شزہ فاطمہ خواجہ ءَ گوشت کہ پاکستان ءِ ڈیجیٹل وژن ملائیشیا ءِ ڈیجیٹل معیشت ءِ مول ءُ مراد آنی گوما سرجمی ءَ ھمگرنچ اِنت، ءُ ڈیجیٹل پالیسی ءِ گپ ءُ تران ءِ بندات کنگ ءِ پیشکش کتگ

باکو۔18نومبر  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ پاکستان ءِ ڈیجیٹل وژن ملائیشیا ءِ ڈیجیٹل معیشت ءِ مول ءُ مراد آنی گوما سرجمی ءَ ھمگرنچ اِنت، ءُ دوئیں ملک آنی نیام ءَ ڈیجیٹل پالیسی ءِ گپ ءُ تران ءِ بندات کنگ ءِ پیشکش کتگ۔ سئے شمبے ءِ روچ ءَ آئی ٹی ءُ ٹیلی کام ءِ وزارت ءِ نیمگ ءَ جاڑی بوتگیں بیان ءِ رد ءَ وفاقی وزیر شزہ فاطمہ خواجہ ءَ ورلڈ ٹیلی کمیونیکیشن ڈویلپمنٹ کانفرنس ءِ ساھت ءَ ملائیشیا ءِ وزیر کمیونیکیشن احمد فہمی محمد فاضل ءَ گوں گند ءُ نند کتگ، ایشی ءِ تہ ءَ دوئیں نیمگ ءَ پاکستان ءُ ملائیشیا ءِ نیام ءَ مھکمیں سیادی ءِ ساڑاتگ بوتگ۔ وفاقی وزیر ءَ گوشت کہ پاکستان ءِ ڈیجیٹل وژن ملائیشیا ءِ ڈیجیٹل معیشت ءِ مول ءُ مراد آنی گوما سرجمی ءَ ھمگرنچ اِنت۔ آئی ءَ پاکستان ءِ ترندی ءَ گوں دیمروئی کنوکیں آئی ٹی انڈسٹری ءُ 6لکھ ءَ چہ گیش ٹیک پروفیشنل آناں مزنیں مھکم لیک اِت۔ دوئیں نیمگ ءَ ملائیشیا ءُ پاکستان ءِ آئی سی ٹی برآمد ءِ رجحان ءَ را گیش دیمروئی دیگ ءِ واستہ وتی جزم ءِ پدا زور دات۔ شزہ فاطمہ خواجہ ءَ دوئیں ملک آنی نیام ءَ ڈیجیٹل پالیسی ءِ گپ ءُ تران ءِ بندات کنگ ءِ پیشکش کتگ۔ وفاقی وزیر ءَ مصنوعی ذہانت، ڈیٹا سائنس، ءُ ایندگر شوبگ آنی تہ ءَ ٹیلنٹ ءِ نقل و حرکت ءُ مہارت ءِ سیدھ ءِ سوج داتگ۔ شزہ فاطمہ خواجہ ءَ سائبر سیکورٹی ءُ ڈیجیٹل کنٹینٹ ءِ تہا یکجائی گامگیج آنی بابت ءَ گپ ءُ تران کت۔ ایشی ءَ ابید آئی ٹی ءِ وفاقی وزیر ءَ آذربائیجان ءِ آسن خدمت سینٹر ءِ تر ءُ تاب کت۔ شزہ فاطمہ خواجہ ءَ آذربائیجان ءِ شہری خدمات ءِ ماڈل ءَ را ڈیجیٹل گورننس ءِ جوانیں مثال لیک اتگ۔ پاکستانی ڈل ءَ را ای گورننس، شہری ازمت ءِ پجاری، ءُ ڈیجیٹل یکجاھی ءِ ماڈل آنی ھوالگ ءَ سرجمیں بریفنگ دیگ بوت۔ وفاقی وزیر شزہ فاطمہ خواجہ ءَ آسن خدمت میڈیا ءَ گوں انٹرویو ھم داتگ۔ اے موہ ءِ سر ءَ شزہ فاطمہ خواجہ ءَ گوشت کہ مزن وزیر شہباز شریف ءِ گوستگیں آذربائیجان ءِ تر ءُ تاب ءَ پد پاکستان ءُ آذربائیجان ءِ نیام ءَ سیادی گیش مھکم بوتگ انت۔ آئی ءَ گوشت کہ دوئیں ملک ڈیجیٹل کمک، ٹیکنالوجی شریکداری ءُ سرکاری ازمت آنی تبادلہ ءِ نوکیں دور ءَ داخل بوھگ ءَ انت۔ وفاقی وزیر ءَ گوشت کہ شہری مرکز ءِ ڈیجیٹل سروسز پاکستان ءِ ڈیجیٹل اصلاحات آنی مستریں محور انت۔ شزہ فاطمہ خواجہ ءَ گوشت کہ اسلام آباد ءَ پائلٹ پروجیکٹ ءَ چہ پد آ سرجمیں پاکستان ءَ آسن خدمت ءِ وڑیں شہری ازمت ءِ مراگش جوڑ کنگ لوٹ اَنت۔