مزن وزیر ءِ صنعت ءُ پیداوار ءِ ھوالگ ءَ ھاسیں کمکار ھارون اختر خان ءَ پاکستان ءُ ازبکستان ءِ کمک ءِ ھشتمی مزن تک ءِ چار ءُ تپاسی دیوان ءِ سروکی

اسلام آباد۔17نومبر  (اے پی پی): صنعت ءُ پیداوار ءِ بابت ءَ  مزن وزیر ءِ ھاسیں کمکار ہارون اختر خان ءَ پاکستان ءُ ازبکستان کمک ءِ ہشتمی مزن تک ءِ چار ءُ تپاسی دیوان ءِ سروکی کت۔ گند ءُ نند ءَ ازبکستان ءِ سفیر علی شیر تختیایوف،  وفاقی ءُ صوبائی حکومت، ایس آئی ایف سی، کاروباری براتی ءِ نمائندگ ءُ سفارتی حلقہ آنی باسک آنی بھر زوری بوتگ۔ گند ءُ نند ءِ بندات دوئیں براتیں ملک آنی نیام ءَ یکجائی راجدپتر، دود ءُ ربیدگی سیادی ءُ اسٹریٹجک شراکت داری ءَ را گیش مھکم کنگ ءِ جزم ءِ درشان ءَ چہ بوت۔ گند ءُ نند ءَ دوئیں ملک آنی نیام ءَ ٹیکسٹائل، فارماسیوٹیکل، سرجیکل انسٹرومنٹس، معدنیات ءُ انفارمیشن ٹیکنالوجی ءَ ھوار جتا جتائیں شوبگ آنی تہ ءَ دو نیمگی کمک ءَ را دیمروئی دیگ ءِ ھوالگ ءَ سرجمیں رنگ ءَ گپ ءُ تران بوت۔ مزن وزیر شہباز شریف ءِ وژن ءِ رد ءَ پاکستان ءَ ازبکستان ءِ گوما 2ارب ڈالر ءِ دو نیمگی تجارت ءِ ٹارگٹ ءَ را سرجم کنگ ءِ واستہ کوشست آناں ترند کتگ ۔ ازبکستان ءِ سفیر ءَ اے عزم ءِ پدا زور دات کہ میاں اوستمانی ءُ جنوبی ایشیا ءِ مارکیٹ آناں یکجا کنگ دوئیں ملک آنی یکجائی مول ءُ مراد اِنت۔ دیوان ءِ تہ ءَ دواسازی ءِ شوبگ ءِ گپ تران ءِ مزنیں بنگپ ءِ بوتگ۔ ازبکستان ءِ نمائندگاں پاکستان ءِ فارما انڈسٹری ءِ صلاحیت آناں ساڑات ءُ گوشت کہ ازبکستان ءِ فارما پارک ماڈل جوانیں رنگ ءَ انت ءُ پاکستان ءَ ھم ایشی ءِ سر ءَ عمل کنگ بوت کنت۔ گند ءُ نند ءَ ازبکستان ءَ پاکستانی دوائی آنی سرٹیفیکیشن ءِ سستیں رفتار ءِ سر ءَ جیڈھ آنی درشان کنگ بوت۔ ایشی ءِ پسو ءَ ہارون اختر خان ءَ دل یکیمی دات کہ سرٹیفیکیشن ءِ کار ءَ را ترند کنگ بیت۔ آئی ءَ فارما کمک ءِ ھوالگ ءَ جیڈھ آناں ترندی ءَ گوں گیواری ءِ واستہ ڈی آر اے پی، پاکستان فارما ایسوسی ایشن ءُ ازبک ریگولیٹرز ءِ ھواریں یکجائی کمیٹی ءِ جوڑ کنگ ءِ ھم جار جتگ۔ ایوی ایشن کنکٹیویٹی ہم اے گپ ءِ تہا یک کلیدی بہرے بوتگ۔ ازبکستان ءِ سفیر ءَ کراچی ءَ چہ ازبکستان ءَ براہ راست بالی گراب بندات کنگ ءِ واھشت ءِ درشان کت ءُ گوشت کہ ایشی ءَ چہ تجارت ءُ سیل ءُ سواد ءَ مزنیں کساسے ءَ دیمروئی رسیت۔ ہارون اختر خان ءَ گوشت کہ پاک ازبکستان ءِ ھوائی رابطہ بیپاری ءُ تر ءُ تاب ءِ موہ آنی تہ ءَ گیشی ءِ واستہ المی اِنت۔ آئی ءَ گیش گوشت کہ ازبکستان خلیج ءِ ملک آنی نیمگ ءَ چہ یورپ ءَ تر ءُ تاب ءِ واستہ نوکیں گیٹ وے جوڑ بوت کنت۔ آئی ءَ گوشت کہ مزن وزیر ءَ ہدایت کتگ کہ پاکستان ءَ چہ ازبکستان ءَ دیم پہ دیمیں بالی گراب زوتاں چہ زوت بندات کنگ بہ بنت ءُ اے رد ءَ پاکستانی بالی گراب ادارگ آنی نیمگ ءَ سرگرمیں کرد پیلو کنگ بہ بیت۔ گند ءُ نند ءَ دوئیں ملک آنی نیام ءَ ترندی ءَ بینکاری کمک ءَ را گیش مھکم کنگ ءِ ضلورت ءِ سر ءَ ھم زور پر دیگ بوت۔ ازبکستان ءِ سفیر ءَ گوشت کہ استیں بینکنگ ءِ رکاوٹ تجارتی معاملہ آنی تہ ءَ جیڈھ ودی کنگ ءَ انت وھدیکہ پاکستان ءَ اے گپ ءِ سر ءَ زور پر دات کہ اقتصادی شریکداری ءِ برجائی ءِ واستہ دوئیں ملک آنی واستہ مالیاتی کمک المی انت۔ اسٹیٹ بینک ءِ نمائندگاں گشتگ کہ بینکنگ ءِ جیڈھ زوت گیش ءُ گیوار بنت ءُ بازیں پاکستانی بینک دو نیمگی تجارتی لین ءُ دین کنئگ ءِ واستہ تیار انت۔ ہارون اختر خان ءَ جار جتگ کہ نیشنل بینک آف پاکستان ازبکستان ءَ وتی شاخ ءَ پچ کنت ایشی ءَ چہ دوئیں ملکانی کاروبار ءَ را آسراتی رسیت۔ صوبائی ھوار بوھگ ءِ ارزشت ءَ را پدر کنان ءَ ھارون اختر خان ءَ گوشت کہ مزن وزیر ءَ ہدایت کتگ کہ ازبکستان ءِ گوما یکجائی منصوبگ آنی تہ ءَ صوبہ آناں ھم ھوار کنگ بہ بیت۔ آئی ءَ صوبائی وزارت صنعت ءَ را زور پر دات کہ آ اے نوکیں موہ آں چہ پائدگ چست بہ کنت ءُ یکجائی منصوبگ آنی تہ ءَ سرگرمیں کرد ءَ پیلو بہ کنت۔ گند ءُ نند ءَ پاکستان ءُ میاں اوستمانی ملک آنی نیام ءَ زمینی ءُ ریل ءِ رابطہ ءَ را گیش کنگ ءِ ضلورت ءِ سر ءَ ھم زور پر دیگ بوت۔ ھاسیں کمکار ءَ گوشت کہ پاکستان خطہ ءِ تہ تجارتی مرکز جوڑ بوھگ ءِ واستہ عملی گامگیج کنگ ءَ انت ءُ ٹرانس افغان ریلوے منصوبگ سرجمیں خطہ ءِ واستہ گیم چینجر ءِ رنگ ءَ ثابت بیت۔ دیوان ءَ معدنیات ءِ شوبگ ءَ کمک ءِ امکانات آنی سر ءَ چار ءُ تپاسی کنگ بوت ءُ توامیں یکجائی کارگس آناں دیم ءِ دیوان ءَ پیشرفت ءِ رپوٹ آناں پیش کنگ ءِ ہدایت کنگ بوت۔ دوئیں ملک آنی سروکی ءَ اقتصادی کمک، دمگی رابطہ ءُ دراجیں مدتی شریکداری ءِ دیمروئی ءِ واستہ وتی یکجائی عزم ءِ پدا زور دات۔