پاکستان ءُ چین توانائی ءُ معدنیات ءِ شوبگ ءَ اسٹریٹجک سیادی، کمک ءَ را گیش مھکم کنگ ءِ سر ءَ تپاک کن اَنت

اسلام آباد۔19نومبر  (اے پی پی): پاکستان ءُ چین ءِ توان ءُ معدنیات ءِ شوبگ ءَ اسٹریٹجک سیادی ءُ کمک ءَ را گیش مھکم کنگ ءِ سر ءَ تپاک کتگ ۔ دوئیں ملک آں توان ءُ معدنیات ءِ شوبگ ءَ کمک ءَ را نوکیں کوڑا آنی تہ ءَ سر کنگ ءِ واستہ وتی جزم ءِ یک رندے پدا گوشت۔ چار شمبے ءِ روچ ءَ پٹرولیم ءِ وفاقی وزیر علی پرویز ملک ءُ پاکستان ءَ چین ءِ سفیر جیانگ زے تونگ ءَ اسلام آباد ءَ چین ءِ سفارتخانہ ءَ گند ءُ نند کتگ ات، ایشی ءِ تہ ءَ پاکستان ءُ چین ءِ نیام ءَ مھکم ءُ دیریں شریکداری ءِ عزم ءِ پدا پدر کنگ بوتگ ات۔ گند ءُ نند ءَ توانائی ءُ معدنیات ءِ شوبگ ءَ کمک ءَ را گیش مھکم کنگ ءِ سر ءَ ھیال ریچی کنگ بوت ءُ دمگی استحکام ءُ یکجائی اقتصادی دیمروئی ءِ وژن ءِ سر ءَ ھم ھیال ریچی کنگ بوت۔ وفاقی وزیر علی پرویز ملک ءَ چین ءَ را پاکستان معدنی سرمایہ کاری فورم 2026 ءَ بہر زورگ ءِ باقاعدہ دعوت داتگ آئی ءَ گوشت کہ کان کنی ءِ شوبگ استیں حکومت ءِ اولی ترجی اِنت ایشی ءِ تہ ءَ دو نیمگی کمک ءَ را گیش کنگ ءِ واستہ مزنیں موہ است اَنت۔ چینی سفیر ءَ اے دعوت ءَ را وش اتک کنان ءَ وتی سرجمیں کمک ءِ دل یکیمی دات۔ آئی ءَ گوشت کہ ما وتی سیادی داروکیں ادارگ آنی سروک آناں پاکستان معدنی سرمایہ کاری فورم ءَ بھر زوری ءِ واستہ دلبڈی کناں۔ آئی ءَ گوشت کہ چین ءُ پاکستان ءِ نیام ءَ معدنیات ءِ شوبگ ءَ کمک یک ھاسیں بن پد اِنت ءُ پاکستان ءِ پٹرولیم ءُ معدنیات ءِ شوبگ ءَ چینی کمپنی سرگرمیں کرد پیلو کنگ ءَ اَنت۔ ایم سی سی ءُ سی این او سی اے شوبگ ءَ برجمیں رنگ ءَ کار کنگ ءَ انت وھدے کہ سینڈاگ ءَ ھوار دگہ منصوبگ چینی سرمایہ کاری ءِ ھاسیں جلوہ انت۔ وفاقی وزیر علی پرویز ملک ءَ مشکلیں اقتصادی وھد ءَ چین ءِ مدام ءُ مخلصانہ کمک ءِ سر ءَ دل ءِ تہ ءَ منت واری ءِ درشان کت۔ آئی ءَ گوشت کہ پاکستان ھمک پڑ ءَ وتی چینی برات آنی گوما اوشتاتگ ءُ چین ءِ وت واجہی ءُ دمگی برجائی ءِ سرجمیں کمک ءَ کنت۔ چینی سفیر ءَ پاکستان ءِ اصلاحات ءِ ایجنڈا ءِ توسیپ کت ءُ ایشی ءَ را پائیدار دیمروئی ءِ نیمگ ءَ یک ھاسیں گامگیج ءِ لیک ات۔ آئی ءَ گوشت کہ ما پاکستان ءِ دیمروئی ءِ واستہ جزمیگ آں ءُ وت مہ وتی کمک ءِ وسیلگ ءَ پاکستانی الس ءِ اقتصادی دیمروئی ءِ واستہ وتی کرد ءَ برجاہ دار ایں ۔ دیوان ءِ آسر ءَ دوئیں ملک آنی اے جزم ءِ پدا زور دیگ بوت کہ موسم ءِ آزمائش ءَ چہ بوتگیں اسٹریٹجک شراکت داری ءَ را گیش مھکم کنگ ءُ سرمایہ کاری ءُ مشترکہ وشھالی ءِ ھاترا نوکیں راہ پچ کنگ بہ بنت ھاسیں رنگ ءَ توانائی ءُ معدنیات ءِ شوبگ ءَ کمک ءَ را نوکیں بالاد ءَ سر کنگ بہ بیت۔