وفاقی وزیر داخلہ محسن نقوی کیڈٹ کالج وانا ءِ تر ءُ تاب

اسلام آباد۔15نومبر  (اے پی پی):وفاقی داخلہ ءِ وزیر محسن نقوی ءَ کیڈٹ کالج وانا ءِ تر ءُ تاب کتگ کہ اودا سیکورٹی فورسز ءَ ناشرکارانی اُرش ناکام کتگ کہ آ نودربر ءُ استاد آناں نشانگ جوڑ کنگ لوٹ اتگ انت۔ شمبے ءِ روچ ءَ ادا جاڑی بوتگیں بیان ءِ رد ءَ تہی کارانی وزیر ءِ وانا ءَ سر بوھگ ءِ سر ءَ انسپکٹر جنرل فرنٹیئر کور خیبر پختونخوا (جنوبی) میجر جنرل مہر عمر خان ءَ آئی ءِ وش اتک کتگ۔ تر ءُ تاب ءِ ساھت ءَ تہی کارانی وزیر ءَ پاک اُرد ءِ افسر ءُ سپاھیگاں گوں گند ءُ نند کتگ ایشاں اُرش ءَ را سوبمندیں رنگ ءَ یلہ داتگ ءُ توامیں کیڈٹ ءُ استاد ایمن ءَ چہ رکینتگ اَنت۔ آئی ءَ نودربر ءُ فیکلٹی ءِ باسکاں گوں ھم گپ ءُ تران کتگ ءُ اے وئیل ءَ پد آھانی جرات ءُ مزنیں حوصلہ ءِ توسیپ کتگ۔ وزیر داخلہ ءَ را اُرش ءِ ناکام کنگ ءُ درستیں نودربر ءُ استاد آنی چہ ھچ وڑیں جانی تاوان ءَ ابید یلہ کنگ ءِ بابت ءَ سرپدی دیگ بوتگ۔ وزیر داخلہ ءَ پاک فوج ءُ فرنٹیئر کور ءِ پیشہ وارانہ ءُ بہادری ءِ توسیپ کتگ ءُ آہانی کارروائی ءَ را بہادری ءُ مہارت ءِ مثال لیک اتگ ءُ گشتگ کہ اے ایوک ءَ ناشرکار نہ انت، اے درندگ انت کہ آہانی گوں انسانیت ءَ ہچ سیادی نیست، ہچ مذہب زہگاں نشانگ جوڑ کنگ ءِ اجازت نہ دنت ءُ اے ناشرکار ہچ مذہب ءِ رندگیری ءَ نہ کن انت۔ ایشاں انسان گشگ انسانیت ءِ توہین اِنت۔ آئی ءَ گوشت کہ اُرش کنوک آنی ارادہ بوتگ کہ اے سانحہ ءَ را آرمی پبلک اسکول ءِ وڑ ءَ پدا بہ کن اَنت بلے سیکورٹی فورسز ءِ ترند ءُ فیصلہ کنوکیں کارروائی ءَ ناشرکار جہنم ءَ سر کتگ ءُ آھانی سازش ناکام کتگ۔ محسن نقوی ءَ آپریشن ءَ ہواریں درستیں افسر ءُ سپاھیگ آناں ’’راجی ہیرو‘‘ لیک اتگ ءُ جار جتگ کہ کیڈٹ کالج وانا ءِ سرجمیں نوک جوڑی ءُ بحالی ءَ را زوت دل یکیمی کنگ بیت۔ وزیر داخلہ ءَ حکومت ءِ جزم ءِ سرا زور دات کہ آ سلاہ بندیں اُرد ءِ گوما اوشتاتگ ءُ سرجمیں دمگ ءَ وانگ ءُ زانگ ءِ ادارگ آنی ایمنی ءَ را دل یکیمی کنگ ءَ انت۔