وزیراعظم شہباز شریف نا کماشی ٹی دیوان، بروک آ سال بشام اٹی ہروڑنا جونی ومالی نسخان تیان بچنگ کن داسی آن تیاری نا پارت

اسلام آباد۔ 19 نومبر (اے پی پی) وزیراعظم محمد شہباز شریف بروک آ سال بشام اٹی ہروڑنا جونی ومالی نسخان تیان بچنگ کن داسی آن تیاری نا پارت کرساپارینے کہ وزارت موسمیاتی بدلی، وزارت ڈٹ بندی و نیشنل ڈیزاسٹر مینجمنٹ اتھارٹی (این ڈی ایم اے) صوبائی حکومت آتون اواری اٹ موسمیاتی بدلی نا بابت جوان ڈٹ سازی کے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی موسمیاتی بدلی تا مضراثرات آتیان بچنگ نا حکومتی حکمت عملی آ جاچ دیوان چارشنبے نادے آداڑے اڈ ہلک۔ وزیراعظم دیوان اٹی پارت کرے کہ بروک آ سال بشام نا نسخان تیان بچنگ کن داسی آن تیاری کننگے، وزارت موسمیاتی بدلی ، وزارت ڈٹ بندی و این ڈی ایم اے صوبائی حکومت آتون اواری اٹ موسمیاتی بدلی نا بابت مربوط ڈٹ سازی کے۔ اودِیر انا گچین بست وبند انا بابت قومی کہول آ ڈٹ سازی کن نیشنل واٹر کونسل نا دیوان ءِ اڈتننگ نا تیاری نا ہم پارت کرے۔ وزیراعظم پرمان کرے کہ پیش کروک گونڈ مدی ڈٹ آ دمدستی عملدرآمد نا بناءِ کننگے۔ اوپارے کہ پاکستان پدتموک ملک ءِ، ہر مسٹ میکو سال موسمیاتی بدلی نا مضراثرات آتیا جی ڈی پی نا خاطرخواہ بشخ خڑچ کروئی تمک و نہادی و کچ اٹنگا وسیلہ غاک شونداری نا جاگہ غا موسمیاتی بدلی نا مضراثرآتیان بچنگ کن استعمال مریرہ۔ وزیراعظم پارے کہ پاکستان ہرانا موسمیاتی بدلی ٹی کڑد مفننگ نا بریبر ءِ، موسمیاتی بدلی نا مضراثرآتا پلویڑ اٹی ءِ۔ دیوان اٹی بنجائی وزیراحسن اقبال، احدخان چیمہ، محمد اورنگزیب،ڈاکٹر مصدق ملک، عطاء اللہ تارڑ و تعلقدار بڑزکو کمامدارآک بشخ ہلکر۔ دیوان ءِ بروک آ سال بشام نا بابت ٹک آتا جہانی کساس آتیا حوال تننگا۔ دیوان ءِ وزارت موسمیاتی بدلی نا کنڈآن گونڈ، نیام و مریس مدی ڈٹ آتیا حوال تننگا۔ وزیراعظم گونڈ مدی ڈٹ آتا منظوری ءِ ترسا دمدستی عملدرآمد نا بناءِ کننگ نا پارت کرے۔