مزن وزیر ءَ پاکستان ریلوے ءَ را نوک کنگ ءِ وعدہ کت، نوکیں شلیمار ایکسپریس ءُ کراچی کینٹ اسٹیشن ءِ اپ گریڈ کتگیں آسراتی آنی بنگیج

کراچی ۔17نومبر  (اے پی پی): مزن وزیر محمد شہباز شریف ءَ گوشت کہ پاکستان ریلوے ءِ ڈیجیٹلائزیشن ءُ نوکیں آسراتی آنی پُجاری ملکی معیشت ءِ برجائی ءِ واستہ ھاسیں کرد ءَ پیلو کنت۔ وفاقی حکومت سندھ حکومت ءِ گوما کمک ءَ کراچی سرکلر ریلوے ءِ نوکیں رنگ ءَ جوڑ کنگ ءُ صوبہ ءَ ھوار سرجمیں ملک ءَ ریلوے اسٹیشن آنی اپ گریڈیشن ءَ را دل یکیمی کنت۔ اے ھیالانی درشانی آئی ءَ دو شمبے ءَ کراچی ءِ تر ءُ تاب ءِ ساھت ءَ نوکیں شلیمار ایکسپریس ءُ کراچی کینٹ ریلوے اسٹیشن ءِ اپ گریڈ بوتگیں ویٹنگ ایریا ءُ لاؤنج آنی بنگیج مراگش ءَ گوں تران کنان ءَ کت۔ مراگش ءِ تہ ءَ سندھ ءِ سر وزیر سید مراد علی شاہ، ریلوے ءِ وفاقی وزیر محمد حنیف عباسی، وفاقی وزیر ءِ اھوالکاری عطا اللہ تارڑ ءُ اے دگہ مزنیں مردم ھم ساڑی اتنت۔ مزن وزیر ءَ گوشت کہ ریلوے ءِ وفاقی وزیر حنیف عباسی ءَ وتی اگدہ ءِ سر ءَ نندگ ءَ پد ملک ءِ ریلوے ءِ نظام ءِ گہتری ءِ واستہ سک باز کار کتگ۔ لاہور ریلوے اسٹیشن ءِ جدید کنگ ءَ پد کراچی کانٹ اسٹیشن ہم جدید آسراتی آں گوں پلگار کنگ بوتگ۔ آئی ءَ گوشت کہ سندھ حکومت ءِ کمک ءَ صوبگ ءِ توامیں ریلوے اسٹیشن جدید لائنز ءِ سر ءَ جوڑ کنگ بنت تانکہ مسافر آناں سفری گہتریں آسراتی رس ایت۔ مزن وزیر ئَ گوشت کہ کراچی لاہور شلیمار ایکسپریس ئِ نوکیں، اپ گریڈ ئِ شکل ئَ چلائینگ ئَ اِنت۔ آئی ءَ کراچی ءَ را ملک ءِ اقتصادی مرکز ءُ ”پاکستان ءِ دل“ لیک اتگ۔ آئی ءَ گوشت کہ پنجاب، سندھ، خیبر پختونخوا ءُ بلوچستان ءِ حکومت ءِ گوما نزیکیں کمک برجاہ دارگ بیت تانکہ ریلوے نیٹ ورک ءِ گہتری ءِ وسیلگ ءَ راجی معیشت ءَ را مھکم کنگ بہ بیت۔ آئی ءَ ریلوے ءِ وفاقی وزیر حنیف عباسی ءِ کارکردگی ءَ را ساڑات ءُ گوشت کہ آئی ءَ پراھیں ریلوے نظام ءَ را نوکیں لائن آنی سر ءَ جوڑ کنگ ءَ کلیدی کرد پیلو کتگ۔ مزن وزیر ءَ گوشت کہ وفاقی حکومت توامیں صوبگ آنی کمک ءَ ریلوے نیٹ ورک ءَ را میاں اوستمانی ایشیا ءَ را گیش ءُ گیوار کنت ءُ ازبکستان اوگانستان پاکستان ریلوے لائن منصوبگ ءِ ھاسیں ارزشت انت۔ آئی ئَ اسلام آباد استنبول ریل روٹ ئِ احیاء ئِ سر ئَ ھم زور پر دات۔ مزن وزیر ءَ گوشت کہ ریلوے ءِ وفاقی وزیر ءَ پاکستان ریلوے ءِ گہتری ءِ واستہ دو ارب ڈالر ءِ فنانسنگ ءِ واستہ ایشیائی دیمروئی بینک ءَ گوں گپ ءُ تران کتگ۔ سندھ ءِ سر وزیر کے سی آر ءِ ایشی ءَ را سی پیک ءِ تہ ءَ ھوار کنگ ءِ شور ءُ مشور ءِ سر ءَ مزن وزیر ءَ سرجمیں رنگ ءَ کمک ءِ دل یکیمی دات ءُ ایشی ءَ را یک ھاسیں منصوبگ ءِ رنگ ءَ لیک اِت۔ مزن وزیر ءَ گوشت کہ 154 ریلوے اسٹیشن آناں پیسر ءَ چہ نوک کنگ بوتگ ءُ وھدے کہ درستیں مزن ءُ کسانیں اسٹیشن اپ گریڈ کنگ بنت گڈا آ ریلوے ءِ وزیر ءِ واستہ صدارتی ایوارڈ ءِ سفارش کنت۔ ایشی ءَ چہ پیسر ریلوے ءِ وفاقی وزیر محمد حنیف عباسی ءَ گوشت کہ مزن وزیر ءِ سروکی ءَ 8ماہ ءِ کسانیں وھد ءِ تہ ءَ مزنیں گہتری بوتگ ایشی ءِ تہ ءَ کراچی کینٹ اسٹیشن ءِ نوک کنگ ءُ شالیمار ایکسپریس ءِ زندگ کنگ ھوار انت۔ آئی ءَ گوشت کہ روہری اسٹیشن ءِ اپ گریڈ کنگ ءِ واستہ یک ارب کلدار ھرچ کنگ بوھگ ءَ انت وھدیکہ کراچی سٹی اسٹیشن ءِ سر ءَ ھم کار برجاہ انت۔ آئی ءَ گوشت کہ حکومتی پالیشی ءِ رد ءَ 14 ریل آؤٹ سورس کنگ بوھگ ءَ انت وھدیکہ ریلوے ہسپتال ءُ اسکول ھم پرائیویٹ سیکٹر ءِ دست ءَ دیگ بوھگ ءَ انت، البت ریلوے ءِ کارندہ آنی ھک آنی رکھینگ ءَ را دل یکیمی کنگ بیت۔ ایم ایل ون منصوبہ ءِ سرا ہم کار برجاہ انت۔ سندھ ءِ سر وزیر سید مراد علی شاہ ءَ مزن وزیر ءَ را کراچی ءَ سر بوھگ ءِ پد ءَ وش آتک کت ءُ صوبائی حکومت ءِ نیمگ ءَ سرجمی ءَ کمک ءِ دل یکیمی دات۔ ایشی ءَ پد مزن وزیر ءَ کراچی کینٹ اسٹیشن ءَ نوکیں شالیمار ایکسپریس ءِ بنگیج کت ءُ اپ گریڈ بوتگیں ویٹنگ ایریا، سی آئی پی لاؤنج، جدید ڈائننگ ہال ءُ کمپیوٹرائزڈ ٹکٹنگ سسٹم ءِ چار ءُ تپاسی کت۔ اے موہ ءِ سر ءَ وفاقی وزیر، ریلوے ءِ مزنیں کارندہ، آئی جی ریلوے ءُ درملکی سفارتکار ھم ھوار بوتگ اَنت۔