سورک و روبیلا نا ناجوڑی چناتا جون و آخبت ہڑتوم آتیکن خطرناک ءِ، بنجائی وزیر جان جوڑی سید مصطفیٰ کمال

اسلام آباد۔ 19 نومبر (اے پی پی) بنجائی وزیر جان جوڑی سید مصطفیٰ کمال پارینے کہ سورک و روبیلا نا ناجوڑی چناتا جون و آخبت ہڑتوم آتیکن خطرناک ءِ ، جہانی ادارہ غاتا کمک اٹ دا ناجوڑی نا برخلاف قومی ویکسین مہم نا بناءِ کننگ انگ ءِ، دا ویکسین مچ آ دنیا ٹی آزموندہ ، رکھوک و المی تکنگک۔ چارشنبے نادے آ حضرت بری امام کمیونٹی ہیلتھ سینٹر اسلام آباد اٹی سورک و روبیلا ویکسی نیشن مہم نا مرکزی دود اس اڈتننگا، ہراٹی بنجائی وزیر جان جوڑی سید مصطفیٰ کمال خصوصی بشخ ہلک۔ جہانی ادارہ جان جوڑی (ڈبلیو ایچ او) ، یونیسیف ، گاوی تون اوار چندی ہندی و جہانی ادارہ غاتا نمائندہ غاک ہم دود اٹی ساڑی ئسر۔ بنجائی وزیر جان جوڑی سید مصطفیٰ کمال داوخت آ تینا تران اٹی پارے کہ جہانی ادارہ غاتا کمک اٹ حکومت ءِ جان جوڑی نا بشخ اٹی بھلو آسراتی دُوبریک۔ اوپارے کہ پاکستان دنیا نا بھلا آبادی والا ملک آتیٹی اوار ءِ، و ناجوڑی تا تالانی چناتا زند ءِ پین خطرہ غاتا گواچی کیک۔ اوخبڑدار کرے کہ سورک و روبیلا لاحق مننگ آن بچنگ بینائی آن محروم یا دماغی ژند ہم مننگ کیک، ہنداسوب آن لمہ وباوہ رکھی ٹیکہ غاتیٹی ڈیوالئی کپس ۔ سید مصطفیٰ کمال پارے کہ مچ آ دنیا ٹی 55 ناجوڑی تا برخلاف ویکسین ساڑی ءِ، وخت اس کہ پاکستان اٹی داسہ بیرہ 13 ویکسین کاریم اٹ اتنگک۔ اوپارے کہ سورک و روبیلا ویکسین جہانی پٹ وپول آن پک مروک و پورو رکھوک ءِ و دا ہرگلی محلہ ٹی مفت دستیاب ءِ۔ تینا تران اٹی وزیرجان جوڑی کینسر نا بابت جہانی پیش رفت نا ذکر ءِ کرسا پارے کہ دنیا ٹی کینسر آن بچفنگ نا ویکسین تیار مسنے و بروک آ دہ سال اٹی مچ آ دنیا ٹی اسہ بندغ اس ہم کینسر آن کسپک، ولے پاکستان اٹ دابارواٹی بے گرج شرہ و شک و شبہ مون آبننگ کیک۔ اوپارے کہ ہسپتال آتیٹی رش ودنگ ءِ و ناجوڑ آتے تینا واری کن گھنٹہ انتظار کروئی تمک، ہنداسوب آن ناجوڑی تیان بچفنگ و جان جوڑ زند انا وڑءِ تینا کننگ نا رجحان ءِ مون آ دروئی مریک۔ اہل محلہ و راجی کارندہ غاتیان خواست کننگاکہ او ویکسین ٹیم آتون پبی کمک کیر، انتئے کہ راج انا اسہ بندغ ءِ ناجوڑی آن بچفنگ نیکی و قومی زمواری ءِ۔ دود آن تران کرسا جہانی ادارہ جان جوڑی نا نمائندہ ڈاکٹر ڈیبینگ پارے کہ چناتا جان جوڑی ہر قوم انا بایدے اولیت مرے۔ اوسورک و روبیلا ویکسین ءِ رکھوک و چناتیکن بے کچ المی گوندسا 17 آن 29 نومبر برجاقومی مہم نا ستاءِ کرے۔ یونیسیف نا نمائندہ ڈاکٹر پرمیلا آر این پارے کہ دا مہم جہانی ادارہ غاتا شریداری اٹ بناکننگانے تانکہ کم وئی ٹی مون تروک خطرناک ناجوڑی تیان چناتے رکھ کننگ مرے۔ اولمہ و باوہ غاتیا زور شاغا کہ 6 تُو آن 5 سال اسکان نا چناتے المی ویکسین خلفر، انتئے کہ سورک چناتا جون اکن بھلو خطر اس جوڑ مننگ کیک۔ دود انا ایسر آ وزیرجان جوڑی لمہ و باوہ، کمیونٹی و ادارہ غاتیا زور شاغا کہ او رکھی ٹیکہ جات نا دا قومی مہم ءِ سرسہب کننگ اٹ تینا کڑد ءِ ادا کیر۔