سعودی عرب، ہندوستان ءِ عمرہ ءِ بس مدینہ ءِ نزیک ءَ تیل ءِ ٹینکر ءَ گوں ٹکر بوتگ، چل ءُ دو زیارت کنوک بیران بوتگ انت

مدینہ۔ 17 نومبر (اے پی پی): ہندوستان ءَ چہ سعودی عرب ءَ عمرہ ءِ سوار بوھوکیں بس مدینہ ءِ نزیک ءَ تیل ءِ ٹینکر ءَ گوں ٹکر بوتگ ءُ 42 عمرہ کنوک بیران بوتگ۔ عرب رسانکدر ءِ رد ءَ دوشمبے ءِ روچ ءَ سعودی عرب ءَ عمرہ ءِ ھاترا زائرین بس ءَ چہ مکہ ءَ مدینہ ءَ روگ ءَ اتنت کہ آھانی بس ءَ تیل ءِ ٹینکر ءَ گوں ٹکر جتگ ءُ ایشی ءَ پد دوئیں گاڑی آں آتشزدگی کتگ۔ رپورٹ ءِ رد ءَ بس ءِ تہ ءَ 42 مردم سوار بوتگ اَنت کہ آ چہ حیدرآباد ، تلنگانہ ، ھندوستان ءَ بوتگ اَنت ءُ اے عمرہ ءِ زائرین ءِ تہ ءَ جنین ءُ چُک ھوار بوتگ اَنت ۔ حادثہ ءِ جاہ ءَ ریسکیو آپریشن برجاہ انت بلے انگت ءَ سرکاری تک ءَ بیران بوتگیں مردمانی کساس ءِ پدر کنگ نہ بوتگ۔ دومی نیمگ ءَ ھندی سیاستدان اسد الدین اویسی ءَ اے درگت ءَ رسانکدر ءَ گوں گپ ءُ تران کنان ءَ گْوشتگ کہ منی ھالانی رد ءَ عمرہ ءِ زائرین ءِ بس ءَ بوتگیں وئیل ءَ 41 مردم بیران بوتگ اَنت۔ بھارتی رسانکدر ءِ رد ءَ اے ھرابیں ٹریفک ءِ وئیل ءَ کم چہ کم 42 بھارتی عمرہ زائرین ءِ بیرانی ءِ ترس اِنت۔ حادثہ ءِ جاہ ءِ فوٹیج ءَ بس سرجم ءَ آتشزدگی ءِ آماچ بوتگ ءُ بنداتی رپورٹانی رد ءَ بیران بوتگیں مردمانی مزنیں کساسے حیدرآباد ءِ شہری انت کہ ایشی ءِ تہا 20 جنین ءُ 11 زھگ ھوار انت۔ بھارتی رسانکدر ءِ رد ءَ سرجمیں شپ ءَ ریسکیو آپریشن برجاہ بوتگ ءُ دمگی مردماں ھم سک ٹپیگیں مسافر آنی رکّینگ ءَ بھر زرتگ۔ رسانکدر ءِ رپورٹانی رد ءَ 40 ءَ چہ گیش مردم جاہ ءَ وتی جان ندر کتگ بلے انگت ءَ گڈی سرکاری بیران بوتگیں مردمانی کچ ءُ کساس شنگ نہ بوتگ۔