70 درسد نادراہی سلیں آپ ءِ سبب ءَ بنت ءُ ایشی ءِ دیم ءَ دارگ ءِ یکیں راہ اِنت، وفاقی جان سلامتی ءِ وزیر مصطفیٰ کمال

اسلام آباد۔18نومبر  (اے پی پی): وفاقی جان سلامتی ءِ وزیر مصطفیٰ کمال ءَ گشتگ کہ 70درسد نادراہی آماچیں آپ ءِ سبب ءَ بنت ءُ ایشی ءِ گر ءُ دار ایوکیں گیواری انت۔ ویکسینیشن، ساپیں آپ، احتیاط ءُ لائف اسٹائل میڈیسن ءِ دیمروئی ءَ چہ جان سلامتی ءِ نظام ءَ را دیمروئی دیگ ءِ وھد ءِ ضلورت اِنت، آئی ءَ اے ھیالانی درشانی ذیابیطس ءُ ہربل میڈیسن ءِ ھوالگ ءَ دو روچی دمگی سیمینار ءِ بنگیجی مراگش ءَ گوں تران کنان ءَ کت۔ آئی ءَ گوشت کہ بوٹگ ءُ بوٹگ آنی جوانیں کارمردی شکر ءِ نادراھی ءِ درمان کنگ ءَ کارآمد اِنت، طبی ماہرین راست گْوش اَنت کہ ”شکر ھرچ نادراھی ءِ مات اِنت“ ءُ پاکستان ءِ ھر چارمی شہری ھمے نادراھی ءِ آماچ بوتگ۔ آئی ءَ من اِت کہ پاکستان ءِ طبی نظام ءِ جاور ھال ھراب اَنت، وھدے کہ نادراھجاھ چہ نادراھاں پُر اَنت۔ آئی ءَ گوشت کہ چنچو نادراھجاہ جوڑ کنگ بہ بنت نادراھی آنی سرجمیں الاج ھما وھد ءَ ممکن نہ اِنت ھما وھد ءَ کہ احتیاطی، لائف اسٹائل میڈیسن ءُ السی جان سلامتی ءِ بنجاھی نظام ءَ را مھکم کنگ مہ بیت۔ مصطفیٰ کمال ءَ اے گپ ءِ سر ءَ زور پر دات کہ ”چہ درمان ءَ رکّینگ شرتر اِنت“ ءُ ملک ءَ نادراھیانی شنگ ءُ تالان بوھگ ءِ مستریں سبب سلیں آپ ءُ نا شریں گند ءُ نند ءِ نظام اِنت۔ آئی ءَ گوشت کہ 70 درسد بیماری گندیں آپ ءِ سبب ءَ بنت، اگاں ساپیں آپ پجارینگ بہ بیت گڈا اسپتال آنی سر ءَ بوجھ 70 درسد کم بوت کنت۔ آئی ءَ گوشت کہ گلگت بلتستان ءَ چہ کراچی ءَ آیوکیں آپ آلودگی ءِ سوب جوڑ بنت، پمیشکا بنجاہی تک ءَ سیوریج ٹریٹمنٹ سسٹم جوڑ کنگ المی انت۔ وفاقی جان سلامتی ءِ وزیر ءَ گوشت کہ 13 مزنیں نادراھی آنی گر ءُ دار ءِ واستہ ھر زھگ ءَ را مفت ویکسین دیگ بیت بلے یک سیکشن ءِ ویکسین ءِ ھلاپ ءَ مہم چلائینگ ءَ اِنت کہ ایشی ءَ را گیش ءُ گیوار کنگ المی اِنت۔ ہربل میڈیسن ءَ را وتی دل ءِ نزیکیں سرھال ءِ رنگ ءَ بیان کنان ءَ گوشت کہ قدرتی نظام ءِ نزیک ءَ علاج آناں دیمروئی دیگ وھد ءِ لوٹ اِنت۔ گڈسرا جان سلامتی ءِ وزیر ءَ گوشت کہ راجی جان سلامتی ءِ شوبگ ءَ اصلاحات ءِ سر ءَ ترندی ءَ گوں کار کنگ بوھگ ءَ اِنت ءُ نادراھیانی شنگ ءُ تالان ءَ را ایوک ءَ گر ءُ دار ءِ گامگیج، ساپیں آپ، جوانیں زندمان ءُ نوکیں پٹ ءُ پول ءِ وسیلگ ءَ کنٹرول کنگ بوت کنت۔