صدر آصف علی زرداری ءَ اردن ءِ شاہ عبداللہ دوم ءَ گوں گند ءُ نند کتگ، دو نیمگی، دمگی ءُ جھان ءِ جیڈھ آنی سر ءَ نزیکیں رابطہ ءِ برجاہ دارگ ءِ سر ءَ تپاک کتگ

اسلام آباد۔16نومبر  (اے پی پی):صدر ءِ مملکت آصف علی زرداری ءَ ایوان ءِ صدر ءَ اردن ءِ شاہ عبداللہابن الحسین دوم ءَ گوں گند ءُ نند کت۔ دوئیں راہشون آں پاکستان ءُ اردن ءِ سیادی ءِ آیوکیں رھشونی ءِ سر ءَ دل یکیمی ءِ درشان کت ءُ دو نیمگی، دمگی ءُ جھان ءِ جیڈھ آنی سر ءَ نزیکیں رابطہ ءِ برجم دارگ ءِ سر ءَ تپاک کت، وھدیکہ صدر ءِ مملکت ءَ اردن ءِ شاہ ءَ را آرڈر آف پاکستان داد دات۔ ایوان ءِ صدر ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت آصف علی زرداری ءَ ایوان ءِ صدر ءَ اردن ءِ شاہ عبداللہ دوم ءَ گوں گند ءُ نند کتگ۔ صدر ءِ مملکت ءَ اردن ءِ بادشاہ ءَ را آرڈر آف پاکستان ءِ نام ءَ مستریں سول ایوارڈ داتگ۔ صدر آصف علی زرداری ءَ اردن ءِ ہاشمی بادشاہی ءِ شاہ عبداللہ دوم ءَ را صدارتی ایوان ءَ سر بوھگ ءِ پد ءَ گرمیں وش اتک کت۔ شاہی ڈل ءِ تہ ءَ شہزادہ غازی بن محمد، اردن ءِ بادشاہ ءِ مذہبی ءُ دود ءُ ربیدگ ءِ کارانی بابت ءَ مشیر ءُ ذاتی نمائندہ، نائب مزن وزیر ءِ دری کار ءُ دری کارانی ایمن صفادی ءُ چیئرمین جوائنٹ چیف آف اسٹاف میجر جنرل یوسف حنیتی ھوار اتنت۔ اے موہ ءِ سر ءَ بانُک اول آصفہ بھٹو زرداری ، چیئرمین پیپلز پارٹی بلاول بھٹو زرداری ، ءُ سینیٹر شیری رحمان ھم ساڑی ات ۔ دوئیں راہشوناں پاکستان ءُ اردن ءِ نیام ءَ دیریں ءُ براتی سیادی ءِ سر ءَ زور پر دات ءُ دو نیمگی سیادی ءِ جتا جتائیں تک ءُ پھنات آنی سر ءَ ھیال ریچی کت۔ ایشاں اے سیادی ءَ را گیش مھکم کنگ ءُ دوئیں ملک آنی نیام ءَ مردمی رابطہ آناں دیمروئی دیگ ءِ ضلورت ءِ سر ءَ زور پر دات۔ آہاں دمگی ءُ میاں اوستمانی جاور ھال آنی سر ءَ چار ءُ تپاسی کتگ ءُ ھاسیں رنگ ءَ میاں اوستمانی امن ءُ ایمنی ءِ سر ءَ دلگوشی داتگ۔ دوئیں نیمگ ءَ کثیر جہتی دیوان آنی تہ ءَ یکجائی ءَ کار کنگ، انسانی ءُ دیمروئی کمک ءَ را دیمروئی دیگ ءِ ارزشت ءِ سر ءَ زور پر دات۔ فلسطین ءِ جیڈھ ءِ سر ءَ صدر آصف علی زرداری ءُ اردن ءِ شاہ عبداللہ دوم ءَ جنگ بندی ءَ پد غزہ ءِ جاور ھال آنی ھوالگ ءَ وتی اصولی موقف ءِ پدا زور پر دات۔ آئی ءَ فلسطینی آنی ھرچ وڑیں آوار جنگ رد کتگ ءُ دو ریاستی گیواری ءِ ضلورت ءِ سر ءَ زور پر داتگ۔ آئی ءَ 1967 ءِ جون ءَ پیسر ءِ سیمسراں القدس الشریف ءِ دارالحکومت ءِ رد ءَ یک آجوئیں، وت واجہیں، زندگ داروکیں ءُ نزیکیں فلسطینی ریاست ءِ جوڑ کنگ ءِ لوٹ کتگ۔ شاہ عبداللہ دوم ءَ اردن ءُ پاکستان ءِ نیام ءَ گہتریں ءُ مھکمیں سیادی آنی سر ءَ فخر ءِ درشانی کت ءُ جتا جتائیں پڑ آنی تہ ءَ کمک ءَ را گیش کنگ ءِ واستہ اردن ءِ عزم ءِ نوک کت۔ دوئیں راہشون آں پاکستان ءُ اردن ءِ سیادی ءِ آیوکیں رھشونی ءِ سر ءَ دل یکیمی ءِ درشان کت ءُ دو نیمگی، دمگی ءُ جھان ءِ جیڈھ آنی سر ءَ نزیکیں رابطہ ءِ برجم دارگ ءِ سر ءَ تپاک کت۔ گند ءُ نند ءِ ساھت ءَ نائب مزن وزیر ءُ دری کارانی وزیر سینیٹر محمد اسحاق ڈار، موسمی مٹ ءُ بدلی ءُ چاگردی رابطہ ءِ وفاقی وزیر سینیٹر مصدق ملک، دری کارانی سیکرٹری ءُ پاکستان ءَ اردن ءِ سفیر ھم ساڑی ات۔ گند ءُ نند ءَ چہ پد یک ھاسیں مراگشے ءِ برجم دارگ بوت کہ ایشی ءِ تہ ءَ صدر ءِ مملکت آصف علی زرداری ءَ اردن ءِ بادشاہ ءَ را ’’نیشان پاکستان‘‘ پیش کت۔ اے موہ ءِ سر ءَ اردن ءِ بادشاہ ءَ صدر آصف علی زرداری ءَ را اردن ءِ مستریں داد ”وسام النہدات المرسہ“ (النھدا ءِ جواہراتیں گرینڈ کورڈن کہ ایشی ءِ بزانت ”احیاء ءِ شرپ“ اِنت) ھم داتگ کہ بادشاہ ءِ نیمگ ءَ چہ سروک ءُ مہماناں دیگ بیت۔ مراگش ءَ مزن وزیر محمد شہباز شریف، چیئرمین سینیٹ سید یوسف رضا گیلانی، فیلڈ مارشل سید عاصم منیر، چیف آف ایئر اسٹاف ایئر چیف مارشل ظہیر احمد بابر سدھو، چیف آف ائیر اسٹاف ایڈمرل نوید کابینہ دی ڈپلومیٹک آف می ءَ ھم بھر زوری کت۔ ایشی ءَ پد صدر ءِ مملکت کارگس ءَ ھاسیں مہمان ءِ شرپ ءَ وشیں ضیافت ءِ برجم دارگ بوت۔