ پیسر ممکن جوڑ کنگ بوت کنت۔ کوشست کنگ بوھگ ءَ انت کہ آیوکیں مون سون ءَ انچیں تاوان مہ بیت کہ اے سال ءَ بوتگ۔ مزن وزیر ءَ زوتیں ھال ءِ نظام ءَ را زوت یکجا کنگ ءِ ہدایت کتگ۔ دراجیں مدتی حکمت عملی ءِ رد ءَ پنچ سال ءِ تہ ءَ موسمیاتی رد ءَ ردیں بنیاتی ڈھانچہ جوڑ کنگ بوھگ ءَ اِنت۔ اے ھیالانی درشانی آئی ءَ چار شمبے ءِ روچ ءَ این ڈی ایم اے ءِ چیئرمین لیفٹیننٹ جنرل انعم حیدر ملک ءِ گوما پریس کانفرنس ءَ گوں تران کنان ءَ کت۔ پریس کانفرنس ءَ گوں تران کنان ءَ وفاقی وزیر ءَ گوشت کہ یکجائی نظام ءَ چہ بنجاہی انتظامیہ ءَ را المی وھد ءُُ پاس ءِ سر ءَ پسو دیگ ءِ وس ءُ واک رسیت، ایشی ءَ چہ آیوکیں مون سون ءِ وھد ءَ تاوان ءَ را مزنیں کساسے ءَ کمی کیت۔ وفاقی وزیر ءَ گوشت کہ مزن وزیر محمد شہباز شریف ءَ وتی سروکی ءَ مزن تک ءِ دیوان ءَ دریا، سیلاب، کوہ ریل، شہری سیلاب ءُ کوہ ءِ دمگ ءِ ھترہ آنی ھواریں درستیں موسمیاتی ھترہ آنی سر ءَ چار ءُ تپاسی کتگ ءُُ کسانیں، میان استمانی ءُُ دراجیں مدت ءِ سر ءَ ھواریں راجی لچکداریں روڈ میپ ءِ منظوری داتگ۔ آئی ءَ گوشت کہ اے وھد ءَ پاکستان ءَ جتا جتائیں محکمہ آنی تہ ءَ وارننگ سسٹم شنگ ءُُ تالان انت ایشی ءِ سبب ءَ تاخیر ءُ بد انتظامی ءِ سبب جوڑ بیت۔ مزن وزیر ءَ ہدایت کتگ کہ اسسٹنٹ کمشنر ءُ ڈپٹی کمشنر ءِ کارگس آنی تہ ءَ توامیں ڈیٹا سیٹ یکجا کنگ ءُ ریئل ٹائم اسکرین آنی سر ءَ پیش کنگ بہ بنت۔ آئی ءَ گوشت کہ اولی الارم اسلام آباد ءَ جنگ نہ بیت بلکیں تحصیل ءُُ ضلعی تک ءَ جنگ بیت تانکہ ریلیف ادارگ ءُُ کمیونٹی آناں آپ ءِ سر بوھگ ءَ چہ پیسر وھد ءِ سر ءَ ھال ءُُ اھوال رس ایت۔ ڈاکٹر مصدق ملک ءَ گوشت کہ 250 روچ ءِ کسانیں مدتی بھر ءِ چیر دستی ءَ سرجمیں ڈرینیج کینال ءُُ سیلاب ءِ دروازگ آنی بحالی کنگ بیت، وھدیکہ شہری دمگ آنی تہ ءَ بند بوتگیں یا آماچیں ڈرینیج سسٹم آناں ھم پیسر ءَ چہ جوڑ کنگ بیت۔ آئی ءَ گوشت کہ گوستگیں سیلاب آنی سبب ءَ لکھانی مردم بے لوگ ءُ نزیک ءَ 2 لکھ زھگ وانگ ءُ زانگ ءَ چہ زبھر بوتگ اَنت۔ اے منصوبہ ءِ رد ءَ آماچیں دمگاں عارضی وانگ ءُ زانگ ءِ بندوبست کنگ بیت دانکہ آوار جنگ ءِ وھد ءَ ھم وانگ ءُ زانگ برجاہ بہ بیت۔ ایشی ءَ ابید موبائل ایمرجنسی ہیلتھ کیئر سسٹم ھم دیم ءَ آرگ بوھگ ءَ اِنت کہ ایشی ءَ چہ جاہ ءِ سر ءَ بنیاتی علاج ءُُ زوتیں سرجری ءِ آسراتی رس ایت۔ وفاقی وزیر ءَ گوشت کہ اگاں چہ بنداتی منصوبگ صوبائی آبپاشی، کشت ءُ کشاری ءُُ آفت ءِ محکمہ آنی گوما شور ءُ سلاھ ءَ پد تیار کنگ بوتگ بلے مزن وزیر ءَ سرجمیں صوبائی حکمت عملی ءَ را دل یکیمی کنگ ءِ واستہ گیش شور ءُُ سلاھ ءِ ہدایت کتگ۔ ناجائزیں تجاوزات ءِ ھوالگ ءَ جست ءِ پسو ءَ آئی ءَ گوشت کہ مزن وزیر ءَ دریا آنی کش ءَ بااثریں گل آنی نیمگ ءَ جوڑ کتگیں ھوٹل ءُ ریزورٹ آنی ھلاپ ءَ سکیں کارروائی ءِ ہدایت داتگ ءُ زوننگ ءِ کانود آنی ھلاپ ءَ جوڑیشت ءِ اجازت داتگیں مردمانی جست ءُ پرس ءِ ھم پرمان داتگ۔ حکومت ءِ دراجیں مدتی منصوبہ ءِ تہا مول ءُ مراد دریا آنی قدرتی روانی ءَ را بحال کنگ، رسک زون آنی تہ ءَ جوڑ بوتگیں آبادی آنی نشاندہی کنگ، رسک ءِ دمگ آنی تہ ءَ نوکیں جوڑیشت ءِ دیم ءَ دارگ ءُ استیں آبادی آنی رکھینگ ءَ را دل یکیمی کنگ اِنت۔ آئی ءَ گوشت کہ پاکستان ءَ نہ ایوک ءَ سکیں گرم ءِ دیم ءَ انت بلکینگ ءَ زمستان ءِ شدت ءُ موسمی ردوم ءِ تہ ءَ ھم گیشی بوھگ ءَ انت پمیشکا آیوکیں وھد ءِ لچک ءِ منصوبگ بندی ءَ دوئیں موسم آنی لوٹ آناں ھوار کنگ بوھگ ءَ انت۔ ڈاکٹر مصدق ملک ءَ گوشت کہ اصل جیڈھ مالی وسیلگ نہ انت بلکیں انتظامی ءُ ھمگرنچی ءِ تہ ءَ نزوری ءُ نفاذ ءِ تہ ءَ دیر کنگ انت۔ آئی ءَ گوشت کہ 2017 ءَ بندات بوتگیں 20 ءَ چہ 30 ملین کلدار ءِ لھتیں منصوبگ انگت ءَ سرجم نہ بوتگ اَنت، اگاں چہ 8سال ءَ نوکیں شہر ھم جوڑ کنگ بوت کنت۔ تاخیر ءَ چہ بچگ ءِ واستہ مزن وزیر ہر سہ ماہی ءَ پیشرفت ءِ چار ءُُ تپاسی کنت، وزارتی کمیٹی ماہانہ دیوان کنت، وھدیکہ نفاذ ٹیم ہر ہفتگ ءَ دیوان کنت۔ آئی ءَ گوشت کہ حکومت وتی سرجمیں موسمیاتی حکمت عملی ءَ را الس ءِ دیم ءَ کاریت ءُ شہری آناں احتساب ءِ واستہ جست ءُ پرس ءِ واستہ دلبڈی دنت۔ آئی ءَ گوشت کہ مئے زھگ قربانی نہ اَنت، مارا آھاں انچیں باندات ءِ دات کنگی اِنت کہ آفت بار بار ھرچی ءَ را شُشت مہ کنت۔ پریس کانفرنس ءَ گوں تران کنان ءَ این ڈی ایم اے ءِ چیئرمین لیفٹیننٹ جنرل انعم حیدر ملک ءَ گوشت کہ 2026ءَ چہ پیسر مون سون ءِ نظام جوڑ کنگ بوھگ ءَ انت، پاکستان ءَ ھمک سال موسم ءِ شدت گیش بوھگ ءَ انت۔ گلگت بلتستان ءَ گیشتر ھئور بیت۔ مون سون 2026 ءَ 22 ءَ چہ 26 درسد گیش بوت کنت۔آئی ءَ گوشت کہ 3.1 ملین مردم سیلاب ءَ چہ رکّینگ بوتگ اَنت، اے صوبہ ءُُ فیڈریشن ءِ واستہ اقتصادی بار یکجائی ءَ برداشت کنگ بوتگ، جون ءَ پد گرم ءِ لہر ءِ سبب ءَ گلیشیر آنی ترندیں پگھل بوھگ ءِ امکان است اِنت۔ چیئرمین این ڈی ایم اے ءَ گوشت کہ پاکستان ءِ عمومی جاور ھال ءُ 6 ءَ چہ 8 ماہ ءِ پیش گوئی ءِ رد ءَ بوت کنت کہ دگنیا ءِ تہ ءَ ایوکیں این ڈی ایم اے اے کار ءَ کنگ ءَ اِنت۔ آئی ءَ گوشت کہ اسلام آباد ءَ ھوار بازیں دمگ آنی تہ ءَ سموگ ءِ جیڈھ گیش بیت، ایشی ءِ تہ ءَ 45درسد ٹرانسپورٹ ءِ سبب انت، وھدیکہ 20 تاں 30درسد صنعت ءِ سبب انت۔