صدر آصف علی زرداری ءَ تاجکستان ءِ وزیر دیمپانی کرنل جنرل سوبر زودہ امام علی عبدالرحیم ءَ گوں گند ءُ نند کتگ

اسلام آباد۔14نومبر  (اے پی پی):صدر آصف علی زرداری ءَ تاجکستان ءِ وزیر دیمپانی کرنل جنرل سوبر زودہ امام علی عبدالرحیم  ءَ گوں گند ءُ نند کتگ ءُ دو نیمگی سیادی، دیمپانیی کمک، دمگی ایمنی ءُ تجارت ءُ توانائی ءِ شوبگ ءَ وت مہ وتی کمک ءِ دیمروئی ءِ ھوالگ ءَ ھیال ءُ لیکہ درشان کتگ۔ صدر ءِ ایوان ءِ پریس ونگ ءِ نیمگ ءَ چہ جاڑی بوتگیں بیان ءِ رد ءَ جمعہ ءِ روچ ءَ برجم داشتگیں گند ءُ نند ءَ تاجکستان ءِ  سفیر شریف زودہ یوسف طاہر، کرنل رسول زودہ کریم عبد الرسول، میجر جنرل حکیم زودہ ظریف یونس ءُ  میجر جنرل امون اللہ زودہ امین جان امون اللہ  ھم ھوار بوتگ اَنت۔ صدر آصف علی زرداری ءَ گوشت کہ پاکستان تاجکستان ءِ گوما وتی کثیر جہتی سیادی آناں ھاسیں ارزشت دنت کہ ایشانی بنیات یکجائی راجدپتر، دود ءُ ربیدگ ءُ زبانی میراث ءِ سر ءَ انت۔ آئی ءَ گوشت کہ دوئیں ملک وتی سیاسی، ثقافتی ءُ مردم ءُ مردم ءِ سیادی ءَ را گیش مھکم بہ کن اَنت۔ آئی ءَ گوشت کہ تاجکستان میاں اوستمانی ایشیا ءِ دلبند ءِ ھاسیں راہ اِنت، وھدیکہ پاکستان تاجکستان ءِ واستہ میاں اوستمانی آپی راہ آنی تہ ءَ رسائی ءِ وسیلگ اِنت۔ آئی ءَ اے گپ ءِ سر ءَ زور پر دات کہ دوئیں ملک پڑ ءَ امن ءُ ایمنی ءِ دیمروئی ءِ واستہ جوانیں کرد پیلو کت کن اَنت۔ آئی ءَ توان، تجارت ءُ سرمایہ کاری ءِ شوبگ آنی تہ ءَ کمک ءِ مزنیں گنجائش آنی سر ءَ گوشت ءُ کاسا- 1000 منصوبگ ءِ وھد ءِ سر ءَ سرجمی ءِ واستہ پاکستان ءِ جزم ءِ یک رندے پدا گوشت۔ آئی ءَ دیمپانیی شوبگ ءَ گیش بوھوکیں کمک ءِ سر ءَ دل یکیمی ءِ درشان کت ءُ گوشت کہ دوئیں ملک آنی اُرد آنی نیام ءَ وت مہ وتی تپاکی ءُ ایکسرسائز دوستی دوم ءِ سوبمندیں برجم دارگ دوئیں ملک آنی نیام ءَ یکوئی آنی مھکمی ءِ ثبوت انت۔ تاجکستان ءِ وزیر دیمپانی ءَ پاکستان ءِ گوما جتا جتائیں شوبگ آنی تہ ءَ دو نیمگی یکوئی ءَ را گیش گیش کنگ ءِ تہ ءَ گہتری ءِ درشان کت۔ اے موہ ءِ سر ءَ  سینیٹر شیری رحمٰن  ءُ سینیٹر  سلیم منڈوی والا  ھم ھوار بوتگ اَنت۔