پی ٹی آئی ءِ بُن ھشت ایر کنوکیں مزن وزیر محمد شہباز شریف ءِ سر ءَ جتگیں الزام دروگ اَنت، عطا اللہ تارڑ

لاہور۔15نومبر  (اے پی پی):وفاقی وزیر اطلاعات ءُ نشریات عطا اللہ تارڑ ءَ گشتگ کہ پی ٹی آئی ءِ بانی عمران خان ءُ مزن وزیر محمد شہباز شریف ءِ سرا جتگیں الزام دروگ ءُ من گھڑت انت، پی ٹی آئی ءِ بانی ءِ زالبول بشرہ بی بی ءَ سرکاری کارانی سرا اثر انداز بوتگ ءُ   روحانیت ءِ بنیات ءَ پیسلہ کنگ بوتگ اَنت۔  اے ھیالانی درشانی آئی ءَ شمبے ءِ روچ ءَ جوڈیشل کمپلیکس ءَ تحریک انصاف ءِ بانی ءِ حلاف ءَ زیر التوا بدنامی ءِ کیس ءِ کارروائی ءَ پد میڈیا ءَ گوں تران کنان ءَ کت۔ عطا اللہ تارڑ ءَ گشتگ تحریک انصاف ءِ بانی ءَ مزن وزیر محمد شہباز شریف ءِ سرا دروگیں بھتام جتگ، مرچی آمیدگس ءَ پیش بوتگ ءُ تحریک انصاف ءِ وکیل ءِ دراہیں جستانی پسو داتگ انت۔ عطا اللہ تارڑ ءَ گشتگ کہ مزن وزیر شہباز شریف ءَ 2017 ءَ پی ٹی آئی ءِ بانی ءِ حلاف ءَ بدنامی ءِ دعویٰ کتگ ات، اے دعویٰ ہما وہد ءَ کنگ بوتگ ات کہ پی ٹی آئی ءِ بانی ءَ پاناما کیس ءِ پچ گرگ ءِ ھاتر ءَ شہباز شریف ءَ را دہ ارب کلدار ءِ پیشکش ءِ بے بنیں الزام جتگ ات۔ وزیر ءِ اھوالکاری ءَ گوشت کہ اے دروگیں دعویٰ ءُ جوڑ کتگیں پروپیگنڈا آ وھد ءَ ملک ءِ درستیں مزنیں روتاک آنی تہ ءَ شنگ بوتگ، الیکٹرانک میڈیا ءِ سر ءَ ھم پروگرام بوتگ اَنت بلے ایشی ءَ گوں راستی ءَ ھچ وڑیں سیادی نیست۔ آئی ءَ اے گپ ءِ سر ءَ زور پر دات کہ پی ٹی آئی ءِ بانی ءَ اے الزام ھر فورم ءَ پدا پدا جتگ اگاں چہ آئی ءِ سرجمیں نظام دروگ ، تہمت ءُ گمراہ کنوکیں بیانیہ ءِ آماچ بوتگ۔ عطا اللہ تارڑ ءَ گیش گْوشتگ کہ پی ٹی آئی ءِ بُن ھشت ایر کنوک ءَ شہباز شریف ءِ سر ءَ جتگیں الزام جتا جتائیں دیواناں پدا پدا جتگ اَنت بلے مرچی دگنیا ءِ مزنیں جرنل ھمے الزاماں دروگ ءُ تہمت ءِ بنیاد ءَ گْوشگ ءَ اَنت۔ 2017 ءِ دھرنا ءِ وھد ءَ ھم تحریک انصاف ءِ بانی ءَ بے بنیں بیان داتگ اَنت۔ آئی ءَ گوشت کہ تحریک انصاف ءِ بانی ءِ دور ءَ کتگیں درستیں ھاسیں پیسلہ آئی ءِ زالبول بشری بی بی ءِ کمک ءَ چہ بوتگ اَنت کہ آ روحانیت ءِ پوشاک ءَ پوش اِتگ۔ آئی ءِ جن ءَ معاشی ءُ سیاسی دوئیں پیسلہانی تہا مرکزی کرد پیلو کتگ۔ وزیر ءِ اھوالکاری ءَ گوشت کہ لندن ءِ آمید گس ءَ درملک ءَ نندوکیں مردم ءِ حلاف ءَ ھم فیصلہ داتگ کہ ایشی ءَ چہ اے گپ گیش پدر بیت۔ ھما مردم کہ درملک ءَ نشتگ ءُ سیاست کنت آ فوج ءِ سر ءَ الزام جنت۔ درملک ءَ نشتگیں وھد ءَ ملک ءِ مفاد ءِ ھلاپ ءَ دروگیں بیان ءُ پروپیگنڈا کنگ بے دروریں تاوان بار اِنت۔ وزیر ءِ اھوالکاری ءَ برطانیہ ءِ ماھتاک ’’دی اکانومسٹ‘‘ ءِ رپوٹ ءِ حوالہ ءَ گوشت کہ اے رپوٹ ءَ ھاسیں رنگ ءَ گشگ بوتگ کہ تحریک انصاف ءِ بُن ھشت ایر کنوک ءِ زالبول سرکاری کارانی تہ ءَ اثر مند بوتگ، روحانیت ءِ بنیات ءَ پیسلہ کنگ بوتگ ءُ ایشانی سر ءَ عمل ھم کنگ بوتگ۔ یک مثالے پیش کنان ءَ آئی ءَ گوشت کہ پیسریگیں بنجاھی وزیر پنجاب عثمان بزدار ھم ھمے رنگیں پیسلہ آنی چیر دستی ءَ سر وزیر جوڑ کنگ بوتگ، تحریک انصاف ءِ بانی ءِ دور ءَ سرجمیں نظام دروگ ءُ تہمت ءِ بنیاد ءَ چلائینگ بوتگ۔ ناشرکاری ءِ وئیل ءُ سیکورٹی آپریشن ءِ ھوالگ ءَ وزیر ءِ ھال ءُ اھوال ءَ گوشت کہ وانا کیڈٹ کالج ءَ 550 ءَ چہ گیش نودربر آنی جان رکینتگ، اے پاک اُرد ءِ بہادری ءِ نشان اِنت، اُرد ءَ ناشرکار آناں ھلاس کنگ ءَ مزنیں کارروائی کتگ۔ اسلام آباد آمیدگس ءِ اُرش ءِ ھوالگ ءَ آئی ءَ گوشت کہ پٹ ءُ پول برجاہ اِنت ءُ ناشرکار نوں ’’نرمیں ٹارگٹ‘‘ ءِ نیمگ ءَ روگ ءِ کوشست ءَ اَنت۔ وزیر ءِ اھوالکاری ءَ سری لنکا ءِ ہائی کمیشن ءُ زمبابوے ءِ کرکٹ ٹیم ءِ شگر ءُ منت گپت ءُ اے گپ ءِ سر ءَ زور پر دات کہ ھرچ وڑ ءَ لیب ءُ امن ءِ چست ءُ ایر برجاہ بنت۔ آئین ءِ تہ ءَ ترمیم ءُ عدالتی اصلاحات ءِ ھوالگ ءَ جست ءِ سر ءَ عطا اللہ تارڑ ءَ گوشت کہ آئین ءِ تہ ءَ ترمیم ءِ وسیلگ ءَ پیسلہ کنگ بنت ءُ پارلیمنٹ ءَ را کانود جوڑ کنگ ءِ سرجمیں اختیار است انت، جج آنی توامیں گچینکاری میرٹ ءِ سر ءَ بیت۔ آئی ءَ گیش گوشت کہ ملک ءَ آئینی کیس آنی گوشدارگ ءِ واستہ جتاھیں بنچ یا آمید گس ءِ جوڑ کنگ ءَ چہ الس ءَ را نپ رسیت، بیست ءُ ھپتمی آئینی ترمیم ءِ زوت زوت ءَ منظور کنگ ءِ الزام راست نہ اِنت، بازیں سالاں چہ ایشی ءِ سر ءَ گپ ءُ تران بوھگ ءَ اَت، بلے ایشی ءِ سر ءَ عمل کنگ نہ بوتگ۔ وزیر ءِ اھوالکاری ءَ گوشت کہ دروگیں بیانیہ ءُ پروپیگنڈا ءَ چہ ملک ءَ را تاوان رسگ ءَ اِنت ءُ حکومت راستی آنی بنیاد ءَ دیم ءَ روگ ءَ اِنت، پی ٹی آئی ءِ بیانیہ لھتیں درائیں عناصر ھاسیں رنگ ءَ اوگانستان ءِ پروپیگنڈا ءِ رد ءَ اِنت کہ پاکستان ءِ واستہ ھترناک اِنت۔