پاکستان داسہ پائیدار اقتصادی نمو نا کنڈآ ہِننگ ءِ، آبادی نا رداٹ وسیلہ غاتا بست وبند ءِ کروئی مریک، بنجائی وزیر سینیٹر محمد اورنگزیب

اسلام آباد۔ 17 نومبر (اے پی پی) بنجائی وزیرخزانہ و محصولات سینیٹر محمد اورنگزیب پارینے کہ پاکستان سوگوی نا مزل نا دوئی کننگ آن پد داسہ پائیدار اقتصادی نمونا کنڈآ ہِننگ ءِ، آبادی نا رداٹ وسیلہ غاتا بست وبند ءِ کروئی مریک، ترندی اٹ ودوک آ آبادی و موسمیاتی بدلی پاکستان کن اِرا بنداوی وجودی خطرہ غاک ءُ۔ دوشنبےنادے آ داڑے پاپولیشن کونسل نا کنڈآن ڈسٹرکٹ ولنرایبلیٹی انڈیکس آف پاکستان نا بناءِ کننگ نا وخت آ اڈ ہلوک دود آن تران کرساوزیرخزانہ پارے کہ پاکستان سوگوی نا مزل نا دوئی کننگ آن پد داسہ پائیدار اقتصادی نمو نا کنڈآ ہِننگ ءِ واہم زرگزرانی ٹک آتیٹی گچینی آن اونا عکاسی مننگ ءِ۔ وزیرخزانہ پارے کہ ترندی اٹ ودوک آ آبادی و موسمیاتی بدلی پاکستان کن اِرا بنداوی وجودی خطرہ غاک ءُ، پاکستان اٹ آبادی ٹی ودکی نا کچ 2.5 درسد نا خڑک ءِ و دا کچ بھاز زیات ءِ، آبادی اٹ ترندی آن اگہ ودکی تو ولدا جم قومی پیدوار اٹی ودکی غیر متعلق مریک، دا چرجوئی پائیدار اف، ننے آبادی نا رداٹ وسیلہ غاتا بست وبند ءِ کروئی مریک۔ اوپارے کہ چناک ننا آخبت نا لیڈرآک ءُ، پاکستان اٹ 40 درسد نا خڑک چناک سٹنٹنگ نا گواچی ءُ، 50 درسد مسنک اسکول آتیان پیشن ءُ، داہڑتوم آک بھاز ہی سنجیدہ وڑانا ویل آک ءُ۔ وزیرخزانہ پارے کہ موسمیاتی بدلی و دا بدلی تیان موافقیت اہم اسہ ویل اسے، موسمیاتی موزونیت کن نن وزارت موسمیاتی بدلی و تعلقدار ادارہ غاتون ہروڑنا کمکاری کن تیار ءِ، وزیرخزانہ نا منصب ءِ سنبھالنگ آن پد اولیکو وار آئی ایم ایف و جہانی بینک انا سالانہ دیون نا وخت آ موسمیاتی بدلی کن قائم سیوت نا وزراء خزانہ نا دیوان اٹی ای بشخ ہلکٹ و دا تُو تیٹی کنے اندازہ مس کہ دا امور ءِ مرکزی دنگ اٹ اتنگ اٹ وزراء خزانہ نا کڑد بھاز اہمیت تخک انتئے کہ موسمیاتی موزونیت و چاگڑدی فنانس کن فنڈ انا تخصیص و وسیلہ غاتا فراوانی ٹی اونا کڑد اہم مریک۔ وزیرخزانہ پارے کہ حکومت پسماندہ و کم شون ہلوک ضلع غاتا شونداری و اوفتے ملک انا ایلو بشخ آتا بریبر اتنگ کن گام گیج کننگ ءِ، گچین وراخواہی تا پٹنگ اٹ خلقی علاقہ غاتیان شاری و بھلا خلق آتیٹی ہن وبر نا عمل برجاءِ، دانا نتیجہ ٹی کچہ انگا آبادی تا کچ اٹی ودکی مننگ ءِ، دا آبادی تیٹی کُننگ کن ساف دِیر ، دِیر انا کشنگ و ایلو بنداوی آسراتی تا کمتی مریک، داڑآن چائلڈ سٹنٹنگ و ایلو ویل آتیٹی ودکی مننگ ءِ۔ وزیرخزانہ پارے کہ راجی شونداری کن دا سمجھنگ ضرور ءِ کہ آبادی ٹی ودکی و موسمیاتی بدلی تا اسہ ایلو تون براہ راست تعلق ءِ، داڑتون اوار اوار وسیلہ غاتا تخصیص و اوفتے ٹی اصلاحات ہم المی ءِ۔ وزیرخزانہ ایف سی ڈی او و برطانوی حکومت نا منت واری ءِ ہرفسا پارے کہ برطانیہ نا حکومت و ایف سی ڈی و پاکستان نا حکومت تون چندی بشخ آتیٹی کمک فراوان کننگ ءِ۔