آخبت نا چین تا گچین زند انا آب آبادی ٹی ترندی اٹ ودکی آ کنٹرول کننگ اٹ ہی ممکن ءِ، ڈاکٹر مصدق ملک

اسلام آباد۔ 17 نومبر (اے پی پی) بنجائی وزیر موسمیاتی بدلی و چاگڑدی ہم گرنچی ڈاکٹر مصدق ملک پارینے کہ آخبت نا چین تیکن زند انا آب آبادی ٹی ترندی اٹ ودکی ءِ کنٹرول کننگ اٹ ہی ممکن ءِ، چاگڑدی رکھ اکن آبادی ٹی اعتدال المی ءِ۔ داخیال آتا درشانی ءِ او دوشنبے نادے آ ہندی ہوٹل اٹی ’’ڈسٹرکٹ ولنر ایبلٹی انڈکس‘‘ نا سرحال آن پاپولیشن کونسل نا رپورٹ نا اجرا نا دود آن تران کرساکرے۔ بنجائی وزیرپارے کہ آبادی آ کنٹرول آن ہی شونہالی نا کسر ملنگ کیک، ترندی اٹ ودوک آ آبادی چاگڑدی کچٹی نا سوب ہم جوڑ مریک، اوپارے کہ شونداری نا رفتار ءِ ودفنگ کن آبادی ٹی ترندی اٹ ودکی آ کنٹرول المی ءِ، پدریسہ شونداری کن آبادی نا گچین مینجمنٹ المی ءِ۔ ڈاکٹر مصدق ملک پارے کہ موسمیاتی بدلی تا منفی اثرآتون مون تننگ کن ہرتپہ ءِ تینا کڑد ءِ ادا کروئی مریک۔ سوگو زرگزران کن آبادی نا زموارانہ ڈٹ بندی اہم اہمیت تخک۔ اومستی پارے کہ زیات چناتا پیدائش لمہ و چنا ہڑتوم آتیکن جان جوڑی نا ویل آتا سوب ہم جوڑ مریک، زیات آبادی ملکی وسیلہ غاتیا بھاز زور انا سوب جوڑ مریک، روزگار نا وارخواہی تے ودفنگ کن آبادی ٹی ودکی ٹی توازن المی ءِ۔ شاری آسراتی گچین کننگ کن آبادی ٹی ترندی اٹ ودکی نا زور ءِ کم کننگ المی ءِ۔ بنجائی وزیرپارے کہ نن وخت اس ہم سجفتویسن کہ رکھوک دِیر اسکان رسینگ داخہ در مشکل انت اکن ءِ۔ اوپارے کہ ساف دِیر انا فراوانی، بنداوی انصاف و حق آتا ویل ءِ۔ اوگڑاس ضلع غاتیٹی آبادی ٹی ودکی نا ھالیت اتے تشویشناک گوندسا پارینے کہ پاکستان نا بھاز زہمی ضلع بلوچستان و مسکوہی فاٹاٹی اسہ کروڑ بندغ رہینگ انگ ءُ۔ بنجائی وزیر پارے کہ رپورٹ نا رداٹ زہمی ضلع غاتیٹی 20 لکھ آن زیات کم سن چناتعلیم نا بابت بے پکی آخبت نا گواچی ءُ وخت اس کہ 65 درسد آبادی عارضی و کچہ اُراتیٹی زند ءِ تیر کننگ آ بیوس ءُ، بنجائی وزیر پارے کہ ساف دِیر ، تعلیم و رکھ ہنکین آسراتی اف، بنداوی حق ءِ۔