پاکستان جھان ءِ تک ءَ ورنا آنی دیمروئی ءُ بااختیار کنگ ءِ تہ ءَ سروکیں کرد پیلو کنگ ءَ اِنت، رانا مشہود احمد خان

کو الا لمپور۔17نومبر  (اے پی پی): مزن وزیر ءِ ورنا پروگرام ءِ چیئرمین رانا مشہود احمد خان ءَ گوشت کہ پاکستان جھان ءِ تک ءَ ورنا آناں دیمروئی ءُ بااختیار جوڑ کنگ ءِ تہ ءَ سروکیں کرد پیلو کنگ ءَ اِنت، پاکستان یک پرامن، وشھال ءُ ورنا آناں بااختیار کنگ ءِ ھاترا سرجمیں باسکیں ملک آنی گوما سرجمیں کمک ءِ واستہ جزم اِنت۔ اے ھیالانی درشانی آئی ءَ دو شمبے ءِ روچ ءَ دہمی دولت مشترکہ ءِ ورنا وزارتی ٹاسک فورس ءِ بنجاہی دیوان ءَ گشتانک دیان ءَ کت۔ گند ءُ نند ءَ ورنا آنی دیمروئی ءِ واستہ پاکستان ءِ جھان ءِ سروکی ءِ پوزیشن ءِ سر ءَ زور پر دات۔ اے دیوان انٹرنیشنل یوتھ سینٹر کوالالمپور ءَ برجم دارگ بوت، ایشی ءِ تہ ءَ چیئرمین ءَ ورچوئل رنگ ءَ بھر زرتگ وھدیکہ پاکستانی ڈل ءَ ذاتی رنگ ءَ بھر زرتگ۔ وتی گشتانک ءِ تہ چیئرمین رانا مشہود احمد خان ءَ 56باسک ملک آنی تہ ءَ ورنا آنی دیمروئی ءِ واستہ دولت مشترکہ ءِ سیکرٹریٹ ءِ برجاھیں کوشست آناں ساڑات۔ لندن ءَ 10می دولت مشترکہ ءِ ورنا آنی وزیر آنی دیوان ءِ حوالہ ءَ آئی ءَ گوشت کہ اے دیوان ءَ چہ دولت مشترکہ ءِ وژن ءَ را گیش مھکم کنگ بیت کہ ورنا آنی واستہ گیش موثریں ازمت آناں پجارینگ بہ بیت، ورنا آنی واستہ مزنیں مول ءُ مراد آنی ٹھینگ بہ بیت۔ ٹاسک فورس ءِ شریک چیئرمین ءِ بستار ءَ آئی ءَ گوشت کہ سی وائی ایم ٹی ایف یک بنیاتی پلیٹ فارم اِنت کہ ورنا آنی بابت ءَ مارلبرو ہاؤس ءِ وعدہ، سی وائی ایم ایم ءِ پیسلہ ءُ سی او جی ایم ءِ قرارداد آناں عملی کارروائی ءُ پیمائش ءِ لائکیں آسراتی آنی تہ ءَ بدل کنت۔ آئی ءَ دولت مشترکہ ءِ ورنا آنی سال (2023-2024) ءِ ارزشت ءِ سر ءَ زور پر دات ءُ گوشت کہ ورنا ایوک ءَ پالیشی آناں چہ نپ چست کنوک نہ اَنت بلکیں آیوکیں وھد ءَ راستیں شریک اَنت۔ چیئرمین ءَ مزن وزیر ءِ ورنا پروگرام ءِ چیر دستی ءَ ورنا آنی وانگ ءُ زانگ، روزگار، کاروباری، چاگرد ءُ شمولیت ءِ ھوالگ ءَ پاکستان ءِ گامگیج آنی سر ءَ زور پر دات ءُ گوشت کہ ورنا آنی تہ ءَ سرمایہ کاری برجمیں دیمروئی ءِ بُن ھشت اِنت۔ آئی ءَ دولت مشترکہ ءِ اولویت آنی سر ءَ ھاسیں زور پر دات چوشکہ ڈیجیٹل فرق ءَ را ھلاس کنگ، ٹیکنالوجی ءِ تہ ءَ یک وڑیں رسائی، گورننس ءِ تہ ءَ ورنا آنی بھر زوری، موسمیاتی کارروائی، ءُ ورنا آنی سروکی ءَ چاگردی گامگیج آناں دیمروئی دیگ۔ آئی ءَ ورنا آنی کار ءَ را پیشہ وارانہ کنگ ءُ غیر رسمی وانگ ءُ زانگ ءِ موہ آناں گیش کنگ ءِ سفارش کتگ۔ ایشی ءَ ابید آئی ءَ سارک، آسیان، کیریکام، افریقی یونین ءُ پیسفک کمیونٹی ءَ ھوار دمگی ادارگ آنی گوما کمک ءَ را گیش کنگ ءِ ضلورت ءِ سر ءَ زور پر دات۔ آئی ءَ کایا ورنا سروک دیوان اسلام آباد 2025 ءِ سوبمندی ءِ ذکر کت کہ ایشی ءِ تہ ءَ 12ملک آنی نمائندہ آنی بھر زوری ءَ گوں راجی ورنا کونسل ءِ جوڑ کنگ، پاکستان ءَ کایا سیکرٹریٹ ءِ جوڑ کنگ، کامن ویلتھ ءِ سیکرٹریٹ ءِ جوڑ کنگ ءُ اسلام آباد ءِ سیکرٹریٹ ءِ جوڑ کنگ ءِ وڑیں ھاسیں آسر دیم ءَ اتکگ اَنت۔ دولت مشترکہ ءِ سیکرٹریٹ ءِ اسٹریٹجک پلان 2025-2030 ءِ سر ءَ تران کنان ءَ آئی ءَ گوشت کہ دولت مشترکہ ءِ ورنا آنی پروگرام ءَ را ورنا آنی سروکی ءَ کار آنی واستہ مرکزی سیکرٹریٹ ءِ رنگ ءَ کار کنگ ءَ برجاہ دارگی اِنت۔ آئی ءَ گوشت کہ مزن وزیر ءِ ورنا پروگرام ءِ نمائندگ آمنہ بٹول ایم این اے ءُ ڈاکٹر محمد علی گند ءُ نند ءِ ساھت ءَ اے نکات آنی سر ءَ گیش رژنائی ءِ شنگ کن اَنت۔ گڈسرا چیئرمین رانا مشہود احمد خان ءَ 1.6ارب دولت مشترکہ ءِ ورنا آنی واستہ بامردیں موہ پیداک کنگ ءِ جزم ءِ پدا زور دات ءُ گوشت کہ پاکستان امن، وشھال ءُ ورنا آناں توانمندیں دولت مشترکہ ءِ واستہ توامیں باسکیں ملک آنی گوما سرجمی ءَ کمک ءِ واستہ جزم انت۔