حکومت ءَ معیشت ءَ را ڈکال ءَ چہ دیمروئی ءِ نیمگ ءَ ءُ دری پالیشی ءَ را ایوک ءَ چہ جھان ءِ ارزشت ءِ نیمگ ءَ روان داتگ، دوستیں ملک آنی گوما دو نیمگی تجارت ءَ ھوار جتا جتائیں پڑ آنی تہ ءَ کمک ءَ را دیم ءَ برگ بوھگ ءَ اِنت، عطا اللہ تراڑ

اسلام آباد۔ 17 نومبر (اے پی پی): وفاقی وزیر ءِ اھوالکاری ءُ شنگ کاری عطا اللہ تراڑ ءَ گوشت کہ حکومت ءَ معیشت ءَ را بحران ءَ چہ دیمروئی ءِ نیمگ ءَ ءُُ درملکی سیادی ءَ را انزوا ءَ چہ جھان ءِ ارزشت ءَ را دیم ءَ برتگ، دوستیں ملک آنی گوما دو نیمگی تجارت ءَ ھوار جتا جتائیں پڑ آنی تہ ءَ کمک ءَ را دیم ءَ برگ بوھگ ءَ اِنت، پاکستان ءَ نہ ایوک ءَ پالیسی ءِ چیر دستی ءَ یک راستیں گامگیج زرتگ۔ سفارتی پڑ ءَ سوبمندی ءِ آسر ءَ اے سوبمندی سول ءُُ فوجی سروکی ءِ نیام ءَ استیں مثالی ہم آہنگی ءِ آسر انت ایشی ءِ تہ ءَ مزن وزیر شہباز شریف ءُُ فیلڈ مارشل سید عاصم منیر ھوار انت۔ آئی ءَ اے ھیالانی درشانی دو شمبے ءِ روچ ءَ سانور انسٹی ٹیوٹ ءِ نیمگ ءَ برجم داشتگیں ’’بدل بوھوکیں دگنیا ءِ تہ ءَ پاکستان ءِ کرد‘‘ ءِ سرھال ءَ گپ ءُُ تران ءَ گوں تران کنان ءَ کت۔ وفاقی وزیر ءِ اھوالکاری ءَ گوشت کہ تحریک انصاف ءِ دور ءَ دوستیں ملک آزار بوتگ اَنت بلے استیں حکومت ءِ دور ءَ پاکستان ءَ را دری پالیشی ءِ رد ءَ سک کمیں وھد ءِ تہ ءَ پدا ھاسیں ارزشت زرتگ۔ گْوستگیں دو سالانی وئیلاں ھاس مئی ءِ جنگ ءَ پد ءِ جاوراں مئے راجی پجار نوکیں رھشونی یے داتگ۔ وفاقی وزیر ءَ گوشت کہ پہلگام ءِ وئیل ءَ پد مزن وزیر محمد شہباز شریف ءَ اے سانحہ ءِ غیر جانبدار ءُُ شفافیں پٹ ءُُ پول ءِ پیشکش کتگ۔ پاکستان ءَ باز براں اے وڑیں ناشرکاری اُرشانی بھتام جنگ بوتگ، اگاں چہ راستی ایش اِنت کہ ناشرکاری ءَ چہ گیشتر آماچ بوھگ ءَ ابید ھم پاکستان ءِ ھلاپ ءَ باقاعدہ پروپیگنڈا کنگ بوتگ ءُ ما ناشرکاری ءِ ذمہ وار لیکگ بوتگ۔ آئی ءَ گوشت کہ پاکستان ءَ ناشرکاری ءِ ھلاپ ءَ بے دروریں قربانی داتگ، ما 90 ھزار مردمانی جان قربان کتگ، دگنیا ءِ ھچ ملک ءَ اے وڑیں مزنیں قربانی ناشرکاری ءِ ھلاپ ءَ نہ داتگ۔ آئی ءَ گوشت کہ پاکستان ءَ ناشرکاری ءِ ھلاپ ءَ جنگ ءَ ارباں کلدار ءِ تاوان رستگ، ما ناشرکار ءُُ دگنیا ءِ نیام ءَ سپر ءِ کرد ءَ پیلو کنگ ءَ ایں ءُُ وھدے یک پاکستانی وتی جان ءَ قربان کنت گڈا ایشی ایوک ءَ ماتیں گلزمین ءِ واستہ نہ انت بلکیں دگنیا ءَ را ایمن جوڑ کنگ ءِ واستہ انت۔ آئی ءَ گوشت کہ اے وڑیں بازیں قربانی ءِ بے سوب بوھگ ممکن نہ اِنت، نوں وھد اتکگ کہ دگنیا مئے کسہ ءَ بہ اشکنت ءُُ ایشی ءَ را راست سرپد بہ بنت۔ آئی ءَ گوشت کہ جنگ ءَ پیسر پٹ ءُُ پول ءِ پیشکش ءَ چہ ما اے کلوہ دات کہ مئے دست ساپ انت ءُُ مئے پوزیشن دگنیا ءَ منگ بوتگ، اے موہ ءَ مئے دوست ءُُ اتحادی آنی گوما سیادی گیش مھکم بوتگ انت۔ وفاقی وزیر ءَ گوشت کہ پٹ ءُُ پول ءِ پیشکش ءَ پاکستان ءَ یک موثریں سفارتی گامگیج چست کتگ کہ ایشی ءَ را سرجمیں دگنیا ءَ ستا کرتگ، ایشی ءَ پد مزن وزیر، فیلڈ مارشل ءُُ نائب مزن وزیر ءِ تک ءَ مزنیں سفارتی رابطہ بوتگ، ایشی ءَ پاکستان ءِ بیانیہ ءَ را دگنیا ءِ دیم ءَ ایر کنگ ءَ ھاسیں کرد پیلو کتگ۔ برجاھیں سفارتی رابطہ آنی سبب ءَ پاکستان ءَ را وتی موقف ءَ را دگنیا ءِ دیم ءَ جوانیں رنگ ءَ پیش کنگ ءَ کمک رست۔ آئی ءَ گوشت کہ دگنیا بدل بوھگ ءَ انت ءُُ پاکستان ھم بدل بوھگ ءَ انت، ما یک فعالیں سفارتی بدلی یے گندگ ءَ ات، پرچا کہ پاکستان ءَ سفارتکاری ءَ را سک باز سنجیدگی ءَ گوں چار اتگ۔ ما بیانیہ ءَ را جوانیں رنگے ءَ پیش کنگ ءِ سرا دلگوش دات، پاکستان ءِ موقف ءَ را گلوبل میڈیا ءَ سر کنگ منی ذمہ واری ات ءُُ ما اے گپ ءِ سرا ہر وڑیں کوشست کت کہ اے پیغام دنیا ءَ سر بہ بیت۔ آئی ءَ گوشت کہ مئے کر ءَ راستی ءِ طاقت است ات، ھمے بنیاد ءَ وھدے پاکستان ءَ وتی کسہ راست پیش کت گڈا دگنیا ءَ اشکت ءُُ ایشی ءِ اثر بوت۔ زانتکاری ءُ پروپیگنڈا ءَ را موثر سفارتکاری ءِ گوما درستیں زانتکاری ءِ بنیاد ءَ مہم ءِ وسیلگ ءَ سوبمندیں رنگے ءَ دیم پہ دیم کنگ بوتگ۔ آئی ءَ گوشت کہ پاکستان ھمک محاذ ءَ ساڑی ات ءُُ راستیں ھال آنی پجاری ءِ تہ ءَ ڈی جی آئی ایس پی آر ءِ گوما جوڑ بوتگیں مثالی ھمگرنچی ستا کرز ایت ایشی ءِ ابید اے سوبمندی ممکن نہ بوتگ ات۔ آئی ءَ گوشت کہ پاکستان بیانیہ ءِ پڑ ءَ سوبمند بوتگ ءُُ ما سفارتی پڑ ءَ ھم سوبمند بوتگیں وھد ءَ اے معاملہ اصل ءَ کارروائی ءِ تک ءَ سر بوتگ، اللہ تعالیٰ ءِ فضل ءُُ کرم ءَ ما ھپت ھندی بالی گراب ایر جتگ ات۔ آئی ءَ گوشت کہ وھدے پاکستان ءَ را زوراکی ءِ دیمپان بوت گڈا آئی ءَ یک لائکیں پسو دات کہ ایشی ءَ مئے فوجی طاقت ءَ را ھاسیں رنگ ءَ ثابت کت، اے رنگ ءَ بیانیہ جنگ ءُُ سفارتی محاذ دوئیں پڑ ءَ سوبمندی رست ءُُ وھدے کہ راستیں جنگ ءِ باریگ اتک گڈا پاکستان ءَ یک جوانیں کارکردگی پیش کت ءُُ ایوک ءَ چار کلاک ءِ تہ ءَ بھارت ءَ را جنگ بندی ءِ لوٹ کنگ بوت کہ پاکستان ءَ را ھاسیں رنگ ءَ بدلی کتگ۔ آئی ءَ گوشت کہ یک راجی ءِ بستار ءَ ما ھما یکوئی ءِ درشان کنگ المی اِنت کہ منگ بہ بیت، پاکستانی راج ءِ ھمت ءُُ یکوئی ءَ اختلاف پشت ءَ ایر کتگ اَنت ءُُ من ایوان ءَ گوں تران کنان ءَ گوشگ ءَ اِت آں کہ مرچی سیاسی پوائنٹ اسکور کنگ ءِ موہ نیست۔ ما درست یکیں تاک ءَ اتیں ءُ یکجاہ دژمن ءِ دیم ءَ اوشتگ ءِ ھاترا دلجم اتیں ءُ الحمد اللہ اے ھما چیز انت کہ بوھگ ءَ انت۔ آئی ءَ گوشت کہ سوشل میڈیا ءِ سر ءَ سکیں سنگینیں جاور ھال ات، مئے ورنا میمز جوڑ کنگ ءَ اتنت کہ دژمن ءَ را زبردست گندگ ءَ ات۔ جنگ سنگینیں جیڑھے بلے مئے ورنائیں پدریچ ءَ وتی وڑ ءَ دژمن ءِ ھلاپ ءَ موثریں محاذے چست کت۔ آئی ءَ گوشت کہ ورنا آں زمہ واری زرتگ ءُ اے ڈیجیٹل محاذ ءَ پاکستان ءِ واستہ جنگ کتگ۔ آئی ءَ گوشت کہ ڈیجیٹل دنیا ءَ دو رنگ ءِ مردم است انت یکے ڈیجیٹل نیٹیو ءُُ دومی ڈیجیٹل امیگرینٹ انت۔ برے برے ڈیجیٹل مہاجرین ڈیجیٹل میڈیا ءِ حقیقتاں سرپد بوہگ ءِ واستہ وھد ءُ پاس زور اَنت بلے ڈیجیٹل دور ءَ پیدا بوتگیں بومی مردم مئے گیشتریں مردماں چہ شرتر سرپد بنت۔ ہمے سبب انت کہ ڈیجیٹل بومی وتی منفردیں حکمت عملی ءِ سرا عمل کتگ ءُُ ہمے حکمت عملی ءِ وسیلہ ءَ اے محاذ ءِ سرا سوبمندی رستگ۔ آئی ءَ گوشت کہ سرجمیں ھمگرنچی ءُ یکوئی ءَ پاکستان یک ملک ءَ را سوبمندی رستگ ءُ مرچی پاکستان ءَ جھان ءِ پڑ ءَ ارزشت رستگ۔ غزہ ءِ جاور ءُ جنگ بندی ءِ جیڑہانی تہا پاکستان ہما عرب ءُ اسلامی ملکانی تہا ہوار انت کہ آہاں امن ءِ گامگیج ءِ واستا میانجی داری ءُ گپ ءُ تران ءَ بہر زرتگ ءُ گڈی ءَ جنگ بندی ممکن کتگ۔ آئی ءَ گوشت کہ پاکستان ءِ واستہ اے یک مزنیں کامیابی یے کہ دگنیا ءِ ملک آں اے گپ ءَ را جوانیں رنگے ءَ زرت ءُُ من اِت کہ مئے پنت ءُُ شون ءُُ موقف سک باز المی انت ءُُ ھمگرنچ انت۔ اے سال ءَ پاکستان ءَ بازیں مزن تک ءِ تر ءُُ تاب کنگ بوتگ ۔ گوستگیں یک ءُ نیم سال ءِ تہ ءَ پاکستان ءِ سفارتی رابطہ وتی عروج ءِ سر ءَ بوتگ اَنت کہ ایشی ءِ تہ ءَ ما ایس سی او ءِ سروک دیوان ءِ میزبانی کتگ ءُ 14سال ءَ پد 12 مزن وزیراں پاکستان ءِ تر ءُ تاب کتگ۔ اسلام آباد ءَ اتکگیں حکومت ءِ سروک آنی تہ ءَ اسٹریٹجک سیادی، دمگی کمک، انسداد ناشرکاری ءُُ دمگی رابطہ ءِ ھوالگ ءَ گپ ءُُ تران بوتگ ءُُ اے درستیں جیڈھ مدام چار ءُُ تپاسی ءِ تہ ءَ اَنت۔ وفاقی وزیر ءَ گوشت کہ جھان ءِ سیادی آنی رژنائی ءَ پاکستان 2027 ءَ ایس سی او ءِ سروک سروک دیوان ءِ میزبانی ءَ کنت، ایشی ءَ چہ بے شک یک مزنیں مراگشے بیت۔ آئی ءَ گوشت کہ سعودی عرب ءِ گوما اسٹریٹجک وت مہ وتی دفاعی معاہدہ پاکستان ءِ واستہ یک ھاسیں راجدپتری گامگیج ءِ ثابت بوت، الس ءَ ایشی ءِ سر ءَ فخر کت، وھدیکہ ریاض ءَ 25کلومیٹر ءِ دوری ءَ پاکستانی بیرک برز ءُُ مُدامی ءَ بال کنگ ءَ ات۔ آئی ءَ گوشت کہ گوستگیں تر ءُُ تاب ءِ ساھت ءَ اقتصادی کمک ءِ فریم ورک ءِ بندات ءَ چہ پاکستان ءِ معیشت ءِ زندگ بوھگ ءِ ھوالگ ءَ سعودی عرب ءِ گوما سیادی ءَ را گیش مھکم کتگ۔ اے اقتصادی گہتری ءِ رد ءَ یک مزنیں سوبمندی یے چیا کہ پاکستان ءِ ریٹنگ ءُُ میکرو اکنامک اشارہ آنی تہ ءَ گہتری اتکگ ءُُ میاں اوستمانی مالیاتی ادارگ پاکستان ءِ اقتصادی کارکردگی ءِ ساڑاھگ ءَ انت۔ آئی ءَ گوشت کہ حکومت ءَ معیشت ءَ را بحران ءَ چہ دیمروئی ءِ راہ ءَ ایر کتگ ءُُ دری سیادی آناں انزوا ءَ چہ جھان ءِ ارزشت ءَ سر کتگ، اے دوئیں نعرہ حکومت ءِ کارکردگی ءَ را جوانیں رنگ ءَ بیان کن اَنت کہ الحمد اللہ ما معیشت ءُُ دری پالیشی دوئیں پڑ آنی تہ ءَ مزنیں پیشرفت کتگ۔ وفاقی وزیر ءَ گوشت کہ پاکستان ءِ آیوکیں وھد وش انت۔ آئی ءَ گوشت کہ اوگانستان ءِ معاملہ ءَ ھم پاکستان ءِ گور ءَ اے گپ ءِ انکار نہ بوؤکیں ثبوت است انت کہ اوگانستان ءِ مٹی ناشرکاری ءِ واستہ کارمرد کنگ بوتگ۔ ہر مزنیں واقعہ ءِ پٹ ءُ پول ءَ ناگزیر ءَ یک یا دومی جاہ ءَ اوگان شہری ءِ ھوار بوھگ دیم ءَ کیت ءُ پاکستان اے جاوراں گوں دیم پہ دیم اِنت۔ اے درگت ءَ پاکستان ءِ سک باز ھاسیں ءُ مھکمیں موقف است انت ۔ آئی ءَ گوشت کہ استیں جاور آنی تہ ءَ پاکستان ءِ معیشت، درملکی سرمایہ کاری، دمگی ءُُ میاں اوستمانی تجارت ءُ کاروبار ءَ ھوار اسٹریٹجک سیادی سک باز امید وار انت ءُُ انوگ ءَ تاں آسر جوان بوتگ انت۔ آئی ءَ گوشت کہ گوستگیں ماہ ءَ مئے ھم ملائیشیا ءِ ھاسیں تر ءُ تاب بوتگ۔ تجارت ءُ سرمایہ کاری ءِ شوبگ ءَ ملائیشیا ءِ گوما پاکستان ءِ اسٹریٹجک سیادی گیش مھکم بوھگ ءَ انت۔ آئی ءَ گوشت کہ سرجمی ءَ پاکستان ءَ استیں بدل بوھوکیں جاور آنی تہ ءَ جوانیں گامگیج کتگ۔ آئی ءَ گوشت کہ دوحہ ءِ سر ءَ اُرش ءَ پد پاکستانی ڈل دوحہ ءَ سر بوھوکیں اولی ڈل آنی تہ ءَ ھوار بوتگ ءُُ قطر ءِ سروکی ءَ گوں یکوئی ءِ درشان کتگ۔ آئی ءَ گوشت کہ پاکستان ءَ نہ ایوک ءَ راستیں گامگیج چست کتگ بلکینگ ءَ یک انچیں پالیشی یے زرتگ ایشی ءِ چیر دستی ءَ آئی ءَ سفارتی پڑ ءَ بازیں سوبمندی رستگ۔ اے سوبمندی مزن وزیر شہباز شریف ءُ فیلڈ مارشل سید عاصم منیر ءَ ھوار سول ءُ فوجی سروکی ءِ نیام ءَ استیں مثالی یکوئی ءِ آسر انت۔ آئی ءَ گوشت کہ ملک ءِ تہ استحکام ءَ پاکستان ءَ را اے ھک داتگ کہ آ وتی کوشست ءَ درملک ءَ جوانیں رنگ ءَ پیش بہ کنت۔ دگہ ملک ھم پاکستان ءِ گوما سیادی ءَ را گیش مھکم کنگ ءِ واھشت مند اَنت۔ وفاقی وزیر ءَ گوشت کہ امریکی صدر ڈونلڈ ٹرمپ ءَ باز رند ءَ پاکستان ، مزن وزیر ءُ فیلڈ مارشل ءِ توسیپ کتگ ءُ باز رند ءَ ھپت بالی گراب آنی نام ھم گپتگ ۔ آئی ءَ گوشت کہ اے گپ زانگ لوٹ ایت کہ پاکستان ءِ امریکہ ءِ تر ءُ تاب سک باز سوبمند بوتگ، سیادی آنی تہ ءَ مزنیں گہتری بوتگ، ھمے رنگ ءَ چین ءِ گوستگیں تر ءُ تاب ھم المی بوتگ۔ پاکستان ءِ سیادی گوں ہر ملک ءَ وتی یک جتائیں دروشمے ءِ واھند اِنت پمیشکا یک سیادی یے دومی سیادی ءِ ھساب ءَ جوڑ کنگ نہ بیت۔ آئی ءَ گوشت کہ مئے دری پالیشی ءِ سوبمندی ءِ راز ھمیش اِنت، ھمے رژنائی ءَ مئے ارادہ اِنت کہ آیوکیں وھد ءِ واستہ یک مھکمیں، کارآمد ءُ عملی دری پالیشی ءِ زیرگ بہ بیت ایشی ءَ چہ نا ایوک ءَ پاکستان ءَ را جھان ءِ عزت ءُ شرپ رس ایت بلکینگ ءَ مئے معیشت ءَ را ھم نوکیں بالاد ءَ سر کنت۔