تعلیم ہر قوم اکن غٹ آن نہادی سرمایہ مریک، بنجائی وزیر خالد حسین مگسی

اسلام آباد۔ 19 نومبر (اے پی پی) بنجائی وزیر سائنس و ٹیکنالوجی خالد حسین مگسی پارینے کہ تعلیم ہر قوم اکن غٹ آن نہادی سرمایہ مریک، پاکستان ءِ ہمو ورناتا گرج ءِ ہرا پٹ وپول، ٹیکنالوجی، انجینئرنگ ، زرگزرانی ڈٹ بندی و ڈیجیٹل جدیدیت نا کمک اٹ جہانی آب انا مقابلہ ءِ کننگ کیر۔ بنجائی وزیر چارشنبے نادے آ کامسیٹس یونیورسٹی واہ کیمپس نا کانووکیشن اٹی بطور مہمان خاص بشخ ہلک، ہراڑے او فارغ التحصیل خوانوک آ مار و مسن تیٹی سند بشخا و اوفتا تعلیمی سفر نا پوروی آ مبارکبادی پیش کرے۔ دود آن تران کرسا بنجائی وزیر پارے کہ تعلیم ہرقوم انا غٹ آن واکدار سرمایہ ءِ۔ اوداوخت آ ورنا چین ءِ پاکستان نا غٹ آن نہادی میرات گوندسا پارینے کہ ملک انا شونداری کن پوسکن، تخلیقی و ایسر اس پٹوک آ سوچ ءِ مون آدننگ بھاز المی ءِ۔ خالد حسین مگسی پارے کہ پاکستان ءِ ہمو ورناتا گرج ءِ ہرا پٹ وپول، ٹیکنالوجی ، انجینئرنگ ، زرگزرانی  ڈٹ بندی و ڈیجیٹل جدیدیت نا کمک اٹ جہانی آب انا مقابلہ ءِ کننگ کیر۔ اواصرار کرے کہ پوسکن پٹ وپول، اختراع و کسب آ تالان تعلیم ہی پاکستان ءِ شونداری نا پوسکن آ دور اٹی پتریفنگ کیک۔ اومستی پارے کہ ورناک ملکی زرگزران، علم، اخلاق ، جدت و سرکڑدہ ئی ءِ تینا اصول جوڑ کیر و پاکستان نا شونداری ٹی تینا فعال کڑد ءِ ادا کیر۔ اوپارے کہ پاکستان نا آخبت ورناتا لائخی تتون وابستہ ءِ، و اینو نا دا فارغ التحصیل طالب علم  آک ننکن اومیت نا پوسکن آ روشنائی ءُ، ایسر اٹی بنجائی وزیر کامسیٹس یونیورسٹی واہ کیمپس نا استاد، انتظامیہ و لمہ و باوہ غاتاہم ستاءِ کرے ہرافک طالب علم آتا سرسہبی ٹی پبی کڑد ادا کریر۔ اوداعزم انا درشانی ءِ کرے کہ وزارت سائنس و ٹیکنالوجی پاکستان اٹ پٹ وپولی چاگڑد ءِ گچین کننگ و علمی ادارہ غاتے پوسکن آسراتی فراوان کننگ کن کاریم ءِ برجاتخک۔