بنجائی وزیر مواصلات عبدالعلیم خان نا خیبرپختونخوا ٹی پوسکن ءُ ٹول پلازہ اس جوڑ کننگ نا پارت

اسلام آباد۔ 14 نومبر (اے پی پی) بنجائی وزیر مواصلات عبدالعلیم خان خیبرپختونخوا ٹی پوسکن ءُ ٹول پلازہ اس جوڑ کننگ نا پارت کرساپارینے کہ ٹول پلازہ غاتیان دوئی کٹیا خیبرپختونخوا نا شاہراتی نظام آ خڑچ مریک۔ محصولات نا وصولی شونداری و جوڑ جاڑی ڈٹ آتا چرجوئی کن المی ءِ، ٹول پلازہ غاتیا توڑ پھوڑ ءِ سگنگ پننگک، اوار بندغ آتا برخلاف سخت کانودی کارروائی مریک۔ داخیال آتا درشانی ءِ او جمعہ نادے آ دیوان نا کماشی ءِ کرساکرے۔ این ایچ اے کمامدارآک دیوان اٹی برجاڈٹ و مالی واجبات آتیا بنجائی وزیر ءِ حوال تسر۔ عبدالعلیم خان پارت کرے کہ خیبرپختونخوا ٹی پوسکن ءُ ٹول پلازہ اس جوڑ کننگے، خیبرپختونخوا حکومت تون ٹول پلازہ غاتا جوڑ کننگ کن رابطہ کننگے۔ اوپارے کہ ٹول پلازہ غاتیان دوئی کٹیا خیبرپختونخوا نا شاہراتی نظام آ خڑچ مریک، صوبہ ٹی جمع مروک آ زر آن ہندی شونداری ڈٹ آتے مون آ دننگک، محصولات آتا وصولی شونداری و جوڑ جاڑی ڈٹ آتا چرجوئی کن المی ءِ۔ بنجائی وزیر عبدالعلیم خان پارے کہ اسہ کروڑ روپئی آن زیات واجبات والا ڈٹ آتا انسپیکشن ءِ المی کننگے۔ اوپارے کہ سیکرٹری مواصلات جندی وڑاٹ ڈٹ آتا دورہ ءِ کیک، منظوری معائنہ غان پد کننگک، ٹول پلازہ غاتیا توڑ پھوڑ ءِ سگنگ پننگک، اوار بندغ آتا برخلاف سخت کانودی کارروائی مریک، اوار بندغ آتا برخلاف این ایچ اے دمدستی وڑاٹ ایف آئی آر نوشتہ کرفنگے۔ عبدالعلیم خان پارے کہ معمول نا جوڑ جاڑی ڈٹ آک وڈی خوری ءِ مون آ دیرہ، وڈی خوری نا موکل تفننگک، ہرکہول آ آفیسر آتے دیانتداری اٹ کاریم ءِ پک کروئی مریک۔ دیوان اٹی سیکرٹری مواصلات علی شیر محسود و ایلو بڑزکو کمامدارآک بشخ ہلکر۔