پاکستان یکوئی، وانگ ءُ زانگ ءُ ورنا آنی طاقت ءَ گوں دلجمی ءَ مھکم ءُ دیمروئی ءِ نیمگ ءَ گام جنان انت، بیرسٹر دانیال چوہدری

اسلام آباد۔15نومبر  (اے پی پی):وفاقی پارلیمانی سیکرٹری برائے اھوالکاری ءُ نشریات ءِ بیرسٹر دانیال چوہدری ءَ گوشت کہ پاکستان یکوئی، وانگ ءُ زانگ ءُ ورنا آنی طاقت ءِ گوما مھکم ءُ دیمروئی ءِ نیمگ ءَ دل یکیمی ءَ گوں گامگیج زورگ ءَ انت۔ آئی ءَ اے ھیالانی درشانی شمبے ءِ روچ ءَ اسلام آباد اسپورٹس کمپلیکس ءَ ھاسیں مہمان ءِ بستار ءَ ویسٹ منسٹر سالانہ اسپورٹس ڈے ءِ مراگش ءَ گوں تران کنان ءَ کت۔ بیرسٹر دانیال ءَ گوشت کہ ورنائیں کھڈکار آنی دل یکمی ءُ نظم ءُ ضبط ءَ چہ پدر بیت کہ پاکستان ءِ آیوکیں وھد ایمنیں دست آنی تہ ءَ اِنت۔ آ وش ءُ مطمئن اِنت کہ اے زھگ زانت ءُ مھکمیں قدراں چہ لیس ملک ءَ را انتہا پسندی ءِ ساھگ ءَ چہ در کن اَنت، ءُ پاکستان ءِ ورنا ناشرکاری ءَ را ھلاس کن اَنت۔ آئی ءَ گوشت کہ وانگ ءُ زانگ، کردار سازی ءُ لیب یک پرامن ءُ دیمروئی کتگیں چاگرد ءِ جوڑیشت ءِ موثریں وسیلگ اَنت، مارا یک انچیں راج ءِ بنیات ایر کنگی اِنت کہ ایشی ءِ تہ ءَ زوراکیں قوت آنی گوما دیم پہ دیم بوھگ ءِ جرات بہ بیت۔ ویسٹ منسٹر ءِ نودربر آنی میاں اوستمانی کامیابی آنی سر ءَ چمشانک دیان ءَ آئی ءَ گوشت کہ بازیں نودربر آناں نامداریں اگدہ زرتگ ءُ میاں اوستمانی فورم آنی تہ ءَ پاکستان ءِ نمائندگی کنان ءَ ملک ءِ شان ءُ شُہاز آورتگ۔ اے کامیابی پاکستان ءِ راستیں ءُ ایمنی ءِ پجار ءَ پدر کن اَنت۔ مراگش ءِ تہا یک وشیں پروگرامے پیش کنگ بوتگ ات کہ ایشی ءِ تہا کلاباہی، کراٹے ءِ مظاہرہ ءُ جتا جتائیں ریس ھوار اتنت۔ نودربراں جوانیں ٹیم ورک، جسمانی فٹنس ءُ دیم ءَ روگ ءِ جذبہ ءِ درشانی کتگ۔ بیرسٹر دانیال چوہدری ءَ گوشت کہ اے وڑیں کار ورنا آنی دیمروئی ءِ واستہ ویسٹ منسٹر ءِ وژن ءِ یک بنیاتی بھرے انت۔ اے ورنائیں ذہناں اعتماد ءُ نظم و ضبط ءِ وسیلہ ءَ دنت کہ آ دیمروئی ءُ موہاں چہ پُریں چاگرد ءَ سوبمند بہ بنت۔ آئی ءَ گوشت کہ پاکستان ایمنیں دست آنی تہ ءَ انت، پرچا کہ نوکیں باھند علم ءُ محنت ءِ ارزشت ءَ زانت۔ ایشانی لگن ملک ءِ ھاتر ءَ مھکم ءُ رژنائیں آیوکیں وھد ءِ ضمانت اِنت۔ آئی ءَ پاکستان ءِ سیکورٹی فورسز ءِ قربانی آناں شانداریں لبزاں گوں شگر ءُ منت درشان کت۔ آئی ءَ گوشت کہ ایشانی اے بہادری ملک ءَ امن ءِ برجائی ءِ واستہ راہ ءَ پچ کنگ ءَ انت۔ آئی ءَ گوشت کہ یکوئی، وانگ ءُ زانگ ءُ ورنا آنی طاقت ءِ گوما پاکستان مھکمءُ دیمروئی ءِ نیمگ ءَ دل یکمی ءَ گوں گامگیج زورگ ءَ انت۔