زھگ کجام ھم راج ءِ ارزشت داریں مڈی اَنت، آھاں دیمروئی ءِ واستہ برابریں موہ پجارینگ راجی ذمہ واری اِنت، سردار ایاز صادق

اسلام آباد۔ 19نومبر (اے پی پی): راجی اسمبلی ءِ اسپیکر سردار ایاز صادق ءَ گوشت کہ زھگ کجام ھم راج ءِ آیوکیں باندات ءُ ارزشتی ایں مڈی انت۔ پاکستان ءِ زھگ آناں جوانیں وانگ ءُُ زانگ، جوانیں جان سلامتی، موثر رکھینگ ءُُ دیمروئی ءِ واستہ یک وڑیں موہ ءِ پجارینگ نہ ایوک ءَ ریاست ءِ بلکیں چاگرد ءِ تہ ءَ ھر یک مردمے ءِ راجی ذمہ واری اِنت۔ آئی ءَ اے ھیالانی درشانی اقوام متحدہ ءِ چیردستی ءَ ھر سال 20نومبر ءَ برجم دارگ بوھوکیں یونیورسل چلڈرن ڈے ءِ موہ ءَ وتی پیغام ءِ تہ ءَ کت۔ اسپیکر سردار ایاز صادق ءَ گوشت کہ زھگ گریبی، زوراکی، زوراکی، استحصال، نادراھی، جنسی جرم ءُ وانگ ءُ زانگ ءَ چہ زبھری ءِ وڑیں مزنیں جیڈھ آنی دیمپانی ءَ انت، ایشی ءِ واستہ زوتیں ءُ موثریں گامگیج المی انت۔ آئی ءَ زھگانی سر ءَ ھرچ وڑیں زلم ءُ زوراکی ءِ گر ءُ دار ءِ واستہ کانود سازی ءِ جوانیں رنگ ءَ عمل درآمد ءَ را دل یکیمی کنگ ءِ ضلورت ءِ سر ءَ زور پر دات۔ آئی ءَ گوشت کہ پارلیمنٹ ءَ زھگانی رکھینگ ءِ واستہ بازیں ھاسیں گامگیج چست کتگ، ایشانی تہ ءَ زھگ آنی رکھینگ ءِ کانود، مجبوری ءِ گر ءُ دار، اسکول آنی ایمنی ءِ معیار آنی تہ ءَ گہتری ءُ زھگ آنی سر ءَ بوتگیں جرم آنی واستہ ترندیں انصاف ءِ واستہ کانودی اصلاحات ھوار اَنت۔ آئی ءَ گیش گوشت کہ پارلیمانی کاکس برائے چائلڈ رائٹس سرجمیں ملک ءَ زھگ آنی ھک آنی دیمروئی ءُُ رکھینگ ءِ تہ ءَ سرگرمیں کرد پیلو کنگ ءَ اِنت۔ سردار ایاز صادق ءَ گوشت کہ پاکستان ءِ آیوکیں باندات ھما وھد ءَ ایمن بوت کنت کہ ھمک زھگ ایمن بہ بیت، وانندہ بہ بیت ءُ توانمند بہ بیت۔ آئی ءَ گوشت کہ اگاں زھگ آنی گہبودی ءِ واستہ راجی روڈ میپ، والدین آناں سرپدی، استاد آنی جوانیں کرد ءُُ ریاستی ادارگ آنی مھکمیں گامگیج یکجائی ءِ تہ ءَ جنزان بہ بنت گڈا پاکستان راستی ءَ دیمروئی ءِ کشک ءَ دیم ءَ شُت کنت۔ راجی اسمبلی ءِ ڈپٹی اسپیکر سید غلام مصطفیٰ شاہ ءَ ھم زھگانی جھان ءِ روچ ءِ درگت ءَ وتی کلوہ ءِ تہ ءَ گوشت کہ زھگانی ھک آنی رکھینگ راجی دیمروئی ءِ بنیات اِنت۔ آئی ءَ گوشت کہ ریاست ءِ ذمہ واری انت کہ آ ھمک زھگ ءَ را ایمنیں چاگرد پجارینگ ءُ معیاریں وانگ ءُ زانگ ءُ شرپداریں باندات ءِ پجارینگ بہ کنت۔ ڈپٹی اسپیکر ءَ گیش گوشت کہ زھگ آنی ھک آنی رکھینگ ءِ واستہ کانود سازی، پالیسی سازی ءُُ ادارگی اصلاحات ءِ عمل ءَ را گیش موثر جوڑ کنگ ءِ واستہ پارلیمنٹ وتی کرد ءَ را برجاہ دار ایت تانکہ پاکستان ءِ زھگ ایمن بہ بنت، توانمند بہ بنت ءُُ آیوکیں باندات ءِ رژناہ بہ بنت۔