تمباکو ءِ چاگردی ءُ معاشی ھرابین انت، اے ھترہ آں چہ لس مہلوک ءِ سرپدی ءِ مہم ءُ شریں گلوبل پالیسیانی نفاذ ءِ وسیلگ ءَ کم کنگ بوت کنت، مرتضی سولنگی

اسلام آباد۔ 19 نومبر (اے پی پی): ڈبلیو ایچ او ءِ نوکیں رپورٹ ءِ حوالہ ءَ پاکستان ءِ صدر ءِ جارکش مرتضی سولنگی ءَ گوشت کہ پاکستان ءَ انگت ءَ تمباکو ءِ جان سلامتی ءِ مزنیں جیڈھ اِنت، تمباکو ءِ چاگردی ءُ اقتصادی اثرات سک باز اَنت، اے رسک آنی تہ ءَ لس سرپدی ءِ مہم ءُُ جوانیں گلوبل پالیسی آنی سر ءَ عمل کنگ ءِ وسیلگ ءَ کم کنگ بوت کنت۔ آئی ءَ اے ھیالانی درشانی ’’ڈبلیو ایچ او ءِ گلوبل تمباکو ءِ وبا ءِ رپورٹ 2025 ءُ تمباکو ءِ اشتہار، پروموشن ءُ اسپانسر شپ ءِ جوانیں گلوبل مثال (TAPS) ءُ گرافک ہیلتھ وارننگ (GHWs)‘‘ ءِ سرھال ءَ ادا برجم داشتگیں گپ ءُ تران ءِ ساھت ءَ کتگ۔ اے مراگش سوسائٹی فار پروٹیکشن آف دی چائلڈ ءِ نیمگ ءَ برجم دارگ بوتگ ات کہ ایشی ءِ تہ ءَ ڈبلیو ایچ او ءِ فریم ورک کنونشن برائے تمباکو کنٹرول ءُ ایشی ءِ ایم پاور ءِ گامگیج آنی رد ءَ پاکستان ءِ پیشرفت ءِ چار ءُ تپاسی کنگ بوتگ ات۔ مراگش ءِ مستریں مہمان پاکستان ءِ مملکت ءِ جارکش مرتضی سولنگی ءَ گوشت کہ تمباکو ءِ کارمرد کنگ ءَ چہ سرجمیں دگنیا ءَ ھر سال 8 ملین ءَ چہ گیش مردم بیران بنت کہ اے ایچ آئی وی، ٹی بی ءُ ملیریا ءِ سبب ءَ یکجاھیں بیرانی ءَ چہ گیش اِنت۔ پاکستان ءَ 27 ملین مردم تمباک ءِ کارمرز کن اَنت ءُ سالے 166 ہزار مردم تمباک ءِ کشگ ءِ سوب ءَ بیران بنت۔ تمباکو ءِ چاگردی ءُ معاشی اثرات سک باز انت ءُُ پاکستان سرپدی، وانگ ءُُ زانگ ءُُ گلوبل بیسٹ پالیسی آنی سر ءَ عمل کنگ ءِ وسیلگ ءَ جوانیں پیشرفت کت کنت۔ آئی ءَ تمباکو ءِ تاوان آنی بابت ءَ چاگرد آناں سرپدی دیگ ءُُ رکاوٹ ءِ چاگرد ءِ دیمروئی ءِ سر ءَ زور پر دات۔ آئی ءَ گوشت کہ پاکستان تمباکو ءِ اشتہار، پروموشن ءُُ اسپانسر شپ ءِ توامیں چینل آناں کم کنگ ءُُ جان سلامتی ءِ ھترہ آناں کم کنگ ءِ واستہ گرافک ہیلتھ وارننگ (جی ایچ ڈبلیو) ءِ برجمیں ھستی ءَ را گیش کنگ ءَ چہ وتی کوشست آناں گیش مھکم کت کنت۔ مراگش ءَ گوں تران کنان ءَ راجی اسمبلی ءِ راجی جان سلامتی ءِ قائمہ کمیٹی ءِ چیئرمین ڈاکٹر مہیش کمار ملانی ءَ گوشت کہ رپورٹ ءِ ڈیٹا ءَ چہ ورنا آنی رکھینگ ءِ واستہ گیشیں گامگیج آنی ضلورت ءِ پدر بوھگ ءَ اِنت۔ پروموشنل سرگرمیاں، دلکشیں پیکیجنگ، جتا جتائیں مراگشاں گوں ہمگرنچ بوہگ ءُُ آن لائن ءِ ہست بوہگ ءَ چہ ورناہاں اثر مند بوت کنت، ہما ملک کہ ٹی اے پی ایس ءِ جامع پابندی ءِ سرا عمل کنگ بوتگ انت آہاں ورناہاں تمباکو ءِ کارمرز کنگ ءِ تہا زاہریں کمی گندگ بوتگ۔ آئی ءَ جی ایچ ڈبلیو ءِ گہتری ءُُ جوانیں رنگ ءَ عمل درآمد ءِ واستہ پالیسی آناں مھکم کنگ ءِ لوٹ کت۔ راجی اسمبلی ءِ باسک ڈاکٹر شازیہ صوبیہ اسلم سومرو ءَ گوشت کہ پاکستان ءَ اگاں چہ جوانیں پیشرفت کتگ بلے گیش مھکمیں گامگیج آنی وسیلگ ءَ الس ءَ را جوانیں رنگ ءَ رکھینگ ءَ کمک رسیت۔ ھاسیں ءُُ ھمگرنچیں رھبند المی اَنت دانکہ ٹیپس ءِ رد ءَ ھما ھرابیں چیز جوڑ مہ بنت کہ تمباکو ءِ گر ءُ دار ءِ کوشست آنی تہ ءَ رکاوٹ بہ بنت۔ آئی ءَ زور پر دات کہ مزنیں ءُُ بصری جی ایچ ڈبلیو سگریٹ نوشی آناں وتی عادت ءِ سر ءَ دوبر ھیال ءُُ لیکہ کنگ ءُُ ورنا آناں بندات کنگ ءَ چہ رکّینگ ءِ تہ ءَ موثر انت۔ خیبر پختونخوا ءِ سر وزیر ءِ پیسریگیں انفارمیشن ایڈوائزر بیرسٹر ڈاکٹر محمد علی سیف ءَ گوشت کہ ٹی اے پی ایس انگت یک انچیں پڑ اِنت کہ ایشی ءِ سر ءَ مدام دلگوشی دیگ لوٹ ایت۔ آئی ءَ گوشت کہ پوائنٹ آف سیل ءِ سر ءَ مارکیٹنگ ءُُ آن لائن ایڈورٹائزنگ مزنیں چیلنج اَنت۔ آئی ءَ ڈبلیو ایچ او ءِ رپورٹ آنی حوالہ ءَ داتگ کہ ھما ملک آنی تہ ءَ ٹیپس ءِ کانود آنی سر ءَ سک باز عمل کنگ بیت آھاں ورنا آنی تہ ءَ سگریٹ نوشی ءِ تہ ءَ مزنیں کمی یے گندگ بوتگ۔ اسپارک پروگرام ءِ منیجر ڈاکٹر خلیل احمد ڈوگر ءَ گشتگ کہ اگاں چہ پابندی است انت بلے اشتہار ءِ کار انگت ءَ صارفین ءِ رویہ ءَ را ظریفیں رنگ ءَ اثر انداز کن انت۔ اے دیوان ءَ پالیسی ساز، اھوالکار، سول سوسائٹی ءِ نمائندہ، اکیڈمک زانتکار، رسانکدر ءِ پیشہ ور ءُ ورنا آں بھر زوری کتگ۔ شریک داروکاں جی ایچ ڈبلیو ءُ ٹی اے پی ایس ءِ سر ءَ عمل درآمد ءِ تہ ءَ پاکستان ءِ پیشرفت ءِ چار ءُُ تپاسی کت ءُ سرجمیں ملک ءَ تمباکو ءِ کنٹرول ءَ را مھکم کنگ ءِ واستہ یکجاھیں گامگیج ءُُ گہتریں ضوابط ءِ ارزشت ءِ سر ءَ زور پر دات۔